اۋا رايىنىڭ قولايلى ءساتىن قالت جىبەرمەي, ءار ەڭبەك كۇنىن ۇتىمدى پايدالانۋدى ماقسات ەتكەن ديقاندار قاۋىمى قىزۋ ەڭبەككە كىرىسىپ, قىرماندى اق مارجانعا تولتىرۋ قامىنا كىرىستى. ەگىس القابىندا دا, قىرمان باسىندا دا – قاربالاس تىرلىك. ەگىن جيناۋدا «وتەس», «بىرلىك» اگروفيرمالارىمەن قاتار, «تامشىبۇلاق», «باۋىرجان-7» جشس جانە «دينارا» وك-ءى كوش باسىنان كورىنىپ كەلەدى.
كۇرىش ءوسىرۋدىڭ قىر-سىرىنا قانىق «بىرلىك» جشس-نىڭ ەگىس القابىندا جۇمىس كىدىرىسسىز ءجۇرىپ جاتىر. اتالعان شارۋاشىلىق كوكتەم ايلارىندا وزدەرىنە تيەسىلى 1 360 گەكتار سۋارمالى جەرگە كۇرىش داقىلىن ەككەن ەدى. جاز بويى كۇتىمدە بولعان كۇرىش القابىن تولىقتاي شاۋىپ, بۇگىندە ونىڭ 865 گەكتارىن باستىرىپ ۇلگەردى. بۇعان قولدا بار تەحنيكانىڭ جەتكىلىكتى ءارى تولىقتاي جۇمىس ىستەۋى سەپ بولعانىن ايتىپ وتكەنىمىز ءلازىم.
كۇرىش وراعىنا 26 كومباين كىرىستى. ونىڭ التاۋى شابۋ جۇمىستارىن ويداعىداي اتقارىپ شىقسا, قالعانى شابىلعان كۇرىشتىڭ ءدانىن جيناۋمەن اينالىسىپ ءجۇر. سونىمەن قاتار استىق تاسۋ ءۇشىن 12 «متز-1221», 20 «متز-80» جانە 1 «YTO-1304» تراكتورلارى جۇمىلدىرىلعان.
«بيىلعى جىلى 950 گەكتار سۋارمالى جەرگە بيداي ەگىپ, ءار گەكتارىنان 25 تسەنتنەردەن ءونىم الىپ, 2 500 توننا استىقتى ديىرمەنگە وتكىزدىك. بۇعان قوسا 3 250 گەكتار جەرگە ەگىلگەن كوپجىلدىق شوپتەن ءۇش ورىم بويىنشا قىسقى مال ازىعىنا 100 مىڭ وراما ءشوپ دايىندادىق», دەگەن اگروفيرما باسشىسى الماس قىستاۋباەۆ كۇزگى جيىن-تەرىن جۇمىستارىن تىڭعىلىقتى اياقتايتىندارىن اتاپ ءوتتى.
ناۋقاندىق جۇمىستىڭ ناتيجەلى اتقارىلۋىندا اسقار تايباقوۆ پەن ەربولات اتەنبەكوۆ باستاعان تاجىريبەلى مەحانيزاتورلار مەن شارۋاشىلىق اگرونومى دوسجان نىعاتوۆتىڭ ەڭبەگى وراسان زور. وسى ۋاقىتقا دەيىنگى الىنعان كۇرىش ءونىمى گەكتارىنان 45 تسەنتنەردەن اينالسا, ەگىن وراعى اياقتالعانشا بۇل كورسەتكىش 50 تسەنتنەردەن اسىپ تۇسەرىنەن ءۇمىتتى. جىل سايىن اۋىسپالى ەگىس القابىن تۇراقتى ساقتاپ, «كاربوميد», «اموفوس» تىڭايتقىشتارىن ۋاقتىلى قولدانىپ, كۇرىش داقىلىنىڭ ءوسىپ-ونۋىنە قاجەتتى بار جاعدايدى جاساۋدىڭ ارقاسىندا مول ءونىم الۋدىڭ مۇمكىندىگى ارتىپ وتىر.
قىرمان باسىنداعى ەسەلى ەڭبەكتى قىزدىرعان مەحانيزاتور تالعات جايشىبەكوۆ پەن قىرمان وپەراتورى بولات ەستاەۆتىڭ ەڭبەگىنە دە ەل ريزا. تاۋداي بولعان كۇرىش ۇيىندىلەرىن قىرمان جۇمىسكەرلەرى دە دەر كەزىندە سورتتاپ, بىتىك ءداندى جاۋىن-شاشىن تيمەيتىن قويمالارعا جەتكىزۋگە كۇش سالىپ جاتىر. وسىلايشا, اق مارجاندى توكپەي-شاشپاي جيناپ الۋ جولىندا جان ايانباعان ەڭبەك ادامدارىنىڭ تاباناقى ماڭداي تەرلەرىنىڭ اقتالۋىن ءبىز دە تىلەدىك.
الماتى وبلىسى
