ەرتىس اۋدانىندا جالپى ءبىلىم بەرەتىن 25 مەكتەپ بار بولسا, سونىڭ جارتىسىنان كوبى تۋريستىك ساياحاتقا بەلسەنە قاتىستى. بىرلىك نەگىزگى مەكتەبىنىڭ ۇجىمى سلەتكە بارعان بارشا قاتىسۋشىنى قۇشاق جايا قارسى الىپ, ناعىز قازاقى مىنەز تانىتىپ, قوناقجايلىلىق كورسەتتى. ودان ءارى بالالار مەن ۇستازداردى ەلىمىزدىڭ كيەلى جەرلەرىنىڭ قاتارىنا كىرەتىن تۇگەل باتىر زيراتىنا اپارىپ, بابالار رۋحىنا تاعزىم جاسالدى. بىرلىك مەكتەبىنىڭ مۇعالىمى دينارا ومىربەكوۆا بالالارعا تۇگەل باتىردىڭ ءومىر تاريحىنان سىر شەرتتى. ءحVىىى عاسىردا جوڭعار باسقىنشىلارىنا قارسى كۇرەستە قول باستاعان سارداردىڭ ەسىمى پاۆلودار, كوكشەتاۋ, ومبى, اقمولا وبلىستارىنا كەڭىنەن تاراعان. باتىردىڭ توعىز ايەلىنەن تاراعان 16 ۇلدىڭ ۇرپاقتارى اتالعان وڭىرلەردە تۇرادى. ەرتىس اۋدانىنىڭ جەرىندە قورعانكول, نايزا, بوگەنباي, قارامولا, جازى توبە, قالماق مولاسى, مويناق اۋىلى, مويناق كولى, جالاۋلى دەگەن اتاۋلار بار. وسى اتاۋلاردىڭ ءبارى دە – جەرگىلىكتى حالىقتىڭ باسقىنشىلارمەن بولعان سوعىس تاريحىنىڭ كۋاسى.
ودان ءارى كوڭىلدى كۇن ءوز جالعاسىن تاۋىپ, ۇلدار بالىق اۋلاۋ جارىسىنا بەلسەنە كىرىسسە, قىزدار دالادا اس ءپىسىرىپ, وت جاعۋ سايىستارىندا باق سىنادى. سونىمەن قاتار دالا جاعدايىندا العاشقى دارىگەرلىك كومەكتى كورسەتۋ بويىنشا وقۋشىلار سىنعا ءتۇستى. ناعىز تۋريستىك ويىنداردىڭ ءبىرى – «ارقانعا ورمەلەۋ». ءدال وسى ويىندا بالالار وزدەرىنىڭ قانشالىقتى ءتوزىمدى ءارى ەپتى ەكەنىن, سالاماتتى ءومىر سالتىن ۇستانىپ, ۇنەمى سپورتپەن شۇعىلدانىپ جۇرگەنىن دالەلدەدى.
جەڭىمپاز وقۋشىلار مەن قاتىسۋشىلارعا باعالى سىيلىقتار مەن تاتتىلەر بەرىلدى. سلەتكە ەرتىس اۋداندىق ءماسليحاتىنىڭ دەپۋتاتى, بىرلىك اۋىلىنىڭ تۇرعىنى ساعىمباي ۋابوۆ دەمەۋشىلىك جاساعانىن ايتا كەتەيىك.
قوسىمشا ءبىلىم بەرۋ پەداگوگتەرى مەن وقۋشىلار وسى كۇنى ءبىر سەرپىلىپ, تابيعاتپەن ەتەنە ارالاسىپ, ەرەكشە كوڭىلدى بولدى. جايدارلى جازدى ەرتىستىك ورەندەر وسىلاي قىزىقتى وتكىزىپ جاتىر.
نارقۇلان رايحان ۇلى,
قوسىمشا ءبىلىم بەرۋ پەداگوگى
پاۆلودار وبلىسى,
ەرتىس اۋدانى
