فوتو: istockphoto.com
جاڭا سەرۆيس جەكە كاسىپكەرلەر مەن جەكە پراكتيكامەن اينالىساتىن ازاماتتارعا ارنالعان. قىزمەت ءوتىنىش بەرۋ پروتسەسىن تولىق تسيفرلاندىرىپ, مەملەكەتتىك كىرىستەر ورگاندارىنا جەكە جۇگىنۋ قاجەتتىلىگىن جويدى. پايدالانۋشىلار ءوتىنىم بەرۋ كەزەڭدەرىن قوسىمشا ارقىلى ءوتىپ, ونىڭ قارالۋ مارتەبەسىن ونلاين باقىلاي الادى.
شىلدەدەن باستاپ كاسىپكەرلەرگە شەتەلگە شىعۋعا شەكتەۋ قويىلۋى مۇمكىن
قىزمەتتى پايدالانۋ ءۇشىن قولدانۋشى eGov Business قوسىمشاسىنا كىرىپ, «بيزنەستى تىركەۋ جانە توقتاتۋ» ءبولىمى ارقىلى «جەكە كاسىپكەرلىك قىزمەتىن توقتاتۋ» سەرۆيسىن تاڭداۋى قاجەت. ودان كەيىن سالىق ءوتىنىشىنىڭ ساناتى بەلگىلەنىپ, مەملەكەتتىك كىرىستەر ورگانىنىڭ كودى تاڭدالادى. سونداي-اق دەرەكتەردى وڭدەۋگە كەلىسىم بەرىپ, ءوتىنىمدى Face ID, Touch ID نەمەسە كود ارقىلى راستاۋ كەرەك.
ءوتىنىم قارالعاننان كەيىن ناتيجە قوسىمشادا كورسەتىلەدى. ەگەر ءراسىم ءساتتى اياقتالسا, جۇيەدە جك قىزمەتىنىڭ رەسمي تۇردە توقتاتىلعانىن بىلدىرەتىن «وڭدەلدى» مارتەبەسى شىعادى.
ۇلتتىق اقپاراتتىق تەحنولوگيالار اق باسقارما توراعاسى داۋلەت بەكمانوۆ قازىر قوسىمشادا شاعىن جانە ورتا بيزنەسكە ارنالعان مەملەكەتتىك قىزمەتتەردىڭ اۋقىمى كەڭەيىپ جاتقانىن ايتتى. ونىڭ سوزىنشە, بيزنەستىڭ تىركەلۋدەن باستاپ جابىلۋىنا دەيىنگى نەگىزگى كەزەڭدەرى تولىق تسيفرلىق فورماتقا كوشىرىلگەن.
ايتا كەتەيىك, eGov.kz پورتالىندا بۇعان دەيىن دە كاسىپكەرلىك قىزمەتتى توقتاتۋعا قاتىستى بىرنەشە تسيفرلىق سەرۆيس ىسكە قوسىلعان. سونىڭ ءبىرى – 2017 جىلدان بەرى قولجەتىمدى «زاڭدى تۇلعالاردى تاراتۋ» قىزمەتى. وسى ۋاقىتقا دەيىن بۇل سەرۆيس 35 مىڭنان استام رەت پايدالانىلعان.
جوبانى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, ۇلتتىق اقپاراتتىق تەحنولوگيالار اق جانە قارجى مينيسترلىگىنىڭ مەملەكەتتىك كىرىستەر كوميتەتى بىرلەسىپ جۇزەگە اسىرعان.
