فوتو: https://senate.parlam.kz/
سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ دەپۋتاتتارى باتىس قازاقستان وبلىسىندا «وڭىردەگى تابيعاتتى جانە جانۋارلاردى قورعاۋ سالاسىنىڭ جاي-كۇيى جانە دە اقبوكەندەردىڭ ورالدىق پوپۋلياتسياسىنىڭ كەيبىر ماسەلەلەرى» تاقىرىبى بويىنشا كوشپەلى وتىرىس وتكىزدى. كوميتەت توراعاسى ءالي بەكتاەۆ جيىن بارىسىندا مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا ءبىزدىڭ ستراتەگيالىق ماقساتىمىز – ەۋرازيا قۇرلىعىنداعى باستى اگرارلىق ورتالىقتىڭ ءبىرى بولۋدى اتاپ وتكەنىن ايتتى.
«پرەزيدەنت الداعى ءۇش جىلدا اگروونەركاسىپ كەشەنىندەگى قايتا وڭدەلگەن ءونىمنىڭ ۇلەسىن 70%-عا دەيىن جەتكىزۋ مىندەتىن العا قويعان بولاتىن. ۇكىمەت پەن جەرگىلىكتى اتقارۋشى ورگاندار بۇل ماقسات پەن مىندەتكە قول جەتكىزۋ ءۇشىن اوك سۋبەكتىلەرىندەگى ءونىمدى قايتا وڭدەۋ ىسىنە بارىنشا قولداۋ كورسەتىپ, قايتا وڭدەۋ ونىمدەرىن وندىرۋگە ىنتالاندىرۋدى ارتتىرۋى ءتيىس. سونداي-اق فەرمەرلىك شارۋاشىلىقتاردىڭ كەدەرگىسىز جۇمىس ىستەۋىنە جاعدايلار جاسالۋى ءتيىس», دەدى ءا.بەكتاەۆ.
كوشپەلى وتىرىستا سەناتورلار باتىس قازاقستان وبلىسىنداعى اقبوكەننىڭ پوپۋلياتسياسىنا قاتىستى پروبلەمالىق ماسەلەلەرگە دە ءمان بەرىپ, جەرگىلىكتى شارۋالاردىڭ جانايقايىن تىڭدادى.
دەپۋتاتتار كەزدەسۋدىڭ ماقساتى – حالىقپەن, ەكولوگتارمەن جانە ساراپشىلارمەن ءوزارا ءىس-قيمىلدا بارلىق اسپەكتىلەردى ەسكەرە وتىرىپ, بار پروبلەمالاردى بىرلەسىپ شەشۋگە تىرىسۋ ەكەنىن اتاپ ءوتتى.
شاراعا وبلىس اكىمى ناريمان تورەعاليەۆ, اۋىل شارۋاشىلىعى, ەكولوگيا جانە تابيعي رەسۋرستار مينيسترلىكتەرىنىڭ وكىلدەرى, ۇەۇ جانە وبلىستىق ءماسليحات دەپۋتاتتارى قاتىستى.
كوشپەلى وتىرىس قورىتىندىسى بويىنشا سەناتورلار ۇكىمەتكە جولداناتىن ۇسىنىستار ازىرلەنىپ جاۋاپتى مينيسترلىككە جولداناتىنىن جەتكىزدى.
