ەلورداداعى «قالامگەرلەر» اللەياسىندا قازاقستاننىڭ ەڭبەك ەرى, حالىق جازۋشىسى مۇحتار شاحانوۆپەن كەزدەسۋ ءوتتى.
كەزدەسۋ الاش ارداقتىلارىنىڭ ەسكەرتكىشتەرىنە تاعزىم ەتىپ, گۇل شوقتارىن قويۋ راسىمىنەن باستالدى.
العاشقى ءسوز كەزەگىن العان اقىن, قازاقستان جازۋشىلار وداعى استانا قالالىق فيليالىنىڭ ديرەكتورى داۋلەتكەرەي كاپ ۇلى قادىرمەندى قوناققا وقىرمان لەبىزىن جەتكىزدى. مۇنان سوڭ قالاداعى تولەگەن ايبەرگەنوۆ اتىنداعى №16 مەكتەپ وقۋشىلارى اقىننىڭ جاۋھار جىرلارىن بىرىنەن سوڭ ءبىرى جاتقا وقىدى.
ءانشى, «مادەنيەت سالاسىنىڭ ۇزدىگى» نۇراي تاناباەۆ اقىننىڭ ولەڭىنە جازىلعان «اق بانتيك» ءانىن ورىنداپ, كوپشىلىكتىڭ كوزايىمىنا اينالدى.
– كەزىندە گيتلەردەن ەلدى قالاي جاۋلاپ الۋعا بولاتىنىن سۇراعاندا ول: «جەڭىل اندەردى ناسيحاتتاي بەرسەك, ولاردى رۋحسىزدىققا ۇشىراتامىز» دەگەن. وكىنىشكە قاراي, قازىر سول ءۇردىس ءورىس الىپ وتىر. مەن شىندىعى جوعالعان ەردى ەر, ايەلدى ايەل دەپ مويىندامايمىن. سانالى عۇمىرىمدى اقيقات جولىنا ارنادىم. شىنشىل اقىن بولۋ دەگەن – ازاپتىڭ ەڭ ازابى. وسى جولدىڭ شىڭىندا جولىعۋعا بارشاڭىزدى شاقىرامىن, – دەدى م.شاحانوۆ.
كەزدەسۋ سوڭىندا اللەياعا اقىن ءوز اتىنان تال ەكتى.
