7 قازاندا يزرايلدەگى اسكەري-ساياسي جاعدايدىڭ شيەلەنىسۋىنە بايلانىستى مينيسترلىكتە جەدەل شتاب قۇرىلىپ, شەتەلدەگى توتەنشە جاعدايلار كەزىندەگى ءىس-قيمىل الگوريتمىن دەرەۋ ورىنداۋعا كىرىسكەن.
سىرتقى ىستەر مينيسترلىگىندە جانە قازاقستاننىڭ تەل-اۆيۆتەگى ەلشىلىگىندە يزرايل اۋماعىنداعى قر ازاماتتارى مەن ولاردىڭ ەلىمىزدەگى تۋىستارى ءۇشىن شۇعىل بايلانىس جەلىسى اشىلدى.
ەكى كۇن ىشىندە وتانداستارىمىزدىڭ 500-دەن استام قوڭىراۋلارى مەن سۇراۋلارىنا جاۋاپ بەرىلگەن. بۇگىنگى تاڭدا قازاقستاننىڭ يزرايلدەگى ەلشىلىكتىڭ كونسۋلدىق ەسەبىنە 77 ازامات تىركەلگەن (ەلشىلىك قىزمەتكەرلەرى مەن ولاردىڭ وتباسى مۇشەلەرىن قوسا العاندا). ءيزرايلدىڭ جوعارى وقۋ ورىندارىندا قازاقستاننان 5 ستۋدەنت وقيدى, سونداي-اق 30-عا جۋىق وتانداستارىمىز جەرگىلىكتى ءتۇرلى مەديتسينالىق مەكەمەلەرىندە تاعىلىمدامادان ءوتىپ (بارلىعى 112 ادام) جاتىر.
تەل-اۆيۆتەگى ديپلوماتتارىمىز يزرايلدەگى قازاقستان ازاماتتارىمەن تۇراقتى بايلانىستا جانە ولارمەن ءوزارا جەدەل ءىس-قيمىل جاساۋ ماقساتىندا مەسسەندجەردە ارنايى چات قۇردى. قازىرگى ۋاقىتتا وعان يزرايلدە ۋاقىتشا جانە تۇراقتى تۇراتىن 200-گە جۋىق قازاقستان ازاماتى قوسىلعان. اتالعان چاتتا وتانداستارىمىز وزدەرىنىڭ ورنالاسقان جەرى تۋرالى حابارلاپ, ديپلوماتتارمەن تىكەلەي بايلانىس ورناتتى, ال ديپلوماتتار ءوز كەزەگىندە ازاماتتارىمىزعا ءارتۇرلى ماسەلەلەر بويىنشا كەڭەس بەرىپ, ءتيىستى كونسۋلدىق-قۇقىقتىق كومەك كورسەتىپ جاتىر. يزرايلدەگى بارلىق قازاقستان ازاماتتارى سابىرلىق ساقتاپ, ديپلوماتتارعا قاجەتتى اقپاراتتى ۇسىنۋعا بارىنشا جاردەمدەسىپ جاتىر جانە جەرگىلىكتى بيلىك ورگاندارىنىڭ بارلىق تالاپتارى مەن قاۋىپسىزدىك شارالارىن قاتاڭ ساقتاپ وتىر.
ايتا كەتسەك, يزرايلدە قازا بولعان, زارداپ شەككەن جانە كەپىلگە الىنعان قازاقستان ازاماتتارى تۋرالى اقپارات كەلىپ تۇسپەگەن.
كەيبىر اۆيارەيستەردىڭ توقتاتىلۋىنا جانە بىرقاتار اۆياتاسىمالداۋشىلاردىڭ يزرايلگە رەيستەردى ورىنداۋدان باس تارتۋىنا بايلانىستى قازاقستان ەلشىلىگى «ەير استانا» اۋەكومپانياسىمەن بىرلەسىپ, قازاقستانعا ورالۋعا نيەت بىلدىرگەن ازاماتتاردىڭ ءتىزىمىن قالىپتاستىرۋ, سونداي-اق ولاردى ودان ءارى قاۋىپسىز جەرگە شىعارۋدى ۇيىمداستىرۋ بويىنشا پىسىقتاۋ جۇمىستارىن جۇرگىزىپ جاتىر. وسى ۋاقىتقا دەيىن قازاقستانعا ورالۋعا 118 ازاماتىمىز نيەت بىلدىرگەن. تەل-اۆيۆتەگى بەن-گۋريون اتىنداعى حالىقارالىق اۋەجاي ءوز جۇمىسىن شتاتتىق رەجيمدە جالعاستىرىپ جاتىر.
وسى رەتتە, ءبىر-ەكى كۇن ىشىندە ۇكىمەت دەڭگەيىندە تەل-اۆيۆكە جىبەرىلەتىن ارنايى رەپاترياتسيالىق رەيستى ۇيىمداستىرۋ ماسەلەسى دە كۇن تارتىبىنە الىندى.
قازاقستاننىڭ تەل-اۆيۆتەگى ەلشىلىگىنىڭ بولجامى بويىنشا يزرايلدە كونسۋلدىق ەسەپكە تۇرماعان 400-دەن استام قازاقستان ازاماتى بولۋى مۇمكىن.
