كەزدەسۋدى كىرىسپە سوزبەن اشقان وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى اسحات بەردىحانوۆ ايماقتاعى گازداندىرۋ جۇمىستارىنا توقتالدى.
«وڭىرىمىزدە 149 ەلدى مەكەن كوگىلدىر وتىنعا قوسىلعان. بيىلعى جىلى 18 اۋىلدا قۇرىلىس-مونتاج جۇمىستارى جۇرگىزىلىپ, بۇل ماقساتقا بيۋدجەتتەن 3,5 ملرد تەڭگە ءبولىندى. جىلدىڭ سوڭىنا دەيىن 7 نىسان ىسكە قوسىلاتىن بولادى. وعان قوسا 42 جوبالىق-سمەتالىق قۇجاتتامانى ازىرلەۋگە وبلىستىق بيۋدجەتتەن 595,0 ملن تەڭگە ءبولىندى. سونىمەن قاتار سۇيىتىلعان گازبەن قامتاماسىز ەتۋمەن وبلىس اۋماعىندا تىركەلگەن 19 اككرەديتتەلگەن گاز جەلىسى مەكەمەسى جۇمىس ىستەيدى. اي سايىن وبلىسقا 6 مىڭ توننا شاماسىندا گاز بولىنەدى. قاجەتتىلىك 10 مىڭ توننا بولعاندا, جەتىسپەيتىن كولەمى كوممەرتسيالىق سۇيىتىلعان گازبەن جابىلادى», دەگەن باسقارما باسشىسى قازىرگى تاڭدا بارلىق گاز جەلىسى ۇيىمدارى وسى جىلدىڭ 4-توقسانىنا گاز جەتكىزۋ ءۇشىن زاۋىتتارمەن كەلىسىمشارت جاساسقانىن اتادى.
«ەلەكتر جانە جىلۋ ەنەرگياسىمەن قامتاماسىز ەتۋ – مينيسترلىكتىڭ نەگىزگى مىندەتتەرىنىڭ ءبىرى», دەگەن ەنەرگەتيكا ۆيتسە-ءمينيسترى 9 ايدىڭ قورىتىندىسىندا وڭىردە ەلەكتر ەنەرگياسىن ءوندىرۋ كولەمى – 5,1 ملرد كۆت ساعاتتى قۇراسا, تۇتىنۋ مولشەرى 8,9 ملرد كۆت ساعاتقا جەتكەنىن مالىمدەدى.
وبلىستا ەلەكتر ەنەرگياسىن شەكتى تاريفتەر بويىنشا وتكىزەتىن 2 ەنەرگيا ءوندىرۋشى ۇيىم – «الماتى ەلەكتر ستانسالارى» اق مەن «مويناق گەس» اق-ى بار. ەلەكتر جەلىسىنىڭ فيزيكالىق توزۋى 93 پايىزدى قۇرايدى. وبلىس حالقى ءۇشىن ەلەكتر ەنەرگياسىنىڭ كەپىلدىك بەرۋشى جەتكىزۋشىسى «الماتىەنەرگوسبىت» جشس بولىپ تابىلادى. وبلىس جاڭارتىلاتىن ەنەرگيا كوزدەرىن دامىتۋدىڭ جوعارى الەۋەتىنە يە. وڭىردە 10 جىلۋ ەلەكتر ستانساسى, 7 سۋ ەلەكتر ستانساسى, 6 كۇن ەلەكتر ستانساسى جۇمىس ىستەيدى. 2027 جىلعا دەيىن قۋاتتىلىعى 11,9 مۆت بولاتىن 4 نىساننىڭ قۇرىلىسىن سالۋ جوسپارلانۋدا.
سونداي-اق كۇزگى دالا جۇمىستارىن تۇراقتى جۇرگىزۋ ماقساتىندا وبلىستىڭ اۋىل شارۋاشىلىعى تاۋارىن وندىرۋشىلەر ءۇشىن ءليترى 250 تەڭگەدەن بەكىتىلگەن 7,1 مىڭ توننا ديزەل وتىنى ءبولىنىپ, 2,6 مىڭ تونناسى جونەلتىلگەندىگى تىلگە تيەك بولدى.
مەملەكەت باسشىسىنىڭ تاپسىرماسىنا سايكەس باسەكەلەستىكتى قورعاۋ جانە دامىتۋ اگەنتتىگى مەملەكەتتىك رەتتەۋدى بەلگىلەپ, سۇيىتىلعان گازدىڭ شەكتى بولشەك ساۋدا باعاسىن بەكىتكەن. وبلىستا سۇيىتىلعان گازدىڭ شەكتى بولشەك ساۋدا باعاسى 1 ليتر ءۇشىن 81-86 تەڭگەنى قۇرايدى. وڭىردە 8 گاز تولتىرۋ جانە 236 اۆتوموبيلگە گاز قۇيۋ ستانساسى قىزمەت كورسەتەدى.
كەزدەسۋدە الىبەك جۇمابەك ۇلى مينيسترلىك تاراپىنان ۇزاقمەرزىمدى باعا تۇراقتىلىعىن جانە باعانىڭ كوتەرىلۋى مەن الىپساتارلىققا جول بەرمەۋدى قامتاماسىز ەتە وتىرىپ, سۇيىتىلعان گاز نارىعىن رەفورمالاۋ بويىنشا شارالار قابىلدانىپ جاتقانىن اتاپ ءوتتى. «اتالعان ماسەلەلەردىڭ بارلىعى ۇكىمەتتىڭ تۇراقتى باقىلاۋىندا», دەگەن ۆيتسە-مينيستر تۇرعىنداردىڭ تولعاقتى ساۋالدارىنا جاۋاپ قايىرىپ, كوتەرىلگەن ماسەلەلەردىڭ نازاردان تىس قالمايتىندىعىنا سەندىردى.
الماتى وبلىسى
