فوتو: ۆەدومستۆونىڭ تەلەگرام ارناسى
تۋريزم جانە سپورت مينيسترلىگىنىڭ ءباسپاسوز قىزمەتى ءمالىم ەتكەندەي, جارىسقا ەل اتىنان 131 اتلەت 14 سپورت تۇرىنەن قاتىسادى. اتاپ ايتقاندا پارا جەڭىل اتلەتيكا, بوچچا, پارا پاۋەرليفتينگ, شاحمات, پارا ءجۇزۋ, پارا ۆەلوسپورت, پارا دزيۋدو, پارا كانوە, ۆولەيبولدى وتىرىپ ويناۋ, پارا تاەكۆوندو, پارا ساداق اتۋ, پارا ۇستەل تەننيسى, اكادەميالىق ەسۋ, پارا وق اتۋ سپورت تۇرلەرىنەن 485 مەدال ءۇشىن تالاسقا تۇسەدى.
ايتا كەتسەك, قازاقستان قۇراماسى 2010 جىلدان بەرى ازيانىڭ پارا ويىندارىنا ءتورتىنشى رەت قاتىسقالى وتىر.
تۋريزم جانە سپورت ءمينيسترى ەرمەك مارجىقپاەۆتىڭ ايتۋىنشا, پارا سپورتشىلارىمىز ۇزدىكتەر قاتارىنان كورىنۋ ءۇشىن مەملەكەت تاراپىنان بارلىق جاعداي جاسالعان. بيىلدىڭ وزىندە ۇلتتىق قۇراما سپورتشىلارى 40-تان استام سپورتتىق ءىس-شاراعا, 30-دان استام وقۋ-جاتتىعۋ جيىندارىنا قاتىسىپ, بىلىكتىلىك شىڭداعان.
ايتا كەتەيىك, ازيا ويىندارىندا جۇلدە العان سپورتشىلار مەن ولاردىڭ جاتتىقتىرۋشىلارىن اقشالاي ىنتالاندىرۋ ماقساتىندا قۇرلىق چەمپيونى اتانعان سپورتشىعا 10 000 دوللار كولەمىندە اقشالاي سىياقى بەرىلىپ, التىن مەدال يەگەرىن جارىسقا دايىنداعان جاتتىقتىرۋشىعا 5 000 دوللار قاراستىرىلعان.
قۇرلىق بىرىنشىلىگىنىڭ كۇمىس جۇلدەگەرى 5 000 دوللار, ال جاتتىقتىرۋشىسى 3 000 دوللار كولەمىندە سىياقى الادى.
سونداي-اق قولا مەدال ەنشىلەگەندەرگە 3 000 دوللار, ال ونىڭ جاتتىقتىرۋشىسىنا 2 000 دوللار كولەمىندە اقشالاي ىنتالاندىرۋ بەلگىلەنگەن.
جارىسقا 43 ەلدەن 4 مىڭعا جۋىق سپورتشى قاتىسىپ, سپورتتىڭ 22 تۇرىنەن بارلىعى 564 مەدال جيىنتىعىن (پاراليمپيادالىق سپورت تۇرىنەن - 490 جانە پاراليمپيادالىق ەمەس سپورت تۇرىنەن - 74) ساراپقا سالادى.
