سۋرەتتەردى تۇسىرگەن – يگور بۋرگاندينوۆ
«مەملەكەت باسشىسى تۇركىستاندا وتكەن ۇلتتىق قۇرىلتايدا ماسس-مەديانىڭ ماڭىزىن ەرەكشە اتاپ ءوتتى. باق سالاسى ۇنەمى پرەزيدەنتتىڭ نازارىندا, ەرەكشە باقىلاۋىندا. بيىل اقپارات سالاسىندا بىرقاتار قۇجات قابىلدانعان جىل بولدى. ەڭ باستىسى, مەملەكەتتىك اقپاراتتىق ساياساتتىڭ نەگىزىن ايقىندايتىن قۇجات – دوكترينا قابىلداندى. قوعام ءۇشىن ونىڭ ىشىندە وسكەلەڭ ۇرپاقتى اقپارات قاۋىپسىزدىگى تۇرعىسىنان قورعاۋعا باعىتتالعان زاڭدى بەكىتتىك», دەدى ا.بالاەۆا.
سالا باسشىسى باق سالاسىندا قابىلدانىپ جاتقان جاڭاشىلدىقتار ەل يگىلىگىنە قىزمەت ەتەتىنىن جەتكىزدى. سونداي-اق Astana Media Week ءىس-شاراسى اياسىندا مەديا سالاسى ماسەلەلەرى جان-جاقتى تالقىلانعانىن اتاپ ءوتتى.
«Astana Media Week-كە وتاندىق جانە شەتەلدىك ۇزدىك ساراپشىلار قاتىستى. ايتۋلى ءىس-شارانىڭ قورىتىندىسى رەتىندە «Urker» سىيلىعى ءوتىپ جاتىر. ءار جىل سايىن «Urker»-ءدىڭ ءوز جاڭالىعى بولادى. بيىل بايقاۋعا 3 جاڭا اتالىم قوسىلدى. ءبىز جاڭا ءارى كرەاتيۆتى مەديانىڭ دامۋىنا ارقاشان قولداۋ كورسەتەمىز», دەدى ا.بالاەۆا.
ءمينيستردىڭ كەلتىرگەن دەرەكتەرىنە سۇيەنسەك, بيىل كونكۋرسقا قاتىسۋعا رەكوردتىق كولەمدە – 450 ءوتىنىم تۇسكەن. وسى ۋاقىتقا دەيىن جالپى 74 باق وكىلى بايقاۋ جەڭىمپازى اتانعان.
«تاڭداۋ وڭاي بولعان جوق. دەگەنمەن قازىلار القاسى ءوز شەشىمىمەن ۇزدىكتەردىڭ ۇزدىگىن انىقتاعانىنا سەنىمدىمىز. ولاردىڭ ارقايسىسىنا قاجىرلى ەڭبەگى ءۇشىن بولەك العىس ايتامىن», دەدى مادەنيەت جانە اقپارات ءمينيسترى.
ايتا كەتەرلىگى, بيىل بايقاۋ 12 اتالىم بويىنشا ءوتتى, سونىڭ ىشىندە 3 جاڭادان قوسىلعان اتالىم بار. «قازاق گازەتتەرى» جاۋاپكەرشىلىگى شەكتەۋلى سەرىكتەستىگى قۇرامىنا كىرەتىن «انا ءتىلى» گازەتى جۇلدەگەرلەر قاتارىنان تابىلدى. اتالعان ماراپاتتى مەملەكەتتىك كەڭەسشى ەرلان قارين باسىلىمنىڭ باس رەداكتورى ەرلان جۇنىسكە تابىستادى. وسىلايشا, بيىلعى «ۇركەردىڭ» ارنايى سىيلىعى – قازاق ءباسپاسوزىنىڭ ەڭ قادىرلى باسىلىمى «قازاق» گازەتى اتىنداعى جۇلدە «انا ءتىلى» گازەتىنە بۇيىردى.
«بيىل قازاق ءباسپاسوزى باستاۋ العان «قازاق» گازەتىنىڭ جارىق كورگەنىنە 110 جىل تولىپ وتىر. وسى جىلدان باستاپ تاريحي گازەت جارىققا شىققان 2 اقپان ۇلتتىق ءباسپاسوز كۇنى دەپ بەكىتىلدى. بار-جوعى 5 جىل وقىرمانعا جول تارتسا دا, «قازاق» گازەتى مەملەكەتىمىزدىڭ تاريحىندا وشپەس ءىز قالدىرىپ, عاسىردان-عاسىرعا جالعاسىپ, ۇرپاق ساناسىندا قايتا جاڭعىرىپ جاتىر. ونىڭ ايقىن دالەلى – «ۇركەر» ۇلتتىق سىيلىعى اياسىندا «قازاق» گازەتىنىڭ 110 جىلدىق مەرەيتويىنا وراي ارنايى جۇلدە تاعايىندالعانى. بۇل – كەزىندە احمەت بايتۇرسىن ۇلى باستاعان الاش زيالىلارىنىڭ قولتاڭباسى قالعان باسىلىمعا قۇرمەتتىڭ ءبىر بەلگىسى. القالى كوميسسيا «قازاق» گازەتى اتىنداعى ارنايى سىيلىققا ماڭدايىندا اقاڭنىڭ سۋرەتى مەن ۇرپاققا ايتقان وسيەتى جازىلعان «انا ءتىلى» گازەتىن لايىقتى دەپ تاۋىپتى. سىيلىق قۇتتى بولسىن, ارىپتەستەر!», دەدى ە.قارين.
سونىمەن «جىلدىڭ ۇزدىك سۇحباتى» اتالىمى «Time.kz» سايتىنىڭ ءجۋرناليسى ءلايلا تاستانوۆاعا بۇيىردى. رابيعا دۇسەنعۇلوۆا («Tengrinews.kz») «جىلدىڭ ۇزدىك رەپورتاجى» اتالىمىندا جەڭىسكە جەتتى. امانگۇل تىلەيقىزى («El.kz») الەۋمەتتىك تاقىرىپتاعى ۇزدىك ماتەريال ءۇشىن ماراپاتتالدى.
سەيداحمەت بەردىقۇلوۆ اتىنداعى ارنايى اتالىم – «جىلدىڭ ۇزدىك جۋرناليستىك زەرتتەۋى» اننا ۆەليچكوعا («Golos-naroda.kz») بۇيىردى. مەرۋەرت سارسەنوۆا («Kapital.kz») «جىلدىڭ ۇزدىك اناليتيكالىق ماتەريالى» اتالىمىندا وزا شاپتى.
جىلدىڭ ۇزدىك جاڭالىقتار پورتالى رەتىندە «Nege.kz» سايتى تانىلسا, «Orda FM»-نىڭ «Zhas STAR» باعدارلاماسى راديوستانساداعى ۇزدىك جوبا اتاندى. ۆالەري بۋگاەۆ تۇسىرگەن سۋرەت جىلدىڭ ۇزدىگى بولىپ تانىلدى.
ۇزدىك وڭىرلىك باق – «سىر بويى» گازەتى (قىزىلوردا وبلىسى), ۇزدىك حالىقارالىق باق (باسپا راديو ينتەرنەت-جۋرناليستيكا سالاسىنداعى) – «قازاق ەلى» جۋرنالى (تۇركيا) اتاندى. اينەل ءامىرحان جۇرگىزەتىن «OY-DETOX» جوباسى – ۇزدىك پودكاست, اباي سەيفوللا ۇلىنىڭ «Abay Live» جوباسى – ۇزدىك You Tube كانالى اتالىمىندا جەڭىسكە جەتتى.
بۇدان بولەك, ءىس-شارا اياسىندا ۇزدىك ءباسپاسوز قىزمەتى مەن اقپاراتتىق سالا قىزمەتكەرلەرى «اقپارات سالاسىنىڭ ۇزدىگى» مەدالىمەن ماراپاتتالدى. مادەنيەت جانە اقپارات مينيسترلىگى قازاقستاندىق جۋرناليستەر اراسىندا جۇرگىزگەن ساۋالدامانىڭ قورىتىندىسى بويىنشا جىلدىڭ ۇزدىك ءباسپاسوز قىزمەتى ديپلومى مەن ءمۇسىنى سىرتقى ىستەر مينيسترلىگىنە تاپسىرىلدى. بۇل ماراپاتتى مادەنيەت جانە اقپارات مينيسترلىگى اقپارات جانە قوعاممەن بايلانىس سالاسىنداعى ناتيجەلى جۇمىسى, سونداي-اق ستراتەگيالىق كوممۋنيكاتسيانى كاسىبي تۇرعىدا جۇزەگە اسىرعانى ءۇشىن تابىس ەتتى.
سىرتقى ىستەر مينيسترلىگىنىڭ ءباسپاسوز قىزمەتى اتالعان اتالىمدى وسىمەن ءتورتىنشى رەت جەڭىپ وتىر. بۇعان دەيىن ءباسپاسوز قىزمەتى 2017, 2018, 2022 جانە 2023 جىلدارى ماراپاتتالعان ەدى.
«بۇقارالىق اقپارات قۇرالدارىنىڭ وكىلدەرىنە ەلىمىزدىڭ سىرتقى ساياسي ۆەدومستۆوسىنىڭ قىزمەتىنە تۇراقتى قولداۋ كورسەتكەنى جانە شىنايى قىزىعۋشىلىق تانىتقانى ءۇشىن شىن جۇرەكتەن العىسىمىزدى بىلدىرەمىز», دەيدى ءسىم ءباسپاسوز قىزمەتى وكىلدەرى.
سونداي-اق بيىل كولىك مينيسترلىگىنىڭ ءباسپاسوز حاتشىسى جانجىگىت ومارحان, قورعانىس مينيسترلىگىنىڭ ءباسپاسوز حاتشىسى رۋسلان جانگۋلين, ۇلتتىق قاۋىپسىزدىك كوميتەتى ءباسپاسوز قىزمەتى باسشىسىنىڭ ورىنباسارى مايگۇل اينابەكوۆا جانە اتىراۋ وبلىسى اكىمىنىڭ ءباسپاسوز حاتشىسى اسەل اۋدانباەۆا «اقپارات سالاسىنىڭ ۇزدىگى» مەدالىنىڭ يەگەرلەرى اتاندى.
اپتالىقتىڭ سوڭعى كۇنى ۇزدىك مەديا مەنەدجەرلەر مەن PR-ماماندار ءباسپاسوز حاتشىلارىنا ارناپ سالاداعى كادرلىق الەۋەتتى ارتتىرۋعا جانە دامىتۋعا باعىتتالعان بىرقاتار سەمينار ءوتتi. مەديا ساراپشى, «Voice Power» اگەنتتىگىنىڭ ترەنەرى ءاليا تەكەنوۆا شىندىق پەن وتىرىكتى اجىراتۋدى ۇيرەتىپ, «فاكت-چەكينگ ساياساتكەرلەر مەن مانساپشىلار ءۇشىن قورعانىس رەتىندە» تاقىرىبىن ءتۇسىندىردى.
كەلەسى ترەنينگتى «مىقتى سپيكەرلەر ورتاسىنداعى تەڭ ديالوگتى» جۋرناليست جانە مەديا مەنەدجەر, PR-كەڭەسشى, «Voice Power» اگەنتتىگىنىڭ ترەنەرى رۋسلان ىدىرىسوۆ وتكىزدى. ال «iMAS Group» باس ديرەكتورى دانيار بيباسار PR جانە ءباسپاسوز قىزمەتتەرىنە ارنالعان اقپارات مونيتورينگى جۇيەسىنىڭ زاماناۋي قۇرالدارى تۋرالى ايتىپ بەردى. «جاساندى ينتەللەكتىڭ بولاشاعى, جەكە برەندينگ جانە قوعامدىق قاتىناستارداعى داعدارىس مەنەدجمەنتى» جونىندە كوممۋنيكاتسيالار جانە جەكە برەندينگ بويىنشا كوۋچ, ستراتەگيالىق PR بويىنشا كەڭەسشى اقەركە بەرلىباي ترەنينگ جاسادى.
