فوتو: Turizm_zhane_sport_ministrligi
سپورت تۇرلەرى بويىنشا فەدەراتسيا باسشىلارى مەن باس باپكەرلەر قاتىسقان جيىندا مەملەكەت باسشىسىنىڭ تاپسىرماسىنا ساي اتقارىلۋى ءتيىس جۇمىستىڭ جايى پىسىقتالدى.
ەڭ الدىمەن گرەك-ريم, ەركىن جانە ايەلدەر كۇرەسى فەدەراتسياسىنىڭ وكىلدەرى ەسەپ بەردى. سپورت فۋنكتسيونەرلەرى پالۋانداردىڭ كورسەتكەن ونەرى تۋرالى, سونداي-اق ورىن العان جاعدايدى باياندادى. ەسەپ بەرۋ جيىنىنا گرەك-ريم كۇرەسىنەن باس جاتتىقتىرۋشى يۋري مەلنيچەنكو قاتىسپادى. تۋريزم جانە سپورت ءمينيسترى فەدەراتسيا باسشىلىعىنا وسى ماسەلە بويىنشا ەسكەرتۋ جاساپ, سپورتشىلارىمىزدىڭ كوڭىل كونشىتپەگەنىن اتاپ ءوتتى.
«پالۋاندار ءبىرىنشى كەزەڭدە ءتاۋىر-اق كۇرەسەدى, ال ەكىنشى كەزەڭدە دەمىگىپ قالادى. جەكە دايىندىق باعدارلاماسى جوق. 2024 جىلعى پاريج وليمپياداسىندا مەدالعا ىلىگەدى دەگەن سپورتشىلاردىڭ ءتىزىمىن قۇرىپ, ولاردىڭ جاتتىعۋىنا تولىققاندى جاعداي جاساۋ قاجەت», دەدى ە.مارجىقپاەۆ.
سۋ دوبىنان دا ەرلەر مەن ايەلدەر قۇراماسى جازعى ازيا ويىندارىنان قولا جۇلدەنى مىسە تۇتتى. قۇرامانىڭ باس باپكەرى دامير تەمىرحانوۆ ويىنشىلار اراسىندا بۋىن الماسۋ جۇرگەنىن, جاسى كەلگەن سپورتشىلاردىڭ ورنىن جاستار باسقاندىقتان كوماندالىق ويناۋ جۇيەسىندە اعاتتىق كەتكەنىن جاسىرمادى.
