– تۇيەگە ءمىنىپ, جامبى اتۋ كىمنىڭ يدەياسى ەدى؟ قيىندىق تۋدىرمادى ما؟
– تۇيە ۇستىندە جامبى اتۋ «توپجارعان» ەتنو ورتالىعىنىڭ باسشىسى عابيت بەردىباي ۇلىنىڭ يدەياسى. ورتالىقتاعى ات ونەرىنە باۋليتىن ۇستازىم بيىلعى جازدا اساۋ تۇيەلەردى اكەلدى. باستىقتىرىپ ۇيرەتۋدىڭ ءوزى وڭايعا سوققان جوق. شۋداسىنا قول تيگىزبەيتىن تۇيەلەردى ۇيرەتىپ باستىقتىراتىن شاباندوزداردى شاقىرتىپ مىنگىزدىك. ودان كەيىن ساداقتان ۇرىكتى, نىساناعا دا جۋىماي قويدى. قىسقاسى تۇيە ۇستىندە جامبى اتۋ وڭايعا تۇسكەن جوق. ات ۇستىندە شاۋىپ كەلە جاتىپ جامبى اتۋ تۇيەگە قاراعاندا جەڭىل سەكىلدى. ويتكەنى تۇيەگە ءمىنىپ جامبى اتۋدى مەڭگەرەمىن دەپ قۇلادىم دا.
– سۇحباتىڭدا اساۋ ۇيرەتىپ مىنگەنىڭدى ايتىپسىڭ. جىلقى جانۋارىنا دەگەن قىزىعۋشىلىق قانشا جاسىڭنان وياندى؟ جالپى قىز بالالاردىڭ دەنى اساۋ ۇيرەتۋ بىلاي تۇرسىن, جاقىنداۋعا قورقادى.
– جىلقى مالىنا قىزىعۋشىلىعىم بالا كەزدەن ارتتى. مالدى اۋىلدا وسكەندىكى شىعار, كوزىمىزدى اشقاننان كورگەنىمىز ءتورت ت ۇلىك بولعاندىقتان دا مالدىڭ تورەسى جىلقىعا دەگەن اڭسارىم ەرەكشە بولدى. اساۋ تايدى ءوزىم ءمىنىپ جۋاسىتىپ الاتىنمىن. جۋاس جىلقىعا مىنۋگە ءبارى دە اۋەس. ال وسقىرىنىپ, پىسقىرىنىپ جەر تارپىعان جالىنان ۇستاتپاس شۋ اساۋعا جاقىنداۋعا كوپ ادامنىڭ جۇرەگى داۋالاي بەرمەيدى. نەگە ەكەنىن ءوزىم دە بىلمەيمىن, مەندە كەرىسىنشە, جۋاس جىلقىنى تەبىنىپ قامشىلاي بەرگەننەن گورى اساۋدى شالما ۇرىپ ۇستاپ جۋاسىتۋعا اڭسارىم اۋادى دا تۇرادى. بۇل جانۋارعا العاش ءمىنىپ, جۋاسىتقان مەن ەدىم دەگەندى ايتقىم كەلەتىن. سونىڭ جەلىگى مە وسى كۇنگە دەيىن تالاي توقىم ۇشى تيمەگەن شۋ اساۋ جىلقىنىڭ ەزۋىن قاناتىپ جۋاسىتتىم. نەبىر اساۋ, باس بەرمەيتىن جىلقىلار دا كەزىكتى, قارعىپ, موڭكىگەندە تۋلاقتاي ۇشىرعان مىنەزى شادىرلاردى دا مىندىك. سوندا «مەرتىگىپ قالامىن-اۋ» دەگەن قورقىنىش بولعان ەمەس. قايتا قۇلاعان سايىن ورشەلەنىپ, ەسەمدى جىبەرمەۋگە ۇمتىلاتىن ەدىم.
– «توپجارعان» ورتالىعىمەن بايلانىس تۋرالى كەڭىرەك ايتساڭ.
– بۇل ەتنو ونەر ورتالىعىمەن بىلتىردان بەرى بايلانىس ورناتتىم. تيك-توك, ينستاگرام جەلىسىنە جۇكتەگەن ۆيدەولاردى كورگەن عابيت اعا ءوزىنىڭ ورتالىعىنا جۇمىسقا شاقىردى. سودان باستاپ ات ۇستىندەگى قازاقتىڭ ۇلتتىق ويىندارىن ناسيحاتتاپ, دارىپتەپ كەلە جاتىرمىز. العاشىندا تەك قىز قۋ ويىنىنا عانا قاتىسىپ كوردىم. بەرتىن كەلە جامبى اتۋ ونەرىن دە مەڭگەرىپ الدىم. قازىر قىز قۋ, جامبى اتۋ سايىسىنا قاتىسىپ تۇرامىن. ورتالىقتىڭ ۇتىمدى تۇسى –ۇمىتىلىپ بارا جاتقان ۇلتتىق ويىندارىمىزدى جاڭعىرتىپ, وسكەلەڭ ۇرپاقتىڭ ساناسىندا قايتا جاڭعىرتىپ جاتقانى دەر ەدىم. قالادا وسكەن بالالار جامبى اتۋ بىلاي تۇرسىن, جىلقىنىڭ ماڭىنا جۋىمايدى, ءتۇر سيپاتىن, جاس ەرەكشەلىگىن ايىرا الماي جاتادى. ورتالىقتا ماماندار ات ۇستىندە وينالاتىن ۇلتتىق ويىندارىمىزدى دارىپتەيدى, كەلۋشىلەرگە ۇيرەتەدى.
– ءوزىڭ قازاق ۇلتتىق قىزدار پەداگوگيكالىق ۋنيۆەرسيتەتىندە وقيسىڭ, قۇربىلارىڭنىڭ اراسىندا ساعان قاراپ بوي تۇزەپ اتقا مىنگىسى كەلەتىن قىزدار بار ما؟
– قاتار وقيتىن قۇربىلارىم دا مەنىڭ ات ۇستىندەگى ونەرىمە قىزىعادى, وزدەرى دە جۇيرىك جىلقىعا مىنگىسى كەلەدى. ارا-تۇرا دەمالىس ۋاقىتىندا سەيىلدەۋ ءۇشىن كەلىپ مىنەدى. بىراق ولار ءبىر ساتتىك جان راقاتى ءۇشىن عانا. ال مەنىڭ بۇل كاسىبىم, ونەرىم دەسەم دە بولادى. ولارعا اتقا قالاي ءمىنۋ قاجەتتىگىن, تىزگىندى قالاي ۇستاپ, قامشىنى قاي قولعا ءىلۋ كەرەگىن ۇيرەتىپ ءجون سىلتەيمىن. قۋاناتىنىم, اتقا مىنۋگە, ەر ۇستىندە جۇرۋگە قىزىعۋشى جاستاردىڭ قاتارى ارتىپ كەلەدى.
– قىز قۋ سەكىلدى ۇلتتىق ويىندارعا قاتىسىپ تۇراسىڭ عوي, قانداي قىزىقتى وقيعالار ورىن الاتىن ەدى؟
– ءبىر سايىستا قىزىق بولدى. الدىمەن قىز قاشادى, جىگىت قۋادى عوي ويىننىڭ شارتىندا. تورەشىنىڭ بەلگىسىنەن كەيىن تىزگىندى قويا بەردىم, ارتىما بۇرىلىپ قارايمىن اتىن ساۋىرلاتىپ قۋشى دالاڭداپ كەلەدى, كومبەگە دەيىن جەتە المادى. سوسىن «ۇيالعان تەك تۇرماس» دەدى مە, كورەرمەندەردەن تاعى ءبىر مۇمكىندىك بەرۋىن ءوتىندى, حالىق شۋلاپ ەكىنشى رەت قۋدى. بىراق بۇل جولى جەتىپ الدى. ال مەن قاي كەزدە دە قىز قۋدا جىگىتتى قۋىپ جەتىپ قامشىنىڭ استىنا الاتىنمىن. ەشقاشان اتىم شابانداپ جەتە الماي قالعان ەمەس.
– جىلقى ەستى جانۋار, ادامنىڭ قورىققانىن, نە ويلاپ تۇرعانىن سەزىپ قويادى. تاعى قانداي قاسيەتىن بايقايسىڭ؟
- شىنىندا ءتورت ت ۇلىك تورەسىنىڭ ەستىلىگى تاڭداندىرادى ۇنەمى. بۇل جانۋار ءبىزدىڭ كوڭىل-كۇيىمىزدى, نە ويلاپ تۇرعانىمىزدى سەزىپ-بىلەدى. ءوز باسىم جىلقىنىڭ مىنەز-قۇلقىن العاش تىزگىندەپ مىنگەننەن-اق بايقاي قويامىن. كەيبىر جىلقى مالى بولادى, ءبىر ادامعا تىم جاقىن باۋىر باسىپ كەتەدى. وزگەلەر مىنسە, مىنەز كورسەتىپ موڭكيدى, توڭقيدى, قارعيدى. ال ءوزىنىڭ ۇيرەتكەن يەسى مىنسە, قويدان دا جۋاس بولا قالادى. قۇلا ارعىماعىم بار ەدى, تاي كۇنىنەن ءوزىم جۋاسىتىپ ۇيرەتكەم. اعالارىم, ىنىلەرىم مىنەيىن دەسە تەۋىپ, قىرشىپ ماڭىنا جۋىتپاي مىنەزىن كورسەتەدى. ال مەن بارسام قۋانعانىن سەزدىرىپ جاقىندايدى. وسىعان قاراپ تا جىلقىنىڭ ەستىلىگىن پايىمداۋعا بولادى.
– بالا كۇنىڭدە بايگەگە قاتىستىڭ با؟
– جەتكىنشەك شاعىمنان بايگەگە دە قوسىلدىم. بىراق ارنايى جاراتىپ جۇيرىك قوسقان ەمەسپىز. كۇندەلىكتى قويعا ءمىنىپ جۇرگەن شارۋا اتىمىزدى اپارىپ سوعان مىنەتىن ەدىم. ءبىر جولى بايگەنى ءبىز ۇيىمداستىردىق. قىزىق بولعاندا بارلىق جۇيرىكتى شاڭ قاپتىرىپ الدىما ەش قارا تۇسىرمەي جەكە-دارا شىقتىم. سوڭعى اينالىمعا وتكەنىمىزدە ويلاندىم. ء«وزىمىز بايگە ۇيىمداستىرىپ ء وزىم ءبىرىنشى جۇلدەنى السام ۇيات قوي. اتىمنىڭ شابىسىن ىركىپ, تىزگىندى تارتىپ وزگە قاتىسۋشىلاردىڭ وزىپ كەتۋىنە ادەيى مۇمكىندىك تۋعىزدىم. ودان كەيىن دە بايگەگە قوسىلدىم, ەكىنشى, ءۇشىنشى ورىن بۇيىردى. بويجەتكەن سوڭ كوكپارعا دەگەن قىزىعۋشىلىعىم ارتتى. اۋىل ءۇيدىڭ اراسىندا كوكپارعا قاتىسۋعا بارامىن. اۋىلداستارىم دودانىڭ ىشىنەن الىپ شىعىپ, مەنىڭ تاقىمىما سالىپ بەرەدى. تىزگىندى قويا بەرىپ, تاقىمىڭداعى كوكپاردىڭ سيراعىن قاۋسىرا ۇستاپ شابۋدىڭ اسەرى كەرەمەت, تىلمەن ايتىپ جەتكىزە المايسىڭ.
