ۋچاسكەلىك بەكەت قاجەتتى قۇرال-جابدىقتارمەن تولىق قامتاماسىز ەتىلگەن. مۇندا ۋچاسكەلىك پوليتسيا, كامەلەتكە تولماعاندار ىستەرى جونىندەگى ينسپەكتورلارمەن قاتار, كوشى-قون قىزمەتى, اكىمشىلىك پراكتيكا, پروباتسيا قىزمەتكەرلەرىنىڭ جۇمىس, دەمالىس ورىندارى قاراستىرىلعان. ەرىكتى كومەكشىلەرگە ارنالعان كابينەت, ازاماتتاردى قابىلداۋ بولمەسى, انا مەن بالا بولمەسى دە بار. مۇمكىندىگى شەكتەۋلى تۇلعالارعا كەدەرگىسىز كىرۋگە جاعدايلار جاسالعان, ونىڭ ىشىندە ارنايى جابدىقتالعان سانيتارلىق توراپتار دا بار. عيمارات تولىعىمەن بەينەباقىلاۋ جۇيەسىمەن قامتىلعان. ىشكى ىستەر ءمينيسترى ەرجان سادەنوۆ, تۇركىستان وبلىسىنىڭ اكىمى دارحان ساتىبالدى, تۇركىستان وبلىسى پوليتسيا دەپارتامەنتىنىڭ باستىعى مۇرات قابدەنوۆ جاڭا بەكەتتىڭ جۇمىسىمەن تانىسىپ, جەرگىلىكتى تۇرعىندارمەن جۇزدەستى. «مەملەكەت باسشىسى قاسىم-جومارت كەمەل ۇلى توقاەۆتىڭ «ادىلەتتى قازاقستان» قۇرۋ تۋرالى يدەياسىنىڭ نەگىزگى ماقساتى – ەلدىڭ تۇراقتىلىعى مەن قاۋىپسىزدىگىن قامتاماسىز ەتۋ. قوعامنىڭ مۇددەسى مەن تالاپ-تىلەگىن ەسكەرە وتىرىپ, وسى ماقساتتا جۇمىلا ارەكەت ەتۋىمىز قاجەت. بۇل جاۋاپتى ءىس تىكەلەي قۇقىق قورعاۋ سالاسى قىزمەتكەرلەرىنىڭ ادال ەڭبەگى ارقىلى جۇزەگە اسادى. سوندىقتان پوليتسيانىڭ كەدەرگىسىز قىزمەت ەتۋىنە اكىمدىك تاراپىنان بارلىق قولداۋ كورسەتىلىپ جاتىر», دەدى وبلىس اكىمى دارحان ساتىبالدى.
وڭىردە قوعامدىق قاۋىپسىزدىكتى قامتاماسىز ەتۋ ماسەلەسىنە كۇش سالىنعان. اتاپ ايتقاندا, قوعامدىق ءتارتىپتى ساقتاۋعا ءوز ۇلەسىن قوسۋ ءۇشىن «ۇلتتىق ۇلاننىڭ» اسكەري ءبولىمىن قۇرۋ قولعا الىندى. ۇلاندىقتاردى ورنالاستىرۋ ءۇشىن تۇركىستان قالاسىنان ارنايى عيمارات بەلگىلەنىپ, قۇرىلىس جۇمىستارى ءجۇرىپ جاتىر. سونداي-اق بيىل پوليتسيا دەپارتامەنتىنىڭ جاڭا عيماراتى پايدالانۋعا بەرىلدى. دەپارتامەنت جانىنان جەدەل باسقارۋ ورتالىعى اشىلدى. پوليتسيا قىزمەتكەرلەرىنە بىلتىر 252 جاڭا كولىك تابىستالسا, بيىل تاعى دا 30 اۆتوكولىك الىندى.
