مەردىگەرلەردىڭ جاۋاپسىزدىعىنا قاتىستى سوراقىلىقتىڭ كوكەسىن بىلتىر كورگەنبىز. جاڭارتۋ باعدارلاماسىنا ىلىككەن 46 مەكتەپتىڭ 17-سىندە جوندەۋ جۇمىستارى ۋاقتىلى اياقتالماي, كوپتەگەن اۋىلدىڭ وقۋشىلارى كۇزدە مادەنيەت ءۇيى مەن باستاۋىشقا ارنالعان اياداي عانا عيماراتتاردا ءبىلىم الۋعا ءماجبۇر بولعان. ءوڭىردىڭ ءبىلىم بەرۋ باسقارماسى جوندەۋدى مەرزىمىندە اياقتاي الماعان مەردىگەرلەر بويىنشا سوتقا 20-دان اسا تالاپ-ارىز بەرگەنىمەن, جاعدايدى دۇرىستاي المادى. كەيبىر ءبىلىم بەرۋ ۇيىمىنداعى جۇمىستار قىسقا دەيىن جالعاسقان.
جەرگىلىكتى جاۋاپتى ورگاندار بىلتىرعى جاعدايدان ءتيىستى ساباق الماعانداي. قازىردىڭ وزىندە وبلىس بويىنشا ءۇش بىردەي مەكتەپتەگى كۇردەلى جوندەۋ جۇمىستارى كەستەدەن ايتارلىقتاي قالىپ قويعان. جاڭا وقۋ جىلى باستالۋعا ءبىر ايداي ۋاقىت قانا قالعانىن ەسكەرسەك, نىسانداردىڭ مەرزىمىندە تاپسىرىلاتىنىنا كۇمان مول.
شارباقتى اۋدانىنىڭ جاڭاۋىل, حمەلنيتسكي جانە پاۆلودار قالاسىنىڭ №5 مەكتەپتەرىن كۇردەلى جوندەۋگە قازىنادان 340 ملن تەڭگە بولىنگەن ەكەن. بۇل ءۇش جوبا دا كەشىگىپ جاتىر. بۇعان قوسا پاۆلودار اۋدانىنىڭ سىچيوۆكا اتالاتىن ەلدى مەكەنىندەگى جاڭا مەكتەپتىڭ قۇرىلىسى دا كونكۋرستى جەڭىپ العان فيرمانىڭ جاۋاپسىزدىعىنان اقساپ تۇر. ال جەلەزين اۋدانىنىڭ مويسەەۆكا جانە باياناۋىلدىڭ قاراجار اۋىلدارىنداعى جاڭا ءبىلىم بەرۋ وردالارىنىڭ قۇرىلىسى ويداعىداي جۇرگىزىلىپ جاتىر.
وڭىرلىك قارجى باسقارماسىنىڭ باسشىسى جەڭىس شاقاتوۆتىڭ مالىمەتىنشە, پاۆلودار قالاسىندا سالىنىپ جاتقان (جوبا قۇنى – 331 ملن تەڭگە) شاڭعى جانە بياتلون عيماراتىنىڭ قۇرىلىسى, باياناۋىلدىڭ بىرلىك, ەگىندىبۇلاق, ۇزىنبۇلاق اۋىلدارىنا تارتىلىپ جاتقان كوشە جارىقتارى جۇيەسى ۋاقىتىندا اياقتالمايتىنى دا انىقتالىپ وتىر. اقتوعاي اۋدانىنىڭ قاراوبا اۋىلىنداعى جاڭا دەنەشىنىقتىرۋ-ساۋىقتىرۋ كەشەنى مەن باياناۋىلدىڭ جۇمات شانين اتىنداعى ەلدى مەكەنىندەگى ورتالىقتاندىرىلعان اۋىز سۋ جۇيەسى دە بيىل ىسكە قوسىلمايتىنى انىق دەيدى ول.
– 2021 جىلى جۇمات شانينگە سۋ قۇبىرىن تارتۋ بويىنشا مەملەكەتتىك كونكۋرستى «كولساي ستروي» دەگەن كومپانيا ۇتىپ الادى. سوناۋ الماتى قالاسىندا ورنالاسقان بۇل مەردىگەر اقىر اياعى جاۋاپسىزداۋ بولىپ شىقتى. 2021 جىلى بيۋدجەتتەن بولىنگەن 394 ملن تەڭگەنىڭ نەبارى 8,5 ملن تەڭگەسىن يگەرىپ, جۇمىستى تاستاي قاشقان. سونداعى سىلتاۋى – اۋىلدىڭ سول جاق بولىگى ورنالاسقان جەردىڭ توپىراق جىنىسى قاتتى, تاس كوپ, تەحنيكالارىمىز وتە كوپ قيىندىقپەن الىپ جاتىر, بولىنگەن قاراجات جەتپەيدى دەپ جالتاردى. «سۋ قۇبىرىن قايتا قۇرۋ» جوباسىن مەردىگەر قايتا تۇزەتىپ, قاراجات قوسۋدى تالاپ ەتتى. ءسويتىپ, ونىڭ زاردابىن تاعى حالىق تارتىپ, سۋ قۇبىرىن جاڭارتۋ ءىسى تاعى ەكى جىلعا شەگەرىلگەن, دەيدى ج.شاقاتوۆ.
باياناۋىل اۋدانىنىڭ اكىمدىگى بىلتىر كوكتەمدە جوبانى ورتا جولدا قالدىرىپ كەتكەنى ءۇشىن فيرمانى سوتقا بەردى. الايدا پاۆلودار وبلىسىنىڭ اۋدانارالىق سوتى تالاپ-ارىزدى قاناعاتتاندىرۋدان باس تارتىپ, اپەللياتسيالىق شاعىمدى دا كەيىن ىسىرعان. ال «كولساي ستروي» جشس-عا جۇمىستى شىلدە ايىندا جالعاستىرۋعا ءتيىس دەگەن تالون-حابارلاما بەرىلدى. بىراق كومپانيا تاعى ءوز جاۋاپسىزدىعىن كورسەتىپ, جەر قازۋ شارالارىنا تەك 25 قىركۇيەكتە كىرىسەدى. قىس بويى جۇمىسى توقتاپ تۇرعان فيرما بيىل كوكتەمدە تاعى كەشىگىپ باستاعان. سونىڭ سالدارىنان الداعى كۇزدە جوسپارلى سۋ قۇبىرى ىسكە قوسىلمايتىنى بايقالۋدا. اۋىل تۇرعىندارى بيىل تاعى ساپالى اۋىز سۋعا قول جەتكىزە الماي سورى قايناپ وتىر.
