فوتو: ۆەدومستۆو. تەلەگرام
كاراتە: الماتىدا ۇيىمداستىرىلعان WKF كاراتەدەن جاستار مەن جاسوسپىرىمدەر اراسىنداعى XXI ازيا چەمپيوناتىندا قازاقستان سپورتشىلارى 8 التىن, 5 كۇمىس, 11 قولا مەدالمەن جالپىكوماندالىق ەسەپتە ەكىنشى ورىنعا يە بولدى. ال ەرەسەكتەر اراسىندا وتكەن I ازيا اشىق بىرىنشىلىگىندە كاراتەشىلەرىمىز 8 التىن, 8 كۇمىس, 14 قولا جۇلدەمەن توپ جاردى.
ساداق اتۋ: بانگكوكتا (تايلاند) وتكەن ساداق اتۋدان ازيا چەمپيوناتىندا وتانداستارىمىز 1 التىن, 1 كۇمىس, 1 قولا مەدال جەڭىپ الدى. سونىمەن قاتار قازاقستان ەرلەر قۇراماسى پاريج وليمپياداسىنىڭ جولداماسىنا قول جەتكىزدى. بۇل – قازاقستان سپورتشىلارى جەڭىپ العان 13-ءىنشى ليتسەنزيا.
مانەرلەپ سىرعاناۋ: قازاقستان مانەرلەپ سىرعاناۋشىسى ميحايل شايدوروۆ قىتايدىڭ چۋنتسين قالاسىندا وتكەن گران-پري جارىسىنىڭ قولا جۇلدەگەرى اتاندى. ەرلەر اراسىنداعى جەكەلەي سىندا باق سىناعان وتانداسىمىز ەكى باعدارلاما قورىتىندىسى بويىنشا 264.46 ۇپاي ەنشىلەپ, جەڭىس تۇعىرىنىڭ ءۇشىنشى ساتىسىنان كورىندى.
شورت-ترەك: شورت-ترەكتەن كانادانىڭ لاۆال قالاسىندا وتكەن ءتورت قۇرلىق چەمپيوناتىندا قازاقستان قىزدار قۇراماسى (الينا اجعاليەۆا, يانا حان, ماليكا ەرمەك, مادينا جانبوسىنوۆا مەن ولگا تيحونوۆا) 3000 مەترلىك قاشىقتىقتى 4:16.200 سەكۋند كورسەتكىشپەن ءۇشىنشى بولىپ كەلىپ, قولا جۇلدەگەر اتاندى.
ترياتلون: ساۋد ارابياسىنىڭ ەل-حۋبار قالاسىنداعى ترياتلوننان ازيا چەمپيوناتىندا وتانداستارىمىز ەكاتەرينا شابالينا مەن ايان بەيسەنباەۆ توپ جاردى.
تەننيس: قازاقستان تەننيسشىسى الەكساندر نەدوۆەسوۆ سوفيادا (بولگاريا) وتكەن ءتۋرنيردىڭ جۇپتىق باسەكەسىندە جەڭىمپاز اتاندى. جەرلەسىمىز اتالعان جارىستا ەكۆادورلىق گونسالو ەسكوبارمەن جۇپ قۇراپ, فينالدا اعىلشىن جانە حورۆات تەننيسشىلەرى دجۋليان كەش پەن نيكولا مەكتيچتەن باسىم ءتۇستى – 6:3, 3:6, 13:11.
سامبو: ارمەنيا استاناسى ەرەۆاندا وتكەن 48-ءشى الەم چەمپيوناتىندا قازاقستان قۇراماسىنىڭ سپورتشىلارى 1 التىن, 2 كۇمىس, 5 قولا ەنشىلەدى. جارىس قورىتىندىسى بويىنشا وتانداستارىمىز جالپى ەسەپتە 3-ورىنعا تۇراقتادى. كەلەسى جىلعى الەم چەمپيوناتى استانادا وتەدى.
