فوتو: magnific.com
ساندىقتاۋ اۋدانىنداعى بوبەكجاي-باقشالاردىڭ بىرىندە بولعان جاعداي الەۋمەتتىك جەلىدە جاريالانعاننان كەيىن كوپشىلىكتىڭ نازارىن اۋداردى. بالاسىنىڭ بالاباقشادا قورلىق كورگەنىن ايتقان اتا-انانىڭ جازباسىنان سوڭ اۋداندىق ءبىلىم ءبولىمى تەكسەرىس جۇرگىزگەن.
تەكسەرۋ قورىتىندىسى بويىنشا تاربيەشى قىزمەتىنەن بوساتىلدى. سونىمەن قاتار, باقىلاۋدى ءتيىستى دەڭگەيدە ۇيىمداستىرماعانى ءۇشىن بالاباقشا مەڭگەرۋشىسىنە, شتاتتاعى پسيحولوگكە جانە تاربيەشىنىڭ كومەكشىسىنە قاتاڭ سوگىس بەرىلدى.
ءىستىڭ باستى ءتۇيىنى – قۇقىق قورعاۋ ورگاندارىنىڭ ارالاسۋى بولدى. بالاعا قاتىگەزدىك كورسەتۋ دەرەگى بويىنشا قىلمىستىق ءىس قوزعالىپ, سوتقا دەيىنگى تەرگەۋ باستالعان.
اقمولا وبلىستىق پوليتسيا دەپارتامەنتى تەرگەۋ امالدارىنىڭ جالعاسىپ جاتقانىن مالىمدەدى.
«قازىرگى ۋاقىتتا كامەلەتكە تولماعان بالانى تاربيەلەۋ مىندەتتەرىن تيىسىنشە ورىنداماۋ فاكتىسى بويىنشا سوتقا دەيىنگى تەرگەۋ جۇرگىزىلىپ جاتىر. وقيعانىڭ بارلىق ءمان-جايىن جان-جاقتى ءارى وبەكتيۆتى انىقتاۋعا باعىتتالعان قاجەتتى تەرگەۋ ارەكەتتەرى جۇزەگە اسىرىلۋدا. تەرگەۋ ناتيجەسى بويىنشا قازاقستان رەسپۋبليكاسىنىڭ قولدانىستاعى زاڭناماسىنا سايكەس پروتسەسسۋالدىق شەشىم قابىلدانادى», دەدى اقمولا وبلىسى پد ءبولىمىنىڭ اعا ينسپەكتورى اسەم ءابدىراحمانوۆا.
رەزونانس تۋدىرعان ءىس وبلىستىق پوليتسيا دەپارتامەنتى باسشىلىعىنىڭ جانە ۋاكىلەتتى ورگانداردىڭ ەرەكشە باقىلاۋىنا الىنعان. وڭىرلىك ءبىلىم باسقارماسى مۇنداي جاعدايلاردىڭ الدىن الۋ ءۇشىن اۋدان اۋماعىنداعى بارلىق مەكتەپكە دەيىنگى مەكەمەدە قوسىمشا تەكسەرىس جۇرگىزىلەتىنىن حابارلادى.
ساتباەۆتا بالاعا بۋللينگ جاساعان بالاباقشا قىزمەتكەرى جۇمىستان قۋىلدى
