ونىڭ ايتۋىنشا, جات ءدىني اعىمدار قازاق جاستارىن سوقىر فاناتيزمگە, راديكاليزمگە يتەرمەلەپ جاتىر.
ء«بىز پارلامەنتتەگى ەڭ ءىرى فراكتسيا رەتىندە ۇلتتى بولەتىن, ارامىزعا جىك سالاتىن تەرىس ارەكەتتەردى دە تەزگە سالا الاتىنىمىز انىق. ەلدى بولشەكتەۋگە جول جوق. دۇربەلەڭى كوپ, بۇگىنگى الاساپىران قوعامدا ۇلتتىق اسىل مۇرالارىمىز – سالت-داستۇرلەرىمىزگە دەگەن شابۋىل كوبەيىپ جاتىر. اسىرەسە, جاستاردى سوقىر فاناتيزمگە, راديكاليزمگە يتەرمەلەيتىن جات اعىمدار, الەۋمەتتىك جەلىدە سانانى ۋلايتىن تەرىس ۋاعىزدار, تىنىسىمىزدى تارىلتىپ, القىمنان الىپ بارادى. بۇل – ۇلتتىق مۇراتىمىزعا, تۇتاستىعىمىزعا تونگەن قاۋىپ!», دەدى امانجول ءالتاي دەپۋتاتتىق ساۋالىندا.
ونىڭ ايتۋىنشا, راديكالدى اعىمنىڭ كەسىرىنەن سيرياعا كەتىپ, قىرشىنىنان قيىلعان ۇلداردىڭ تاعدىرى, سودىرلاردىڭ قولجاۋلىعىنا اينالىپ وتىر.
«بىراق بۇگىنگى احۋال وتكەننىڭ قاتەلىگىنەن ساباق الماعانىمىزدى كورسەتەدى. اتانىڭ باتاسىن, اكەنىڭ اقىلىن, انانىڭ ونەگەسىن بويىنا سىڭىرە بىلگەن, سەنىمى بەرىك, نامىسشىل حالىق ەدىك, جات اعىمدارعا كوندىگىپ, ۋاعىزشىل بولىپ بارامىز. بىرىگۋگە ەمەس, بولىنۋگە, ونەگەگە ەمەس, وسەككە وڭەشىمىزدى سوزامىز. ءوزىمىزدىڭ اسىلىمىزدان جەرىپ, وزگەنىڭ جاسىعىنا ءۇيىرمىز. تانىمىمىز تارىلىپ, نانىمىمىز لايلانىپ, قوعامنىڭ تۇسىنىگى قىرىققا ءبولىنىپ جاتىر», دەدى امانجول ءالتاي.
