قاراپايىم ەڭبەك ادامىن ناسيحاتتاۋعا ارنالعان مەرەكە اياسىندا شىمكەنتتە دە ءبىراز ءىس-شارا ۇيىمداستىرىلادى. بۇل تۋرالى مەملەكەتتىك ەڭبەك ينسپەكتسياسى باسقارماسىنىڭ باسشىسى باۋىرجان قالجانوۆ ارنايى بريفينگتە مالىمدەدى.
«مينيسترلىك تاراپىنان 2023 جىلى 28 تامىزدا ەڭبەك كۇنىن مەرەكەلەۋ بويىنشا ءىس-شارالار جوسپارى بەكىتىلگەن. وسىنىڭ اياسىندا 21 قىركۇيەكتە «ەڭبەك جولى» كونكۋرسىنىڭ وڭىرلىك كەزەڭىنىڭ جەڭىمپازدارى, ەڭبەك ارداگەرلەرى, ءوندىرىس وزاتتارى ماراپاتتالادى. ال 15 قىركۇيەكتەن باستاپ ازاماتتاردىڭ بارلىق ساناتىنا, ونىڭ ىشىندە مۇگەدەكتىگى بار ادامدارعا, جۇمىسسىز جاستارعا جۇمىسقا ورنالاسۋعا جاردەمدەسۋ بويىنشا بوس ورىندار جارمەڭكەلەرى, اشىق ەسىك كۇندەرى ۇيىمداستىرىلادى. سونداي-اق تۇرعىنداردى 16, 17 قىركۇيەك كۇندەرى ا.س.پۋشكين اتىنداعى كىتاپحانادا «ەڭبەك گالەرەياسى» فوتوكورمەسىنە شاقىرامىز. 20 قىركۇيەكتەن باستاپ كينوتەاترلار مەن كينوزالداردا ەڭبەك ادامدارى تۋرالى كوركەم جانە دەرەكتى فيلمدەر كورسەتىلەدى. «مەنىڭ جەتىستىگىم – مەنىڭ ناتيجەم» ۇرانىمەن «ەڭبەك كۇنىنە» ارنالعان سپورتتىق ءىس-شارالار دا مەرەكە كوركىن قىزدىرا تۇسەدى», دەدى ب.قالجانوۆ
ونىڭ ايتۋىنشا, سونىمەن قاتار #EnbekEri حەشتەگى بويىنشا ەڭبەك ادامدارى تۋرالى ەڭ ۇلگىلى اڭگىمەلەر بويىنشا ونلاين بايقاۋ ەڭبەك كۇنى قارساڭىندا قورىتىندىلانادى.
وسىدان ءبىراز ۋاقىت بۇرىن «ەڭبەك جولى» كونكۋرسىنىڭ وتەتىنى حابارلانعان ەدى. كونكۋرس ەرەجەسىنىڭ تالاپتارىنا سايكەس ۇمىتكەرلەر بايقاۋدىڭ وڭىرلىك دەڭگەيىندە ىرىكتەلدى. سونىڭ ناتيجەسىندە كونكۋرسقا قاتىسۋعا 38 ادام ءوتىنىش ءبىلدىردى. ونىڭ ىشىندە ۇمىتكەرلەر «ۇزدىك ەڭبەك اۋلەتى», «جۇمىس ىستەيتىن جاستاردىڭ ۇزدىك تالىمگەرى», ء«وندىرىستىڭ ۇزدىك جاس قىزمەتكەرى» اتالىمدارى بويىنشا باق سىناسادى.
قازىرگى ۋاقىتتا اتالعان كونكۋرس قورىتىندىلانىپ, جەڭىمپازدارى انىقتالدى. سىننان سۇرىنبەي وتكەندەرگە 21 قىركۇيەكتە ءدال ەڭبەك كۇنى مەرەكەسىندە سىي-سياپاتتار تابىستالادى.
«وسى رەتتە قالا تۇرعىندارى مەن قوناقتارىن ەڭبەك كۇنىنە ارنالعان ءىس-شارالارعا قاتىسۋعا شاقىرامىز. جانە دە كاسىپورىندار مەن مەكەمە باسشىلىقتارى سول كۇنى جۇمىسكەرلەرىن مەرەكەمەن قۇتتىقتاپ, ەڭبەك كۇنىن ءار ۇجىم ءوز دەڭگەيىندە اتاپ وتسە يگى بولار ەدى», دەپ ءسوزىن تۇيىندەدى باس ەڭبەك ينسپەكتورى.
شىمكەنت
