اسكەرگە شاقىرىلۋشىلار بولىمگە كەلگەن ساتتەن باستاپ اسكەري انت قابىلداعانعا دەيىن ءبىر اي دايىندالادى. وسى كەزەڭدە ولار اسكەري قىزمەتتىڭ نەگىزدەرىن يگەرىپ, باستاپقى پاندەردى, ونىڭ ىشىندە ساپتىق دايىندىقتان ءوتىپ, دەنە شىنىقتىرۋ, جالپى اسكەري جارعىلار مەن اسكەري قىزمەتتىڭ قاۋىپسىزدىك نەگىزدەرىن ۇيرەنۋى كەرەك.
جاۋىنگەرلەردىڭ تەزىرەك بەيىمدەلۋى ءۇشىن دەسانتتىق-شابۋىلداۋ اسكەرلەرىنىڭ اسكەري بولىمدەرىندە ەڭ تاجىريبەلى وفيتسەرلەردەن, سەرجانتتاردان, پسيحولوگتەردەن تۇراتىن جيىن اكىمشىلىگى قۇرىلدى. جيىن اكىمشىلىگى باستىعىنىڭ ايتۋىنشا, كۇزگى شاقىرىلعان جاستاردىڭ اراسىندا سپورتشىلار كوپ. ونىڭ ىشىندە جيىرمادان استام ادام سپورت شەبەرلىگىنە ۇمىتكەر جانە جەكپە-جەكتىڭ تۇرلەرىنەن دارەجەلەرى بار. ماڭعىستاۋ وبلىسىنان بوكستان ەل چەمپيونى جانە گرەك-ريم كۇرەسىنەن ازيا چەمپيونى دا اسكەرگە شاقىرىلىپ وتىر. مەرزىمدى قىزمەتىن وتكەرۋ بارىسىندا ولارعا جاتتىعۋ ءۇشىن قولايلى جاعدايلار جاسالاتىن بولادى. سپورتشىلار قارۋلى كۇشتەردىڭ دەڭگەيىندە وتەتىن جارىستارعا قاتىسا الادى. سپورتتىق ارەنادا دەسانتتىق-شابۋىلداۋ اسكەرلەرىنىڭ نامىسىن قورعاماق.
– الماتى وبلىسىنىڭ «ىلە» پوليگونىندا استانا قالاسى, شىعىس قازاقستان, جەتىسۋ, اباي, اقتوبە, ماڭعىستاۋ, تۇركىستان جانە جامبىل وبلىستارىنان شاقىرىلعان 200-دەن استام بوزبالا جاس جاۋىنگەر كۋرسىنان ءوتىپ جاتىر. بۇگىنگى تاڭدا ولار كۇن ءتارتىبى مەن جاڭا رەجىمگە ۇيرەنىپ قالدى, – دەيدى جيىن اكىمشىلىگىنىڭ باستىعى, پودپولكوۆنيك باقىتجان قىرعىزاليەۆ.
ول ءار ساربازدىڭ جەكە باسىن, مىنەز-قۇلقى مەن ەرەكشەلىكتەرىن انىقتاۋ ءۇشىن پسيحولوگ-وفيتسەرلەر اڭگىمەلەسۋلەر مەن تەستىلەۋ وتكىزەتىنىن ايتتى. الماتى گارنيزونىنىڭ اسكەري پوليتسياسى قىزمەتكەرلەرى پروفيلاكتيكالىق جۇمىستاردى ۇيىمداستىرادى, اكىمشىلىك جانە قىلمىستىق كودەكستەر باپتارىنىڭ ەرەجەلەرىن تۇسىندىرەدى.
پودپولكوۆنيك ب.قىرعىزاليەۆ جاستارمەن بولاتىن كۇندەلىكتى اڭگىمەلەسۋدەن كەيىن 50-دەن استام ساربازدىڭ اسكەرگە شاقىرىلعانعا دەيىن تۇتىنۋشىلىق نەسيەلەردى راسىمدەگەنى انىقتالعانىن ايتتى. قازىر ولارعا «نەسيەلىك دەمالىس» رەسىمدەۋ بويىنشا جان-جاقتى كومەك كورسەتىلىپ جاتىر. بۇل مەرزىمدى اسكەري قىزمەت وتكەرۋ كەزىندە اسكەري قىزمەتشىلەردى الەۋمەتتىك قورعاۋ جانە ولاردى قولداۋ جونىندەگى شارالاردىڭ ءبىرى.
استانادان شاقىرىلعان جيىرما جاستاعى دميتري سۇلەيمەنوۆ مەكتەپتەن كەيىن بىردەن مەرزىمدى قىزمەتتى وتكەرۋ تۋرالى شەشىم قابىلداپتى. بىراق قورعانىس ىستەرى جونىندەگى باسقارمانىڭ شاقىرتۋى بيىل عانا قولىنا تيگەن. ول كوللەدجدى جەڭىل جانە اۋىلشارۋاشىلىق ماشينالارىنىڭ مەحانيگى ماماندىعى بويىنشا بىتىرگەن. العان ماماندىعى قىزمەت بارىسىندا كادەگە اساتىنىنا سەنىمدى. جاس جىگىت ءوزىنىڭ دەسانتتىق-شابۋىلداۋ اسكەرلەرىنە قىزمەت ەتۋگە كەلگەنىن ەرەكشە ءبىر سەزىممەن ايتادى.
– جۋىردا عانا ءبىز پاراشيۋتپەن سەكىرۋ الاڭىنا باردىق. وندا كوكتەمدە شاقىرىلعان جىگىتتەردىڭ العاش رەت پاراشيۋتپەن سەكىرگەنىن كورىپ, تاڭ قالدىق. مەنىڭ دە ارمانىم – ءوزىمدى سىناپ كورۋ. اسكەردەگى قىزمەتتىڭ ارقاسىندا كوپ ۇزاماي ول ارمان ورىندالاتىنىنا سەنىمدىمىن جانە سول ءساتتى اسىعا كۇتەمىن, – دەيدى جاس سارباز.
اسكەر قاتارىنا شاقىرىلعان د.سۇلەيمەنوۆتىڭ ۇيىندە اتا-اناسى, دەنساۋلىعىنا بايلانىستى اسكەردە قىزمەت ەتە المايتىن سىڭارى, مەكتەپتە وقيتىن كىشى قارىنداسى جانە ءبىر جارىم جاسار ءىنىسى بار. دميتري بارلىق سارباز سياقتى اپتا سايىن ۇيىنە قوڭىراۋ شالىپ, جاڭالىقتارى مەن جەتىستىكتەرىن, كومانديرلەر مەن دوستاسىپ ۇلگەرگەن ارىپتەستەرى تۋرالى ايتىپ تۇرادى.
جاقىن ارادا اسكەرگە شاقىرىلۋشىلار ءبروندى ماشينالارمەن جانە العاشقى اتىس قارۋلارىن قولدانىپ سىناقتان وتەدى. سودان كەيىن ولاردى اسكەري انت بەرۋ سالتاناتتى ءراسىمى كۇتەدى.
