شىلدەنىڭ 15-ءى كۇنى اباي وبلىسىنىڭ اكىمى نۇرلان ۇرانحاەۆ بورودۋليحا اۋدانىنا بارعان جۇمىس ساپارىنان وقيعا ورنىنا جەدەل جەتىپ, جاعدايمەن تانىستى. دەر كەزىندە قابىلدانعان شەشىمنىڭ ارقاسىندا ءتىلسىز جاۋ جايلاعان اۋماق وقشاۋلاندى. قازىرگى ۋاقىتتا وندا ساقتىق شارالارى كۇشەيتىلگەن.
«شوشقالى» دەمالىس ايماعى تولىقتاي پوليتسيا مەن توتەنشە جاعداي قىزمەتكەرلەرىنىڭ باقىلاۋىندا. بەسقاراعاي اۋدانى اكىمىنىڭ ورىنباسارى نۇرجان اعىباەۆتىڭ ايتۋىنشا, تۇرعىندار ءۇشىن الاڭداۋعا ەش نەگىز جوق.
– «شوشقالى» دەمالىس ايماعىندا ورىن العان ءورت دەر كەزىندە ءسوندىرىلدى. اۋدان اكىمى تالعات مۇراتوۆ قازىر سول جەردە. دەمالىس ايماعىنا كەلۋشىلەر تولىقتاي كوشىرىلدى. ءورت شارپىعان اۋماققا قاتىستى قوسىمشا جاڭا اقپارات جوق. ءتىلسىز جاۋدى اۋىزدىقتاۋعا جەكە قۇرام مەن ءبىر تىكۇشاق اتسالىستى. اۋدانداعى توتەنشە جاعداي ازىرگە كۇشىندە قالىپ تۇر, – دەدى ن.اعىباەۆ.
اتالعان ايماققا بارعان دەمالۋشىلاردىڭ ايتۋىنشا, ءورت 14 شىلدە كەشكىسىن نايزاعاي تۇسكەننەن كەيىن تۇتانعان. «سەمەي ورمانى» مەكەمەسى دە, ءتيىستى ورگاندار دا جاعداي باقىلاۋدا ەكەنىن مالىمدەگەنىمەن, قىزىل جالىننىڭ قاۋىپى ءالى دە جوعارى. سوندىقتان ءورت سوندىرىلگەنىمەن, ول كەز كەلگەن ۋاقىتتا جەلدىڭ كۇشىمەن لاپ ەتە قالۋى مۇمكىن. وسى سەبەپتەن ورماندى ايماق ءجىتى باقىلاۋدا بولعانى ابزال دەسەدى ماماندار.
– بەگەن اۋىلىنان كەلىپ, دەمالۋشىلارعا از-كەم قىزمەت كورسەتىپ, كاسىپ جاساپ ءجۇر ەدىك. مىنا جاعدايدان سوڭ ءبارىمىزدى ول اۋماقتان تولىقتاي شىعاردى. دەگەنمەن جاعداي دۇرىستالعان سوڭ ىسىمە قايتا كىرىسەم دەگەن ءۇمىتىم بار, – دەيدى ءسارۋار ەسىمدى ازامات.
تۇيىندەي ايتقاندا, ءورت ءسوندىرىلىپ, جالىننىڭ جولى كەسىلگەنىمەن, ونىڭ قايتا تۇتانۋى مۇمكىن دەگەن كوزدەرىمەن كۇرەس ءالى دە جالعاسىپ جاتىر. اسىرەسە قاراعايلاردىڭ ۇشار باسىنداعى بۇتالاردان باستالاتىن جالىن جەل ەكپىنىمەن كۇش السا, وتە قاۋىپتى. بۇعان وتكەن ايدا بورودۋليحا اۋماعىنداعى 15 ادامنىڭ ءومىرى مەن 60 مىڭ گەكتار ورماندى جالماعان الاپات ءورتتى ايتساق تا جەتكىلىكتى.
اباي وبلىسى
