«سامۇرىق-قازىنا» اق جانە «KEGOC» اق بيىلعى 28 قىركۇيەك پەن 2 قاراشا ارالىعىندا وتكەن قازاقستان قور بيرجالارىندا اكتسيالاردى قايتالاما ورنالاستىرۋ قورىتىندىلارى تۋرالى حابارلادى. ينۆەستورلاردان جالپى سوماسى 34,8 ملرد تەڭگەدەن اساتىن 50 مىڭنان استام ءوتىنىم كەلىپ تۇسكەن. بۇل جوسپارلانعان كولەمىنەن 1,5 ەسە ارتىق. جينالعان وتىنىمدەردى تالداۋ ناتيجەلەرى بويىنشا 22,6 ملرد تەڭگەدەن اساتىن جالپى سوماعا وتىنىمدەردى قاناعاتتاندىرۋ تۋرالى شەشىم قابىلدانىپتى. ول جاريالانعان اكتسيالاردىڭ شەكتى سانىنا سايكەس كەلەدى – 15 294 118 جاي اكتسيا.
شارا بۇعان دەيىن جاريالانعان اكتسيالاردى ءبولۋ كريتەريلەرىنە سايكەس جۇزەگە اسىرىلدى جانە قوماقتى پاكەتتەردىڭ جەكە ءىرى ينۆەستورلاردا شوعىرلانۋىن بولدىرماۋعا باعىتتالعان. ءوز ازاماتتارىمىزدان كەلىپ تۇسكەن اكتسيالاردى ساتىپ الۋعا ارنالعان وتىنىمدەر تولىق قاناعاتتاندىرىلعان. اكتسيالاردى قايتالاما ورنالاستىرۋ شەڭبەرىندە «KEGOC» اق 15 294 118 جاي اكتسيا وتكىزدى. بۇل كومپانيانىڭ ورنالاستىرىلعان اكتسيالارىنىڭ جالپى سانىنىڭ 5,6%-ىن قۇرايدى. ناتيجەسىندە, «سامۇرىق-قازىنا» اق-عا تيەسىلى اكتسيالاردىڭ ۇلەسى «KEGOC» اق اكتسيالارىنىڭ 85%-ىنا تەڭ.
ينۆەستورلاردىڭ قاناعاتتاندىرىلعان وتىنىمدەرى كەلەسىدەي ءبولىندى:
- قازاقستان ازاماتتارىنىڭ وتىنىمدەرى – 15 203 099 964 تەڭگە سوماسىنا (67%)
- قازاقستاندىق زاڭدى تۇلعالاردىڭ وتىنىمدەرى – 7 158 346 026 تەڭگە سوماسىنا (32%)
- شەتەلدىك جەكە جانە زاڭدى تۇلعالاردىڭ وتىنىمدەرى – 300 537 744 تەڭگە سوماسىنا (1%)
قاناعاتتاندىرىلاتىن وتىنىمدەردى ايقىنداۋ بارىسىندا ەل ازاماتتارىنان تۇسكەن وتىنىمدەرگە باسىمدىق بەرىلدى. ولاردى قاناعاتتاندىرعاننان كەيىن عانا ءوتىنىم بەرگەن قالعان تۇلعالاردىڭ وتىنىمدەرىن قاناعاتتاندىرۋ تۋرالى شەشىم قابىلداندى.
«وتىنىمدەردىڭ ايتارلىقتاي بولىگى – 44%-ى بولشەك ينۆەستورلاردان ءتۇستى. بۇل ءوز ازاماتتارىمىزدىڭ ءىرى ۇلتتىق كومپانيالاردىڭ IPO/SPO شەڭبەرىندە قور ۇسىناتىن ينۆەستيتسيالىق مۇمكىندىكتەرىنە دەگەن جوعارى قىزىعۋشىلىعىن كورسەتەدى. كىتاپ كولەمىنىڭ 55%-ى ينستيتۋتسيونالدىق ينۆەستورلاردىڭ وتىنىمدەرىن, سونداي-اق شەتەل ازاماتتارىنىڭ وتىنىمدەرى ماردىمسىز بولىكتى, ياعني 1%-دى قۇرادى. سونىمەن قاتار قالىپتاسقان وتىنىمدەر كىتابى شەڭبەرىندەگى پروپورتسياعا قاراماستان, قازاقستان ازاماتتارىنىڭ وتىنىمدەرىن قاناعاتتاندىرۋدىڭ باسىمدىعىن ەسكەرە وتىرىپ, ورنالاستىرۋعا ارنالعان اكتسيالاردىڭ سوڭعى كولەمى بىلايشا ءبولىندى: بولشەك ساۋدا ينۆەستورلارى – 67%, ينستيتۋتسيونالدى ينۆەستورلار – 32%, شەتەل ازاماتتارى – 1%.
ءارتۇرلى ساناتتاعى ينۆەستورلاردىڭ «KEGOC» اق اكتسيالارىنا مۇنداي ارتاراپتاندىرىلعان سۇرانىسى كومپانيانىڭ جوعارى ينۆەستيتسيالىق تارتىمدىلىعىنىڭ جانە قازاقستاندا جاڭا گەنەراتسيالاۋشى قۋاتتاردى ىسكە قوسۋدى جوسپارلاۋ اياسىندا بۇكىل نارىقتىڭ «KEGOC» اق-نىڭ دامۋ بولاشاعىنا دەگەن سەنىمىنىڭ دالەلى بولىپ تابىلادى», دەدى «سامۇرىق-قازىنا» اق باسقارما توراعاسى نۇرلان جاقىپوۆ.
نەگىزىندە KEGOC SPO مەملەكەت باسشىسىنىڭ تاپسىرمالارىنا سايكەس, سونداي-اق «جەكەشەلەندىرۋدىڭ 2021-2025 جىلدارعا ارنالعان كەيبىر ماسەلەلەرى تۋرالى» ۇكىمەتتىڭ 2020 جىلعى 29 جەلتوقسانداعى №908 قاۋلىسىمەن بەكىتىلگەن جەكەشەلەندىرۋدىڭ 2021-2025 جىلدارعا ارنالعان كەشەندى جوسپارىنا سايكەس وتكىزىلىپ جاتىر.
«KEGOC SPO-نىڭ ءساتتى ءوتۋىن ازاماتتاردىڭ مەملەكەتكە جانە ءبىزدىڭ كومپانياعا دەگەن سەنىمى رەتىندە باعالايمىز. SPO ناتيجەلەرى بويىنشا كومپانيانىڭ ەركىن اينالىمداعى اكتسيالارىنىڭ ۇلەسى شامامەن 2,7%-دان 8,1%-عا دەيىن ۇلعايادى. بۇل KEGOC اكتسيالارىنىڭ وتىمدىلىگىنە جاعىمدى اسەرى بولادى جانە قازاقستان قور نارىعىنىڭ دامۋىنا ىقپال ەتەدى. ءبىز ەلەكتر جەلىسىن كۇشەيتۋ بويىنشا جۇيەلى باستامالارىمىزدى جالعاستىرامىز. اتاپ ايتقاندا, SPO-دان تارتىلعان قاراجات KEGOC-تى دامىتۋعا باعىتتالاتىن بولادى. نەگىزى KEGOC – ديۆيدەندىك تاريحى ءمىنسىز كومپانيا جانە نارىقتىڭ بىزگە ارتقان سەنىمى, وتانداستارىمىزدىڭ الدىندا بارلىق بەلگىلەنگەن جوسپاردى ەڭ جوعارى تيىمدىلىك كورسەتكىشتەرىنە قول جەتكىزە وتىرىپ ورىنداۋ ءۇشىن قوسىمشا موتيۆاتسيا بولىپ تابىلادى», دەدى «KEGOC» اق باسقارما توراعاسى ءنابي ايتجانوۆ.
بۇگىن KEGOC SPO شەڭبەرىندە ساتىلعان بارلىق اكتسيا قاناعاتتاندىرىلعان وتىنىمدەرگە سايكەس بولىنەدى جانە ءتيىستى ينۆەستورلار شوتتارىنان ولار ساتىپ الاتىن «KEGOC» اق اكتسيالارىنا تولەم جۇرگىزۋ ءۇشىن ءتيىستى اقشالاي سومالار الىنىپ, اكتسيا شوتتارىنا ەسەپتەپ جازىلادى. «استانا» حالىقارالىق قارجى ورتالىعىنىڭ بيرجاسىندا قايتالاما ساۋدا-ساتتىقتىڭ باستالۋى كۇنى ەرتەڭگە جوسپارلانعان. «فريدوم فينانس» اق, «Halyk Finance» اق جانە «SkyBridge Invest» اق SPO-نىڭ بىرلەسكەن ۇيلەستىرۋشىلەرى مەن بۋكراننەرلەرى بولىپ تابىلادى. «BCC Invest» اق جانە «Jusan Invest» اق بىرلەسكەن اندەررايتەرلەر بولىپ تابىلادى.
SPO-دان تۇسكەن قاراجات KEGOC-تىڭ ەلىمىزدىڭ ءبىرتۇتاس ەلەكتر ەنەرگەتيكالىق جۇيەسىنىڭ وڭتۇستىك ايماعىنىڭ جەلىلەرىن كۇشەيتۋ بويىنشا ءىرى ينۆەستيتسيالىق جوباسىن ىسكە اسىرۋعا جۇمسالادى. جوبا شەڭبەرىندە 500 كۆ ءۇش ەلەكتر قوسالقى ستانسانى كەڭەيتە وتىرىپ, ۇزىندىعى 475 كم 500 كۆ «شۋ-جامبىل-شىمكەنت» 2 جەلى سالىناتىن بولادى. بۇل ەلەكتر ەنەرگياسىن تۇتىنۋدىڭ بولجامدى وسۋىنە بايلانىستى وڭتۇستىك ايماق تۇتىنۋشىلارىن ەلەكترمەن جابدىقتاۋ سەنىمدىلىگىن ارتتىرۋعا, سونداي-اق سول ايماقتا شوعىرلانعان ءىرى جەك وبەكتىلەرىنىڭ قۋاتىن بەرۋدى قامتاماسىز ەتۋگە مۇمكىندىك جاسايتىن ستراتەگيالىق ماڭىزدى جوبا.
