2024 جىلى ەلىمىزگە چەحيادان «پرجەۆالسكي جىلقىسىنىڭ» (ولكەتانۋشىلار, تاريحشىلار ونى ناعىز قۇلان دەسەدى) العاشقى لەگى اكەلىنبەك. ولار وتاندىق جانۋارلار رەينترودۋكتسياسى (جابايى تابيعاتقا ورالۋ) جوباسىنا قاتىساتىن بولادى. چەحيانىڭ قورشاعان ورتانى قورعاۋ مينيسترلىگى جىلقىلاردى ەلىمىزگە جەتكىزۋدى پراگا حايۋاناتتار باعى ارقىلى جۇزەگە اسىرادى.
جىلقىلاردى رەينترودۋكتسيالاۋعا قوستاناي وبلىسىنىڭ «التىن دالا» مەملەكەتتىك تابيعي رەزەرۆاتىنىڭ اۋماعى تاڭدالعان. ايتا كەتەيىك, ەۋروپادان 40 «پرجەۆالسكي جىلقىسىن» تاسىمالداۋ جوسپارلانىپ وتىر.
حح عاسىردىڭ باسىنا دەيىن «پرجەۆالسكي جىلقىلارى» ەۋروپانىڭ ورماندى دالالارىندا, جازىقتار مەن جارتىلاي شولدەرىندە, قازاقستان مەن باتىس ءسىبىردىڭ وڭتۇستىگىندەگى دالالاردا جانە ءىشىنارا ورماندى القاپتاردا كەڭ تارالعانى بەلگىلى.
قازىر الەمدە حح عاسىردىڭ باسىندا جوڭعاريادا اۋلانعان ءبىر ءۇيىر جىلقىدان شىققان ەكى مىڭعا جۋىق اسىل تۇقىمدى «پرجەۆالسكي جىلقىسى» بار. اتالعان جىلقىلاردىڭ تۇقىمى حايۋاناتتار باعىندا جانە الەمدەگى قورىقتاردا ءوسىرىلىپ كەلەدى.
بۇگىندە «پرجەۆالسكي جىلقىسىن» رەينترودۋكتسيالاۋ باعدارلامالارى موڭعوليادا, قىتايدا, رەسەيدىڭ ورىنبور وبلىسىندا جۇمىس جۇزەگە اسقان. 1990-جىلدارى ەكسپەريمەنت ءۇشىن چەرنوبىل ايماعىنا 30-عا جۋىق «پرجەۆالسكي جىلقىسى» جىبەرىلىپ, ولار جىلدام كوبەيە باستاعانىن ايتا كەتكىمىز كەلەدى.
