ءىس-شاراعا قاتىسقان پارلامەنت ءماجىلىسىنىڭ سپيكەرى, «Amanat» پارتياسىنىڭ توراعاسى ەرلان قوشانوۆ كىتاپ ادام ومىرىندە ايرىقشا ورىن الاتىنىن اتاپ ءوتىپ, جاڭا جوبانىڭ ەرەكشەلىگىنە توقتالدى.
«مەملەكەت باسشىسى تۇركىستاندا وتكەن ۇلتتىق قۇرىلتايدا وسكەلەڭ ۇرپاقتىڭ تاربيەسى مەن بىلىمىنە, ۇلتتىق مۇددەگە ساي كەلەتىن كىتاپتار باسىپ شىعارۋعا ەرەكشە نازار اۋداردى. ول كىتاپ شىعارۋ ءىسى يدەولوگيالىق جۇمىستىڭ باستى باعىتتارىنىڭ ءبىرى ەكەنىن اتاپ ءوتتى. «Amanat» پارتياسى پرەزيدەنتتىڭ وسى باستامالارىن جۇزەگە اسىرۋ ءۇشىن بارلىق وڭىرلىك فيليالدا «كىتاپ-Amanat» كىتاپ دۇكەندەرىن اشادى. ول تەك كىتاپ ساتاتىن ورىن ەمەس, سونىمەن قاتار ناعىز مادەني-اعارتۋ ورتالىعى بولادى», دەدى ەرلان قوشانوۆ.
ماسەلەن, «كىتاپ-Amanat» دۇكەندەرىندە وتاندىق جازۋشىلار, اۆتورلار, باسپاگەرلەردىڭ قاتىسۋىمەن ءتۇرلى ءىس-شارالار, جاڭا كىتاپتاردىڭ تۇساۋكەسەرى مەن تالقىلاۋلارى وتەدى جانە تاعى باسقا ءىس-شارالار ۇيىمداستىرىلادى. جوبا ەلىمىزدەگى قازىرگى زامان اۆتورلارىنىڭ شىعارمالارىن عانا ەمەس, جالپى وتاندىق ادەبيەتىمىزدى ىلگەرىلەتۋدى كوزدەيدى.
«كەيىنگى ۋاقىتتا عىلىمي جانە ءبىلىم بەرۋ مازمۇنىنداعى كوپ ادەبيەت قازاق تىلىنە اۋدارىلدى. بۇل كىتاپتاردىڭ ساپاسى دا, مازمۇنى دا جاقسى. الايدا تارالىمى از بولعان سوڭ, وقىرماننىڭ بارىنە بىردەي جەتە بەرمەيدى. «كىتاپ-Amanat» جوباسى وسى ولقىلىقتىڭ ورنىن تولتىرادى. وسىلايشا, ءبىز جازۋشىلار مەن باسپاگەرلەرگە قولداۋ كورسەتەمىز, وتانداستارىمىزدى كىتاپ وقۋعا ىنتالاندىرامىز دەۋگە بولادى», دەپ اتاپ ءوتتى ەرلان قوشانوۆ.
جاڭا جوبا اياسىندا «Amanat» پارتياسى مەن باسپاگەرلەر, پوليگرافيستەر جانە كىتاپ تاراتۋشىلار قاۋىمداستىعى اراسىندا ءوزارا ىنتىماقتاستىق تۋرالى مەموراندۋمعا قول قويىلدى. قۇجات باسپاحانالاردىڭ دۇكەندەردى قولجەتىمدى باعاداعى ءتيىستى كىتاپ قورىمەن قامتاماسىز ەتەدى. مۇنداي شىعارمالاردىڭ اراسىندا تەك وتاندىق ادەبي تۋىندىلار عانا ەمەس, الەمدىك بەستسەللەرلەر دە بولادى.
ءىس-شارا بارىسىندا پارتيا توراعاسى جاس وقىرمانمەن اڭگىمەلەستى. سونداي-اق كەزدەسۋگە بەلگىلى وتاندىق اۆتورلار مەن باسپاگەرلەر ءادىل قويتانوۆ, شىڭعىس مۇقان, رايسا قادىر, الماس ساقباەۆ, باقىتجان بۇحارباي تاعى باسقالار قاتىستى.
