– ايدار مۇتالىك ۇلى, ءوزىڭىز باسقاراتىن وقۋ ورنىندا مامان دايارلاۋدىڭ قانداي ەرەكشەلىكتەرى بار؟
– جالپى, ءبىزدىڭ اكادەميا ىشكى ىستەر ورگاندارىن قىلمىسقا قارسى ءىس-قيمىل جانە قوعامدىق ءتارتىپ پەن قاۋىپسىزدىكتى قامتاماسىز ەتۋدە وزىق ءبىلىم مەن كاسىبي قۇزىرەتتىلىككە يە جاڭا فورماتتاعى جوعارى كاسىبي كادرلارمەن تولىقتىرۋدىڭ جەتەكشى ورتالىعىنا اينالۋى ءۇشىن بارلىق كۇش-جىگەرىن جۇمساپ جاتىر. بۇل جاعدايدا تۇلەكتەردىڭ بويىندا اتالعان قاسيەتتەردى دامىتۋعا كوپ جاعىنان سپورت كومەكتەسەتىنىن ايتقىم كەلەدى. سەبەبى سپورتپەن شۇعىلدانۋ ارقىلى ادام, ەڭ الدىمەن, ءوز دەنە مۇشەسىنىڭ قوزعالىسىن باسقارۋ قابىلەتىن جەتىلدىرىپ, نىعايتاتىنى انىق. سونداي-اق سپورت فيزيكالىق قاسيەتتەردى دامىتۋمەن قاتار, ادامنىڭ ينتەللەكتۋالدىق قابىلەتىن دە قالىپتاستىرادى. وسىعان دالەل رەتىندە شاحمات ويىنىن ايتار ەدىم. بۇل ويىن – ينتەللەكت پەن ستراتەگيالىق ويلاۋدى دامىتۋعا ارنالعان سپورت ءتۇرى. شاحمات ويىنى تەك ينتەللەكت پەن لوگيكانى عانا ەمەس, پوليتسەيلەر ءۇشىن زەيىندى شوعىرلاندىرۋ, ءوز ستراتەگياسىن تالداۋ جانە ازىرلەۋ, بايسالدىلىقتى جوعالتپاۋ, ءارتۇرلى قيىن جاعدايدا تەز جانە دۇرىس شەشىم قابىلداۋ, اقىلعا قونىمدى تاۋەكەلگە بارۋ نەمەسە تاۋەكەلدەن باس تارتۋ سياقتى ماڭىزدى قاسيەتتەردى دامىتۋعا كومەكتەسەدى.
– ءسوزىڭىز اۋزىڭىزدا, شاحمات ويىنى اكادەميادا جاقسى دامىعانىن بىلەمىز. سول جايىندا از-كەم توقتالىپ وتسەڭىز...
– بيىل اكادەميادا شاحمات سپورتىن ناسيحاتتاۋ ءۇشىن بىرقاتار ءىس-شارا وتكىزدىك. ماسەلەن, العاش رەت اكادەميادا قازاقستاندىق شاحمات فەدەراتسياسى جانە «Freedom Holding Corp» كومپانياسىمەن بىرلەسىپ, قۇقىق قورعاۋ, ارناۋلى مەملەكەتتىك ورگانداردىڭ قىزمەتكەرلەرى مەن اسكەري قىزمەتشىلەر اراسىندا شاحماتتان ىشكى ىستەر ءمينيسترىنىڭ كۋبوگى رەسپۋبليكالىق ءتۋرنيرىن وتكىزدىك. تۋرنيرگە قورعانىس مينيسترلىگىنىڭ, ۇلتتىق ۇلاننىڭ, توتەنشە جاعدايلار مينيسترلىگىنىڭ, ۇلتتىق قاۋىپسىزدىك كوميتەتىنىڭ, ۇقك شەكارا قىزمەتىنىڭ, قارجى مونيتورينگى اگەنتتىگىنىڭ, سىبايلاس جەمقورلىققا قارسى ءىس-قيمىل اگەنتتىگىنىڭ, سونداي-اق ىشكى ىستەر مينيسترلىگىنىڭ وكىلدەرى قاتىستى.
سونداي-اق حالىقارالىق شاحمات كۇنىندە الماتى اكادەمياسىنا باكالاۆريات باعدارلاماسى بويىنشا وقۋعا تۇسەتىن تالاپكەرلەر ءۇشىن تۋرنير ۇيىمداستىردىق. شاحمات ءتۋرنيرى جاستارعا وزدەرىنىڭ زياتكەرلىك دەڭگەيىن كورسەتۋگە مۇمكىندىك بەردى. جۇلدەلى ورىندارعا يە بولعان ءۇش جەڭىمپازدىڭ بارلىعى كونكۋرستىق ىرىكتەۋ ناتيجەلەرى بويىنشا ءبىزدىڭ اكادەمياعا تۇسكەنى نازار اۋدارتادى.
– ينتەللەكتۋالدىق ويىنداردان بولەك, تاعى قانداي سپورت تۇرلەرىنە ەرەكشە ءمان بەرەسىزدەر جانە وسى سالادا قانداي جەتىستىكتەرىڭىز بار؟
– ارينە, ءبىز ۇلتتىق سپورت تۇرلەرىن دامىتۋعا ەرەكشە بەيىلدىمىز. ماسەلەن, بيىل وتان قورعاۋشىلار كۇنىنە ارنالعان قۇقىق قورعاۋ ورگاندارىنىڭ اسكەري جانە ارناۋلى وقۋ ورىندارىنىڭ قىزمەتكەرلەرى اراسىندا قازاق كۇرەسىنەن «قاۋىمداستىق بارىسى» ءتۋرنيرىن وتكىزدىك. سونداي-اق ءىىم م.ەسبولاتوۆ اتىنداعى الماتى اكادەمياسىنىڭ 65 جىلدىعىنا ورايلاستىرىلعان اكادەميانىڭ تۇراقتى قۇرامى اراسىندا «اكادەميا بارىسى» ءتۋرنيرى ءوتتى. بۇل دا – ۇلتتىق سپورتتى دامىتۋداعى ماڭىزدى قادامداردىڭ ءبىرى.
ءبىزدىڭ وقۋ ورنىندا كوپتەگەن تانىمال بوكسشى جۇمىس ىستەپ, ساباق بەردى. قازاقستاننىڭ ەڭبەك سىڭىرگەن جاتتىقتىرۋشىسى, كاسىپقوي بوكسشى, IBA نۇسقاسى بويىنشا الەم چەمپيونى, WBO نۇسقاسى بويىنشا قۇرلىقارالىق الەم چەمپيونى بولعان ايتۋلى ازاماتتار جانە تاعى باسقا سپورت شەبەرلەرى قىزمەت اتقاردى. ەرەكشە توقتالاتىن دۇنيە – اكادەميادا وليمپيادالىق ستاندارتتاعى بوكس رينگى بار. مۇندا حالىقارالىق, رەسپۋبليكالىق جانە وڭىرلىك جارىستار وتكىزىلەدى. ماسەلەن, وتكەن جىلى ءبىز ونى الماتى قالاسى كۇنىنە ارنالعان كادەتتەر مەن جاسوسپىرىمدەر اراسىندا كيكبوكسينگتەن الماتى قالاسىنىڭ چەمپيوناتىن وتكىزۋدى ۇسىندىق.
قولدانبالى سپورت تۇرلەرىنەن باسقا, ءبىز كوماندالىق جۇمىس پەن ويلاۋدى, ستراتەگيا داعدىلاردى, ۇيلەستىرۋ مەن ەپتىلىكتى, كوممۋنيكاتيۆتى جانە كوماندالىق رۋحتى دامىتاتىن سپورت تۇرلەرىن قولداۋعا جانە دامىتۋعا تىرىسىپ جاتىرمىز. ماسەلەن, كەرلينگتى ايتۋعا بولادى. مۇنى «مۇزداعى شاحمات» دەپ تە اتايدى, ويتكەنى كەرلينگ فيزيكالىق تۇرعىدان عانا ەمەس, سونىمەن قاتار نازار اۋدارۋ, ۇيلەستىرۋ, رەاكتسيا جىلدامدىعى, ەرەكشە ويلاۋ, ستراتەگيا قۇرۋ جانە جەدەل شەشىم قابىلداۋ قابىلەتتەرىن دامىتادى. مىنە, وسىنداي سپورتتىڭ تۇرىنەن ءوز كوماندامىز قۇرىلدى جانە بۇل – بىرەگەي كوماندا. ويتكەنى بۇل – قازاقستاننىڭ اسكەري, ارنايى جانە قۇقىق قورعاۋ ورگاندارى اراسىنداعى كەرلينگ بويىنشا جالعىز كوماندا.
سونداي-اق كەيىنگى ۋاقىتتا اكادەميادا پەتانك سياقتى سپورت ءتۇرى قارقىندى دامىپ كەلەدى. بۇل سپورت ءتۇرىن دۇنيەجۇزىلىك وليمپيادا كوميتەتى مويىندايدى جانە بۇكىل الەمدە كەڭ تارالعان سپورتتىڭ ءتۇرى. پەتانكتى جەكە نەمەسە كوماندادا ويناۋعا بولادى, بۇل ستراتەگيالىق ويلاۋ مەن ينتەللەكتى, توزىمدىلىك پەن ۇيلەستىرۋدى, كوماندالىق جانە كوممۋنيكاتسيالىق داعدىلاردى دامىتادى. اكادەميادا بارلىق حالىقارالىق ستاندارت بويىنشا جاسالعان جانە قازاقستان پەتانك فەدەراتسياسىنىڭ سەرتيفيكاتىن العان پەتانك ويناۋعا ارنالعان الاڭ بار. بيىل 8 شىلدەدە «دينامو» فسو قب-مەن بىرلەسىپ, پەتانكتان العاش رەت ىشكى ىستەر ءمينيسترىنىڭ كۋبوگىن وتكىزدىك. جارىسقا جۋرناليستەر مەن پوليتسيا قىزمەتكەرلەرىنەن قۇرالعان كوماندالار قاتىستى.
اكادەميا قىزمەتكەرلەرىنىڭ سپورتتا جەتكەن جەتىستىگى كوپ. بۇگىندە اكادەميادا سامبو, بوكس, ەركىن كۇرەس, قازاقشا كۇرەس, ارمرەستلينگ, پاۋەرليفتينگ, ۆولەيبول, كەرلينگ, پەتانك جانە باسقا دا سپورت تۇرلەرى بويىنشا 15 سپورت شەبەرى جانە 24 سپورت شەبەرلىگىنە ۇمىتكەر بار. جالپى, اكادەميا قابىرعاسىندا الەم جانە ازيا چەمپيوناتتارىنىڭ, حالىقارالىق جانە رەسپۋبليكالىق جارىستاردىڭ مىڭنان اسا جەڭىمپازدارى مەن جۇلدەگەرلەرى دايىندالدى. اكادەميا قىزمەتكەرلەرى ءتۇرلى جارىسقا بەلسەندى تۇردە قاتىسىپ تۇرادى. مىسالى, جاقىندا دەنە شىنىقتىرۋ دايارلىعى كافەدراسىنىڭ باستىعى ك.مىرزابەكوۆ الماتى قالاسىندا دزيۋدودان وتكەن ارداگەرلەر اراسىنداعى ەل چەمپيوناتىنىڭ جەڭىمپازى اتاندى. وقۋ ورنىندا كاسىبي دەڭگەيدە دە, اۋەسقوي دا كوپتەگەن قۇراما كوماندالار بار, اتاپ ايتقاندا, اكادەميا قىزمەتكەرلەرى فۋتبول, ۆولەيبول, شاحمات, پەتانك, تاعى باسقا سپورت تۇرلەرى بويىنشا جىل سايىن الماتى مارافونىنا دا بەلسەندى قاتىسادى.
– اڭگىمەڭىزگە راحمەت.
