ء«تۇرلى مەرەكەلىك ءىس-شارا ۇيىمداستىرىلىپ, الۋان ماراپات تاپسىرىلدى. ۇلتتىق ءباسپاسوزدىڭ قاينار بۇلاعى, باستاۋ كوزى «قازاق» گازەتىنىڭ العاشقى ءنومىرى جارىققا شىققان 2 اقپان – «ۇلتتىق ءباسپاسوز كۇنى» بولىپ بەكىتىلدى. بۇگىن ەلوردامىزدا كەرەمەت جۋرناليستەر ساياباعى اشىلدى. مىنە, بۇگىن جۋرناليستەر دەكاداسىن «تۇمار» ۇلتتىق سىيلىعىمەن قورىتىندىلاعالى وتىرمىز.
وسى ءىس-شارالارعا ۇلكەن قولداۋ كورسەتكەن استانا قالاسى اكىمدىگىنە راحمەت ايتا وتىرىپ, بۇگىنگى «تۇمار» سىيلىعىن استانانىڭ 25 جىلدىعىنا ارناعانىمىزدى اتاپ وتكەن ءجون. وزدەرىڭىزگە ءمالىم, بيىل سەريالدارعا بولەك سىيلىق جاريالاپ, ونى ناۋرىز ايىندا تابىستادىق. سوندىقتان «تۇمار» سىيلىعىنا انيماتسيا, سپورت جۋرناليستيكاسى ەنىپ وتىر», دەدى د.قىدىرالى.
«تۇمار» ۇلتتىق سىيلىعى بايقاۋدىڭ 12 اتالىمى بويىنشا ساراپقا سالىندى. بايقاۋعا بيىل دەرەكتى فيلم, انيماتسيا, سپورت جۋرناليستيكاسى قاتارلى جاڭا اتالىمدار قوسىلدى. بەلگىلى قالامگەر-جۋرناليست كامال سمايىلوۆ, ۇلتتىق انيماتسيا ونەرىنىڭ اتاسى امەن قايدار, سپورت كوممەنتاتورى امانگەلدى سەيتحان اتىنداعى سىيلىقتار تاعايىندالدى.
«وسى ورايلى ءساتتى پايدالانىپ, بارشا ارىپتەسىمە شىن جۇرەكتەن ريزاشىلىعىمدى بىلدىرەمىن. بيىلدىڭ وزىندە الەمدە, ەلىمىزدە كوپتەگەن رەزونانستى وقيعا بولدى. ەلىمىزدە ءتورت ۇلكەن سايلاۋ ءوتتى. توتەنشە جاعدايلارمەن بەتپە-بەت كەلدىك. وسىنىڭ بارىندە جۋرناليستەر قاۋىمى جارعاق قۇلاعى جاستىققا تيمەي ءوز مىندەتتەرىن اتقاردى.
اقپارات سالاسىنىڭ اقيقات ايدىنى ەكەنىن كورسەتىپ جۇرگەن ارىپتەستەرىمىز ءتۇرلى دەباتتار ۇيىمداستىردى. جەدەل اقپارات جەتكىزدى. سونىمەن قاتار تىكەلەي ەفيردەن باسقا دا ساراپتامالىق ماتەريالدار ۇيىمداستىردى. سىزدەرگە وسى ورايلى مەزەتتە تاعى دا ريزاشىلىعىمدى بىلدىرگىم كەلەدى. سونىمەن قاتار «تۇمار» ۇلتتىق سىيلىعى جۋرناليستەر اراسىندا ۇلكەن قىزىعۋشىلىققا يە. بيىلعى بايقاۋعا كەلىپ تۇسكەن وتىنىمدەر سونىڭ ايعاعى», دەپ ءسوزىن قورىتىندىلادى سالا باسشىسى.
بايقاۋدىڭ «ۇزدىك دەرەكتى فيلم» جۇلدەسىنە «ابايدىڭ سوڭعى كۇندەرى» دەرەكتى ءفيلمى لايىق دەپ تانىلدى. فيلم جانە ستسەناري اۆتورلارى – جازۋشى-جۋرناليست قانات تىلەۋحان مەن ادەبيەتشى-عالىم, پۋبليتسيست باعاشار تۇرسىنباي ۇلى. ۇلى ويشىلدىڭ اقىرعى كۇندەرى تۋرالى تاريحي فيلم «حابار» اگەنتتىگىنىڭ تاپسىرىسىمەن ءتۇسىرىلىپ, قازان ايىندا كورەرمەن نازارىنا ۇسىنىلدى.
بۇدان كەيىن قوعام جانە مەملەكەت قايراتكەرى قۋانىش سۇلتانوۆ «ۇزدىك الەۋمەتتىك جوبا» اتالىمىنىڭ سىيلىعىن تابىستادى. ونىڭ ايتۋىنشا, بايقاۋعا ۇسىنىلىپ, ىرىكتەلگەن جۇمىستىڭ قاي-قايسىسى دا ماراپاتقا لايىق.
«تاڭداۋ وتە قيىن بولدى. سول تاڭداۋلىنىڭ تاڭداۋلىسى ىشىنەن شىعاتىن ۇزدىكتەر بار. «وتاندى ءسۇيۋ وتباسىنان باستالادى». ادامعا جاناشىرلىق سەزىم – قوعامعا, ەلگە, جۇرتقا, سونىڭ جاقسىلىعىنا, بەيىمدەلۋىنە, جۇرەك تازالىعى مەن جان, ءتان تازالىعىمەن كەلەتىن اسىل قاسيەت. وسى جاناشىر دەگەن ءبىر عانا سوزبەن ايتىلادى. وسى ءساتتى پايدالانىپ, «ۇزدىك الەۋمەتتىك جوبا» اتالىمىنىڭ جەڭىمپازى «جاناشىر» («جەتىسۋ» تەلەارناسى) باعدارلاماسىنا بۇيىردى», دەدى ق.سۇلتانوۆ.
«ۇزدىك اناليتيكالىق باعدارلاما» اتالىمىن قوعام جانە مەملەكەت قايراتكەرى ساۋىتبەك ابدراحمانوۆ تاپسىردى. قارىمدى قالامگەر سالماقتى ويلى كورەرمەن ساراپتامالىق باعدارلامالاردى كورەتىنىن اتاپ ءوتتى.
«وقيعاعا, قوعامعا باعا بەرۋ, تالداۋ جاساۋ – وتە قيىن. ءارى وي تەرەڭدىگىن ءارى كاسىبي شەبەرلىكتى تالاپ ەتەدى. سوندىقتان وسى اتالىمدى تاپسىرۋ بۇيىرعانىنا قۋانىپ وتىرمىن. وسى ارقىلى بۇگىنگى «تۇماردىڭ» مىنبەرىن پايدالانىپ, تەلەۆيزياعا بايلانىستى ءبىر ويىمدى ايتپاقپىن. بۇكىل ابىروي تۇپتەپ كەلگەندە تەلەجۋرناليستەرگە تيەدى. مينيستر دارحان قۋاندىق ۇلى جاقسى جاڭالىقتى جەتكىزدى. استانادا جۋرناليستەر ساياباعى اشىلدى. ول ساياباق «ەگەمەن قازاقستان» كوشەسىندە اشىلدى. «Egemen Qazaqstan» گازەتىنىڭ رەداكتسياسى الدىندا اشىلدى. ەندى, سول جەردە ەسكەرتكىش كىمگە قويىلدى دەپ ويلايسىزدار؟ ەسكەرتكىش تەلەجۋرناليسكە قويىلدى. ساياباقتا ميكروفون ۇستاعان قىز بەن كامەرا ۇستاعان جىگىتتىڭ ادەمى ءمۇسىنى تۇر. بۇل دا تەلەجۋرناليستەرگە كورسەتىلگەن قۇرمەتتىڭ بەلگىسى», دەدى س.ابدراحمانوۆ.
وسىلايشا, «Qazaqstan» تەلەارناسىنىڭ «Apta» اقپاراتتىق-ساراپتامالىق باعدارلاماسى «ۇزدىك اناليتيكالىق باعدارلاما» اتالىمى بويىنشا «تۇمار» ۇلتتىق سىيلىعىن يەلەندى. «Apta» باعدارلاماسى ءار جەكسەنبى 20:00-دە تىكەلەي ەفيرگە شىعادى. باعدارلاما جۇرگىزۋشىسى – البينا ءاشىم.
سونداي-اق بايقاۋدا «ۇزدىك توك-شوۋ» اتالىمىنىڭ جەڭىمپازدارى انىقتالدى. ونى سەنات دەپۋتاتى بيبىگۇل جەكسەنباي تابىستادى.
«بۇگىن – جىل سايىن اسىعا كۇتەتىن ءدۇبىرلى توي. ءبارىڭىزدى وسى تويدا كورگەنىمە اسا قۋانىشتىمىن. ەڭ ءبىرىنشى, بارشاڭىزدى ەلوردامىزدىڭ 25 جىلدىعىمەن قۇتتىقتايمىن. شىنى كەرەك, وسى زالدا وتىرعانداردىڭ كوبى 25 جىل بۇرىن مۇندا بولماعان دا شىعار. ارقايسىمىز ءبىر شابادانىمىزدى قۇشاقتاپ, استاناعا كەلگەنىمىز ەسىمىزدە. جۋرناليستەردىڭ ەلوردا دامۋىنا قوسقان ۇلەسى زور. ارقايسىمىزدىڭ جاساعان رەپورتاجىمىز ارقىلى ەلىمىزدىڭ تۇكپىر-تۇكپىرىندەگى باۋىرلارىمىز, اعايىندارىمىز استاناعا اسىققانى راس. ەندەشە, بۇل توي – بارىمىزگە ورتاق توي», دەدى ب.جەكسەنباي.
«ۇزدىك توك-شوۋ» اتالىمى «Qazaqstan» تەلەارناسىنىڭ «1001 ءتۇن» جوباسىنا تاپسىرىلدى. باعدارلامادا قوعامدا رەزونانس تۋدىرعان وقيعالار تالقىلانىپ, كۇننىڭ ەڭ وزەكتى وقيعاسى بويىنشا اقپاراتتاردىڭ انىق-قانىعى كۋاگەرلەر, رەسمي وكىلدەر مەن ارنايى ماماندار ارقىلى جەتكىزىلەدى. سونىمەن قاتار ستۋديادا ءتۇرلى سالا بويىنشا تۇلعالارمەن ەركىن سۇحبات جۇرگىزىلەدى. باعدارلاما جۇرگىزۋشىلەرى – عالىمجان كەڭشىلىك پەن ايگەرىم سەيفوللا. حابار دۇيسەنبى-بەيسەنبى كۇندەرى 23:25-تە تىكەلەي ەفيرگە شىعادى.
«Balapan» تەلەارناسىنىڭ «دارىگەر دانا» مۋلتحيكاياسى «ۇزدىك انيماتسيالىق فيلم» اتاندى. جوبا «تۇمار» ۇلتتىق تەلەۆيزيالىق بايگەسىنىڭ امەن قايدار اتىنداعى ارنايى جۇلدەسىن يەلەندى. «ۇزدىك انيماتسيالىق فيلم» اتالىمىنىڭ نومينانتتارى قاتارىنا «قازاقستان» تەلەراديوكورپوراتسياسىنىڭ ءتورت بىردەي جوباسى ەندى. ۇمىتكەرلەر قاتارىندا «دارىگەر دانا» مۋلتحيكاياسىنان وزگە, «Balapan» ارناسىنىڭ تاپسىرىسىمەن تۇسىرىلگەن «توقتى مەن سەركە», «ويىنشىقتار» جانە «Jambyl» تەلەارناسىنىڭ «ەشكىم دە, ەشتەڭە دە ۇمىتىلمايدى» انيماتسيالىق تۋىندىلارى بولدى.
جۋرناليست, كوممەنتاتور ەسەي جەڭىس ۇلى «ۇزدىك سپورت كوممەنتاتورى» اتالىمى بويىنشا «تۇمار» ۇلتتىق سىيلىعىنىڭ امانگەلدى سەيىتحان اتىنداعى ارنايى جۇلدەسىن جەڭىپ الدى.
«تۇمار» ۇلتتىق تەلەۆيزيالىق بايقاۋىندا جۋرناليستەر بيىل العاش رەت «ۇزدىك سپورت كوممەنتاتورى» جانە «ۇزدىك جۋرناليستىك زەرتتەۋ» اتالىمدارى بويىنشا باق سىنادى. ەسەي جەڭىس ۇلىنان بولەك, «Qazsport» تەلەارناسىنىڭ كوممەنتاتورلارى ەرمۇحامەد ماۋلەن مەن دىنمۇحامەد تولەگەنوۆ بايقاۋدىڭ شورت-ليستىنە ەندى.
بۇدان بولەك, «ۇزدىك اقپاراتتىق باعدارلاما» اتالىمى «Atameken Business» تەلەارناسىنىڭ «دنەۆنوي فورمات» باعدارلاماسىنا, «ۇزدىك جۋرناليستىك زەرتتەۋ» اتالىمى «حابار 24» تەلەارناسى «ارنايى رەپورتاج» باعدارلاماسىنا بۇيىردى.
«Jibek Joly» تەلەارناسىنىڭ «تۇنگى ستۋديا» توكشوۋى «ۇزدىك ويىن-ساۋىق باعدارلاماسى», «Caspian News» (اتىراۋ قالاسى) «ۇزدىك ايماقتىق تەلەارنا» اتاندى. ءبىرىنشى ارنا «ەۆرازيا» ارناسىنىڭ ءتىلشىسى ايگەرىم مۇزدىباەۆا «ۇزدىك تەلەجۋرناليست» اتالىمىندا جەڭىسكە جەتتى. «ۇزدىك تەلەجۇرگىزۋشى» اتالىمى سۆەتلانا بۋلاتوۆا («كتك» تەلەارناسى) مەن ەركىن بايعابىل ۇلىنا («حابار 24» تەلەارناسى) بۇيىردى. ارنايى جۇلدە «31 ارنا» تەلەارناسىنا وتاندىق تەلەۆيزيالىق سالانىڭ دامۋىنا قوسقان ۇلەسى ءۇشىن تابىستالدى.
بيىل بايقاۋعا 12 اتالىم بويىنشا 300-گە جۋىق ءوتىنىم كەلىپ تۇسكەن. شورت-ليستكە 48 جۇمىس ەندى. جەڭىمپازدار قازىلار القاسىنىڭ جابىق داۋىس بەرۋى ارقىلى انىقتالدى.
جەڭىمپازدار تەلەۆيزيا سالاسىنداعى ەڭ جوعارى جەتىستىكتەرى ءۇشىن «تۇمار» مۇسىنشەسىنىڭ جانە 1 ميلليون تەڭگە كولەمىندەگى قارجىلاي سىياقىنىڭ يەگەرى اتاندى. ءىس-شاراعا «قازاقستان رترك» اق مەن «حابار» اگەنتتىگى دەمەۋشىلىك جاسادى.
