باياناۋىل تۋريستىك ولكە بولعاندىقتان, قازىرگى ۋاقىتتا وڭىردە كولىك ءنوپىرى قالىڭ. بۇل جاققا جول ءجۇرىپ كەلگەندەردىڭ بارلىعى كولىك وتىنىنىڭ جەتىسپەيتىندىگىنە شاعىمدانادى. اۋدان ورتالىعىندا نەبارى ءۇش جانارماي قۇيۋ ستانساسى بار بولسا, «Blue star» مەن «وماروۆ» جك-گە قاراستى بەكەتتەردە بەنزين مۇلدە جوق. تەك «قىزىلتاۋ» بەكەتىندە عانا اي-92 ماركالى بەنزين بەلگىلى ءبىر مولشەرمەن ساتىلىپ جاتىر. ياعني كولىك باسىنا كۇنىنە 15 ليتردەن قۇيىلادى.
«قىزىلتاۋ» جشس وكىلدەرىنىڭ سوزىنە سۇيەنسەك, اي-95 ماركالى بەنزيننىڭ كوزدەن بۇلبۇل ۇشقانىنا ءبىر ايدان استام ۋاقىت وتكەن. پاۆلودار مۇناي-حيميا زاۋىتى وتكەن ايدا جوندەۋگە توقتاعالى اي-92 ماركالى بەنزيندى جەتكىزۋدە ىركىلىستەر پايدا بولىپ, ونىڭ سوڭى تاپشىلىققا ۇلاسقان. قازىر بەكەت باسشىلىعى كولىك وتىنىن امالسىزدان شىمكەنتتەگى زاۋىتتان ساتىپ الىپ وتىر.
«مۇناي وڭدەۋ زاۋىتى جوندەۋگە جابىلۋعا دايىندالا باستاعاندا 1,5 ايعا جەتەتىندەي قور جيناپ العان ەدىك. الايدا قازىرگى كۇنى باياناۋىلعا دەمالۋشىلار كوپ كەلەتىندىكتەن, بەكەتتە تۇك قالماي بارا جاتىر. كۇن سايىن جۇزدەگەن, مىڭداعان كولىك كەزەكتە تۇرادى. ونىڭ ۇستىنە سوڭعى اپتالاردا ءبىزدىڭ بەكەت قانا بەنزين قۇيىپ جاتىر, وزگە ەكەۋى توقتاپ تۇر. امالسىزدان ليميت ەنگىزدىك. كۇنىنە جالپى العاندا شامامەن 10-15 تەكشە مەتر وتىن عانا ساتامىز. كولىك باسى 15 ليتر بەنزين عانا قۇيا الادى. بۇل وتىن جاقىن جەردەگى مايقايىڭ كەنتىنە نەمەسە ەكىباستۇز قالاسىنا دەيىن جەتۋگە مۇمكىندىك بەرەدى. ليميت بولماسا, قورىمىز الدەقاشان تاۋسىلىپ قالار ەدى. شىمكەنتتەگى زاۋىتتان تاسىپ جاتقان كولىك وتىنى جول شىعىنىمەن ەسەپتەگەندە ءبىزدىڭ سەرىكتەستىگىمىز ءۇشىن اسا قىمباتقا تۇسۋدە, ەشقانداي مارجا جوق. ەڭ باستىسى – تۇتىنۋشىلاردىڭ سۇرانىسىن قاناعاتتاندىرۋ. وسى ءبىر-ەكى كۇندە مۇنايدى وڭدەۋگە بەرۋشى كومپانيالاردىڭ ءبىرى ءىرى كولەمدەگى پارتيا جەتكىزىپ بەرەمىز دەپ ۋادە ەتكەن. ەگەر ول ورىندالسا, ءليميتتى الىپ تاستايمىز», دەيدى سەرىكتەستىكتىڭ اتى-ءجونىن اتاعىسى كەلمەگەن وكىلى.
ال وڭىرلىك كاسىپكەرلىك جانە يندۋستريالىق-يننوۆاتسيالىق دامۋ باسقارماسى باسشىسىنىڭ مىندەتىن اتقارۋشى ساعىنىش نۇركىمباەۆ قازىرگى كۇنى ايماقتا اي-92 ماركالى بەنزين بويىنشا تاپشىلىق جوق دەپ وتىر.
«پاۆلودار مۇناي-حيميا زاۋىتى» جوندەۋدەن سوڭعى ءوندىرىسىن جوسپارلانعان مەرزىمنەن 4 كۇنگە ەرتە قوسىپ, شتاتتىق رەجىمدە جۇمىس ىستەپ جاتىر. 1-26 شىلدە ارالىعىندا 14,3 مىڭ توننا بەنزين, 28,3 مىڭ توننا ديزەلدى وتىن وندىرگەن. وسى ارالىقتا كاسىپورىننان سىرتقا 48,8 مىڭ توننا ديزەلدى وتىن, اي-92 ماركالى 17 مىڭ توننا بەنزين جونەلتىلگەن. قازىردىڭ وزىندە جونەلتۋگە ءتيىس بەنزين قالدىعىنىڭ كولەمى 2 مىڭ توننانى قۇرايدى. زاۋىت شيكى مۇنايدى وڭدەۋدى تاۋلىگىنە 15 مىڭ تونناعا دەيىن ۇلعايتتى. ەنەرگەتيكا مينيسترلىگىنىڭ مالىمەتىنە سۇيەنسەك, پاۆلودار وبلىسىنداعى مۇناي بازالارىندا ساقتالىپ تۇرعان اي-92-ءنىڭ قورى – 10 كۇنگە, اي-95 – 8 كۇنگە, ديزەل وتىنى 13 كۇنگە جەتەدى. پاۆلودار قالاسىندا اي-92 بويىنشا 377 توننا بار. قازىرگى بەنزين جەتىسپەۋشىلىگى مۇنايدى وڭدەۋگە بەرۋشى كومپانيالار مەن جەتكىزۋشى فيرمالار اراسىنداعى كەيبىر كەلىسپەۋشىلىكتەردىڭ سالدارى بولۋى مۇمكىن. سەبەبى مۇنداي شاعىمدار ءبىزدىڭ باسقارماعا ءجيى بولماسا دا ءتۇسىپ تۇرادى. ەكىنشىدەن, جانارماي قۇيۋ بەكەتتەرى وزدەرىندە قالعان ەسكى بەنزيندى تالون ارقىلى ساتىپ جىبەرۋگە تالپىنۋدا. الداعى ەكى-ءۇش كۇندە تاپشىلىق ماسەلەسى شەشىلەدى دەپ ويلايمىز», دەيدى ول.
وبلىستا اي-95 ماركالى بەنزيننىڭ سوڭعى ءبىر اي كولەمىندە وتە ازايىپ كەتكەنى دە بايقالىپ وتىر. جاۋاپتى باسقارما وكىلدەرى بۇل ماركاداعى وتىن الەۋمەتتىك مانگە يە بولماعاندىقتان, مۇنايدى وڭدەۋگە بەرۋشىلەر ونىڭ كولەمىن كوبەيتۋگە ىقىلاستى ەمەس دەيدى. سوندىقتان سۇرانىس ارتاتىن بولسا, الداعى ۋاقىتتا ونىڭ ءوندىرىسى دە ۇلعايۋى كەرەك دەپ بولجايدى.
انىعى, پاۆلودارلىق زاۋىتتىڭ جوسپارلى جوندەۋگە ءبىر اي شاماسىنا كىدىرۋى وڭىردەگى جەتىسپەۋشىلىككە سەبەپ بولۋدا. كاسىپورىن توقتاماس بۇرىن جانارماي بازالارىنا جەتكىلىكتى قور جيناپ بەرە الماعان سىندى. وتكەن ماۋسىم ايىندا جۇمىس ساپارىمەن پاۆلودارعا كەلگەن شەندى-شەكپەندىلەر جانارماي قورىمىز جەتكىلىكتى دەپ انت-سۋ ىشكەن. الايدا ءىس جۇزىندە جاعداي باسقاشا ءوربىپ وتىر.
