قالامگەردىڭ مەرەيتويىن اتاپ ءوتۋ ءۇشىن ەلىمىزدىڭ مادەنيەت پەن قوعام قايراتكەرلەرى, جازۋشىلار مەن زيالى قاۋىم وكىلدەرى ۇلتتىق كىتاپحانادا باس قوستى.
«ورالحان بوكەيدىڭ 80 جىلدىعىنا ارنالعان شارالار جازۋشىنىڭ تۋعان جەرىنەن باستالدى. قاتونقاراعايدا ۇلكەن الامان بايگە وتكىزىپ, شىڭعىستايدا قالامگەردىڭ مۋزەيىن اشتىق. استانادا ۇيىمداستىرىلعان مەرەيتويلىق كونفەرەنتسيا, ەندى مىنە, الماتىعا جەتىپ وتىر», دەدى ورالحان بوكەي مەرەيتويىن ۇيىمداستىرۋ كوميتەتىنىڭ مۇشەسى داۋلەت ءاشىمحان.
جيىندا قازاقستاننىڭ ەڭبەك سىڭىرگەن قايراتكەرى, فيلولوگيا عىلىمدارىنىڭ دوكتورى نۇرداۋلەت اقىش «كەستەلى ءسوزدىڭ كەربۇعىسى», فيلولوگيا عىلىمدارىنىڭ دوكتورى, ادەبيەتتانۋشى گاۋھار بالتاباەۆا «ورالحان بوكەيدىڭ پروزاسىنداعى تاۋەلسىزدىك يدەياسى» تاقىرىبىندا بايانداما وقىدى. كادىربەك سەگىزباي, بەكسۇلتان نۇرجەكە, ۇلىقبەك ەسداۋلەت, ماعيرا قوجاحمەتوۆا, الىبەك اسقاروۆ, ءامىرحان مەڭدەكە, بيگەلدى عابدۋللين, جۇسىپبەك قورعاسبەك جانە توقتاربەك ماعزۇموۆ باستاعان قازاقستان جازۋشىلار وداعىنىڭ مۇشەلەرى مەرەيتويلىق شارادا ءسوز سويلەپ, جازۋشىنى ەسكە الدى.
«ورالحاندى قايتالاپ وقىعان سايىن جاڭا قىرى اشىلا تۇسەدى. ول ءوز ارمان-تىلەگىندە «قازاعىمىزدىڭ قادىر-قاسيەتىن تومەندەتپەي, اسقاقتاتايىق, اعايىن!» دەگەن ۇلتجاندى وي ايتادى. سوندىقتان بۇل مەرەيتويدى اتاپ ءوتۋدىڭ استارى تەرەڭدە جاتىر», دەدى فيلولوگيا عىلىمدارىنىڭ دوكتورى, ادەبيەتتانۋشى گاۋحار سايادىلقىزى.
كونفەرەنتسيادا ءسوز العان قالامگەردىڭ جيەنى كلارا نۇرجاقىپقىزى بالا كەزىنەن ورالحان شىعارمالارىمەن سۋسىنداپ وسكەنىن ايتا كەلىپ, ونىڭ بۇكىل قازاقتىڭ ماقتان تۇتار تۇلعاسى ەكەنىن جەتكىزدى. سونداي-اق ول ايماقتان عانا باستاۋ العان شارانىڭ مەملەكەتتىك دەڭگەيدە قولداۋ تاپقانىنا ءوز ريزاشىلىعىن ءبىلدىردى.
«ورالحان بوكەيدىڭ 80 جىلدىق مەرەيتويىن ابىرويمەن وتكىزۋ – ءبىز ءۇشىن ۇلكەن جاۋاپكەرشىلىك. مۇنى وزىمىزگە امانات ەتىپ جۇكتەدىك. الماتى – جازۋشىنىڭ جاستىق شاعى وتكەن قالا. سول ءۇشىن مەرەيتويدىڭ قورىتىندى شارالارىن وسىندا وتكىزۋدى ۇيعاردىق. ەرتەڭ قالامگەر رۋحىنا ارناپ اس بەرىلسە, كەلەسى كۇنى رەسپۋبليكالىق الامان ايتىس بولادى. بارشاڭىزدى سوندا كۇتەمىز», دەدى اۋىلدىق ايماقتاردى تۇراقتى دامىتۋ قورىنىڭ باسشىسى سەرىك ءجۇنىسوۆ.
ايتا كەتسەك, باس جۇلدە قورى 2 500 000 تەڭگەنى قۇرايتىن اقىندار ايتىسى 30 قىركۇيەك كۇنى «الاتاۋ» تەاترىندا وتەدى. كىرۋ تەگىن. قالامگەردىڭ مەرەيتويىن رەسپۋبليكالىق كولەمدە اتاپ ءوتۋ ءۇشىن قاتونقاراعاي كاسىپكەرلەرى قولداۋ كورسەتىپ وتىر.
