اقوردا تاراتقان مالىمەتكە سۇيەنسەك, ساپار اياسىندا ەكى ەل باسشىلارى ساۋدا-ەكونوميكالىق, ينۆەستيتسيالىق جانە ەنەرگەتيكالىق ىنتىماقتاستىقتى نىعايتۋ ماسەلەلەرى جونىندە كەلىسسوز جۇرگىزەدى. سونداي-اق حالىقارالىق جانە وڭىرلىك كۇن تارتىبىندەگى ماسەلەلەردى تالقىلاماق.
جالپى, بۇعان دەيىن فرانتسيا پرەزيدەنتى ەلىمىزگە ءۇش مارتە كەلگەن ەكەن. 1993 جىلى فرانسۋا ميتتەران, 2009 جىلى نيكوليا ساركوزي جانە 2014 جىلى فرانسۋا وللاند ۇلى دالاعا ات باسىن بۇردى. بىلتىر قاراشادا پرەزيدەنت قاسىم-جومارت توقاەۆ فرانتسياعا رەسمي ساپارمەن بارىپ, ەليسەي سارايىندا ە.ماكرونمەن كەلىسسوز جۇرگىزگەن ەدى. مەملەكەت باسشىسى بۇل ساپار ەكى ەل اراسىنداعى ستراتەگيالىق سەرىكتەستىكتى نىعايتىپ, قارىم-قاتىناستى جاڭا دەڭگەيگە كوتەرۋگە زور مۇمكىندىك بەرەتىنىن اتاپ وتكەن-ءدى.
ءوز كەزەگىندە ەممانيۋەل ماكرون قازاقستان فرانتسيانىڭ ستراتەگيالىق سەرىكتەسى ەكەنىن اتاپ ءوتتى. ەكى ەل اراسىندا ساۋدا-ەكونوميكالىق ىنتىماقتاستىق قارقىندى دامىپ كەلەتىنىنە نازار اۋداردى. ەنەرگەتيكا سالاسىندا بىرلەسكەن جوبالار جۇزەگە اسىرىلىپ جاتقانىنا دا ەكپىن بەرگەنى ەسىمىزدە. وسى كەزدەسۋ سوڭىندا قاسىم-جومارت توقاەۆ ەممانيۋەل ماكروندى قازاقستانعا ساپارمەن كەلۋگە شاقىردى.
ال بيىل ق.توقاەۆ فرانتسيا پرەزيدەنتىنىڭ ارناۋلى وكىلى يزابەل ديۋموندى قابىلدادى. كەزدەسۋ بارىسىندا جوعارى دەڭگەيدە قول جەتكىزىلگەن ۋاعدالاستىقتاردى جۇزەگە اسىرۋعا باعىتتالعان ەكىجاقتى قاتىناستاردى ودان ءارى نىعايتۋ ماسەلەلەرى تالقىلاندى.
قاسىم-جومارت توقاەۆ ەكى ەل اراسىنداعى ساۋدا-ەكونوميكالىق, مادەني-گۋمانيتارلىق بايلانىستاردىڭ قارقىندى دامىپ كەلە جاتقانىنا جوعارى باعا بەردى. مەملەكەت باسشىسى پرەزيدەنت ەممانيۋەل ماكرونعا جۇرەكجاردى سالەمىن جولدادى جانە ونى قازاقستانعا ساپارمەن كەلۋگە شاقىردى.
فرانتسيا – قازاقستاننىڭ نەگىزگى ساۋدا سەرىكتەسىنىڭ ءبىرى. 2005 جىلدان بەرى توعىزىنشى تەرريتوريا ەكونوميكاسىنا جالپى كولەمى 17 ميلليارد دوللار ينۆەستيتسيا قۇيىپ, ەڭ ءىرى بەس ينۆەستور ەلدىڭ قاتارىنا كىرەدى. ەكىجاقتى تاۋار اينالىمى 2,5 ميلليارد دوللارعا جەتتى. بۇل بىلتىرعى وسى كەزەڭمەن سالىستىرعاندا 6,1 پايىزعا جوعارى. فرانتسيانىڭ ورتالىق ازيا ەلدەرىمەن جاساعان ساۋدا-ساتتىعىنىڭ 90 پايىزى قازاقستانعا تيەسىلى. ەكى مەملەكەت ەنەرگەتيكا, تاۋ-كەن ءوندىرىسى, جەڭىل ونەركاسىپ, قۇرىلىس, اەروعارىش, ماشينا جاساۋ, دەنساۋلىق ساقتاۋ جانە تاماق ونەركاسىبى سالالارىندا ءتيىمدى جوبالاردى بىرلەسىپ جۇزەگە اسىرىپ كەلەدى. قازاقستاندا 170-تەن استام فرانتسيالىق كومپانيا مەن بىرلەسكەن كاسىپورىن جۇمىس ىستەيدى. ولاردىڭ اراسىندا ەكونوميكامىزدىڭ جەتەكشى ينۆەستورلارى سانالاتىن Total Energies, Air Liquide, Airbus, Alstom, Orano, Danone سەكىلدى كومپانيالار بار. بىلتىر ەلدەرىمىز ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ 2030 جىلعا دەيىنگى جول كارتاسىن بەكىتتى.
قازاقستان نەگىزىنەن مۇناي, مەتالل, حيميالىق جانە اۋىل شارۋاشىلىعى ونىمدەرى, حروم وكسيدتەرى مەن گيدروكسيدتەرى, مىس پەن مىس كاتودتارىن ەكسپورتتايدى. ال فرانتسيادان ۇشۋ اپپاراتتارىن, ەلەكتر, ەلەكتروندىق جانە مەحانيكالىق جابدىقتاردى, ءدارى-دارمەكتەردى, كوسمەتيكانى, اۆتوموبيلدەردى, ازىق-ت ۇلىك ونىمدەرىن يمپورتتايدى.
ەكى ەل اراسىنداعى مادەني-گۋمانيتارلىق بايلانىس تا جولعا قويىلعان. فرانتسياداعى ەلشىلىكتىڭ جانىندا قازاق ءتىلىن ۇيرەنۋ, ۇلتتىق اسپاپتاردا ويناۋدى ۇيرەتۋ, سۋرەت سالۋ بويىنشا كۋرستار وتكىزەتىن «قورقىت-اباي» ورتالىعى جۇمىس ىستەيدى. 2016 جىلى الماتى مەن رەنن قالالارى اراسىنداعى باۋىرلاستىق قارىم-قاتىناستىڭ 25 جىلدىعىنا وراي رەنن قالاسىنىڭ الماتى باعىندا اباي ءبيۋستى اشىلدى. 2020 جىلى ابايدىڭ 175 جىلدىعىن مەرەكەلەۋ اياسىندا بىرقاتار ەستەلىك ءىس-شارا وتكىزىلدى.
تاۋەلسىزدىكتىڭ 30 جىلدىعىن مەرەكەلەۋ اياسىندا قازاقستاننىڭ فرانتسياداعى ەلشىلىگى فرانتسۋز پوشتا قىزمەتىنىڭ ەستەلىك ماركالارىن شىعاردى. سونىمەن قاتار ەلشىلىكتىڭ كىرۋ توبىن بەزەندىرەتىن باننەرلەر جاسالدى. 2021 جىلى 6 جەلتوقساندا پاريجدەگى اقىندار ساياباعىندا اباي ءبيۋستىنىڭ سالتاناتتى اشىلۋ ءراسىمى ءوتتى. كەلەسى جىلى قازاقستاندا فرانتسۋز تىلىندە وقىتاتىن جاڭا مەكتەپتەر اشىلماق.
