فوتو: اقوردانىڭ ءباسپاسوز قىزمەتى
«كەيبىر رەسەيلىك باق پەن ساياسي قايراتكەرلەر گەرمانياعا رەسمي ساپارىڭىز بارىسىندا بەرليندە وتكەن ءباسپاسوز ماسليحاتىنداعى مالىمدەمەلەرىڭىزگە سىن ايتتى. ولار قازاقستان رەسەيمەن ىنتىماقتاستىقتان الشاقتاپ, باتىسپەن جاقىن بايلانىس ورناتىپ جاتىر دەدى. مۇنداي ايىپتاۋعا نە ايتار ەدىڭىز؟» دەپ سۇرادى ءتىلشى.
«قازاقستان الەمدە ەڭ ۇزىن شەكارا بىرىكتىرىپ وتىرعان رەسەيمەن جان-جاقتى ىنتىماقتاستىق باعىتىن بەرىك ۇستانادى. سول ءباسپاسوز ءماسليحاتىندا ايتقانىمداي, بىزدە ءارتۇرلى سالالاردا, سونىڭ ىشىندە ساۋدا جانە گۋمانيتارلىق بايلانىستارداعى ىنتىماقتاستىقتىڭ بۇرىننان قالىپتاسقان ءوز ءداستۇرى بار. ال, سانكتسيالارعا كەلەر بولساق, بۇۇ باس اسسامبلەياسىنىڭ جاقىندا وتكەن سەسسياسىندا جانە باسقا دا سويلەگەن سوزىمدە سانكتسيالىق تەكەتىرەس جاھاندىق داعدارىستىڭ شيەلەنىسۋى جاعدايىنا اكەلەتىنىن ايتتىم. وسى رەتتە قازاقستاندا سانكتسيالىق شەكتەۋلەرگە جاتاتىن تاۋارلار جوق ەكەنىن اتاپ وتكىم كەلەدى.
سونداي-اق قازاقستان رەسەيگە پاراللەل يمپورتقا قاتىسپايدى. وتكەن جىلى ەكى ەل اراسىنداعى ءداستۇرلى تاۋارلار ساۋداسىنىڭ كولەمى 25 ملرد دوللارعا جەتتى. بۇل ايتارلىقتاي ءوسىمدى بىلدىرەدى.
جۋىردا استانادا «يننوپروم» كورمەسى ءساتتى ءوتتى. وعان پرەمەر-مينيستر ميحايل ميشۋستين باستاعان رەسەيلىك دەلەگاتسيا قاتىستى. دەسە دە قازاقستان سانكتسيالىق شەكتەۋلەردى ەسكەرۋگە ءماجبۇر جانە بۇل ماسەلە بويىنشا ءتيىستى حالىقارالىق ۇيىمدارمەن بايلانىستى جالعاستىرا بەرەدى.
وسى مۇمكىندىكتى پايدالانا وتىرىپ, ديپلوماتتاردى رەسەي مەن ۋكراينا اراسىنداعى بەيبىتشىلىك تۋرالى كەلىسسوزدەر ءۇشىن ءوزارا قولايلى نەگىز تابۋعا شاقىرامىن. بۇل وتە ماڭىزدى, ويتكەنى الەم ادامزات ءۇشىن قاۋىپ توندىرەتىن قاقتىعىس جاعدايىنا جاقىندادى. ونىڭ سالدارى اۋىر بولۋى مۇمكىن», دەپ جاۋاپ بەردى قازاقستان پرەزيدەنتى.
ەسكە سالايىق, كەشە قازاقستان پرەزيدەنتىنىڭ گەرمانياعا رەسمي ساپارى باستالدى. ساپار بارىسىندا مەملەكەت باسشىسى قاسىم-جومارت توقاەۆ پەن گەرمانيانىڭ فەدەرالدى كانتسلەرى ولاف شولتس ءباسپاسوز وكىلدەرىنە بريفينگ وتكىزىپ, جۋرناليستەردىڭ سۇراقتارىنا جاۋاپ بەردى.
ەسكەرتۋ: پرەزيدەنت پىكىرى ورىس تىلىنەن اۋدارىلىپ بەرىلدى.
