استانا قالاسىنىڭ اكىمى جەڭىس قاسىمبەكتىڭ ايتۋىنشا, «وڭتۇستىك-شىعىس» گاز جىلۋ ستانتسياسىنىڭ جانە جالپى قۋاتى ساعاتىنا 700 گيگاكالوري بولاتىن «تۇران» گاز جىلۋ ستانتسياسىنىڭ ءبىرىنشى كەزەڭىنىڭ قۇرىلىستارى اياقتالدى.
«وڭتۇستىك-شىعىس» ستانتسياسى مىنجىلدىق اللەياسى, «نۇرلى جول» ۆوكزالى, «باعىستان» تۇرعىن الابى سياقتى قۇرىلىسى قارقىندى تۇردە ءجۇرىپ جاتقان اۋدانداردى, ال «تۇران» ستانتسياسى قالانىڭ سول جاعالاۋىندا جاڭادان سالىنىپ جاتقان اۋماقتى تۇراقتى جىلۋمەن قامتاماسىز ەتەدى. اتالعان گاز جىلۋ ستانتسيالارى بيىلعى جىلىتۋ ماۋسىمىنىڭ باسىنان باستاپ ىسكە قوسىلاتىنى ايتىلدى.
جوسپارعا سايكەس, جىل اياعىنا دەيىن ءۇشىنشى جەو-نىڭ قۇرىلىسى اياقتالادى. ءۇش جاڭا نىسان قالانى قوسىمشا جىلۋمەن قامتاماسىز ەتەدى. ونىڭ قۋاتى – ساعاتىنا 1140 گيگاكالوري.
اكىم اتاپ وتكەندەي, «تۇران» گاز جىلۋ ستانتسياسىنىڭ ەكىنشى كەزەڭىنىڭ سالىنۋى جانە «تەلمان» جاڭا گاز جىلۋ ستانتسياسى قۋاتى ساعاتىنا 850 گيگاكالوري بولاتىن قوسىمشا جىلۋ بەرەدى.
قۇرىلىس كومپانياسىنىڭ وكىلدەرى قازاقستاندا گاز جىلۋ ستانتسيالارىنىڭ وندىرىستەگى وتاندىق ۇلەسىن ارتتىرۋ ءۇشىن گاز جابدىقتارىن ءوندىرۋشى كاسىپورىنمەن ارادا ۋاعدالاستىقتار بار ەكەنىن جەتكىزدى.
پرەزيدەنت گاز جىلۋ ستانتسيالارىن كەزەڭ-كەزەڭمەن پايدالانۋعا بەرۋدى تاپسىردى.
«ەڭ الدىمەن, جوبالاردىڭ ساپاسى جوعارى بولۋعا ءتيىس. ءبىز ونى قاداعالايمىز. مۇنداي جوبالار قالاعا وتە قاجەت. مەن بۇل جەرگە وسى ماقساتپەن كەلدىم. ءار قالادا ءۇش نەگىزگى ماسەلە بار. ولار – جىلۋ, جارىق جانە سۋ. تۇرعىندار بۇل قاجەتتىلىكتەرمەن مىندەتتى تۇردە قامتاماسىز ەتىلۋى كەرەك. ونىڭ ۇستىنە, ءسوز ەلوردا تۋرالى بولىپ وتىر. ەشقانداي كىدىرىس بولماۋعا ءتيىس. بۇل, تۇپتەپ كەلگەندە, ءبىزدىڭ مەملەكەتىمىزدىڭ بەدەلى مەن يميدجىنە قاتىستى ماسەلە. سوندىقتان اتالعان ماسەلەنى ءبارىمىز جۇمىلىپ, مىندەتتى تۇردە تولىق شەشۋىمىز قاجەت», دەدى مەملەكەت باسشىسى.
جەڭىس قاسىمبەك پرەزيدەنتكە استانا سۋ قويماسىنان تارتىلاتىن سۋ قۇبىرىنىڭ جانە سورعى-سۇزگى ستانتسياسىنىڭ ىسكە قوسىلۋى جونىندە ايتتى.
ونىڭ مالىمەتى بويىنشا بيىلعى قاراشادا نۇرا جەراستى سۋ كوزىنەن قۋاتى 48 مىڭ تەكشە مەتر بولاتىن سۋ قۇبىرىن تارتۋ, سونداي-اق «تەلمان» سورعى ستانتسياسىنىڭ قۋاتىن كۇنىنە 160 مىڭ تەكشە مەترگە دەيىن جەتكىزۋ جونىندەگى جوبالاۋ جۇمىستارى اياقتالادى.
قاسىم-جومارت توقاەۆ ەلوردا حالقىنىڭ سانى جىلدان-جىلعا كوبەيىپ كەلە جاتقانىنا بايلانىستى قوسىمشا سۋ كوزدەرىمەن قامتاماسىز ەتۋ جولدارىن ىزدەۋ قاجەتتىگىنە نازار اۋداردى. سونداي-اق قالاداعى جاڭا جىلۋ نىساندارىنىڭ قۇرىلىسىن ۋاقتىلى اياقتاۋدى تاپسىردى.
