ادەبيەت دەگەن – protest, ياعني قارسىلىق. اسىرەسە, مەنىڭ ولەڭدەرىم ىشتەگى قارسىلىقتان تۋادى. بىردە كەڭەس وكىمەتى تۇسىندا ورتالىق ازيانى ارالايتىن «وزبەكستان كومسومولى» دەيتىن ۇگىت-ناسيحات پويىزىنا قازاقستاننان ۇلىقبەك ەكەۋمىز شاقىرىلدىق. سودان حيۋانىڭ, مارعۇلاننىڭ كوشەلەرىن قىدىرىپ جۇرسەك, ءبىر وزبەك شالى كەلىپ, ەكەۋمىزدى قۋالاپ مەشىتكە اپارىپ سالدى. كىرسەك, جۇما نامازى وقىلىپ جاتىر ەكەن. جاس كەزىمىز عوي, ناماز وقۋدى دا بىلمەيمىز, ارالارىنا تۇرا قالدىق. ءبىر ءبىرىمىزدى مازاقتاپ مەشىتتەن ىشەك-سىلەمىز قاتىپ, ك ۇلىپ شىعىپ كەلە جاتقانبىز, پارەنجى جامىلعان ءبىر قىزعا جەرگىلىكتى ميليتسيانىڭ قىرعيداي ءتيىپ جاتقانىن كوردىم. قالاي كيىنسە دە, ول قىزدىڭ ءوز حاقى عوي دەپ ويلاعام سوندا. بۇل 1984-1985 جىلدار بولاتىن. ال قازىر قىزدارىمىزدىڭ قاپ-قارا كويلەك كيىپ, ءمولىتىپ-توگىلتىپ العانىن تۇسىنە المايمىن. ول ءارى-بەرىدەن سوڭ قازاقتا جوق نارسە. عافۋر گۇلام دەگەن وزبەكتىڭ جازۋشىسى بولدى. ءبىزدىڭ سابەڭنىڭ, ءسابيت مۇقانوۆتىڭ دوسى. عافۋردىڭ قىزىنىڭ ءوزى بۇگىندە 80-نەن استى. حابارلاسىپ تۇرامىن. عافۇر اكا پارەنجى جامىلعان ايەلدەردىڭ قانداي سۇمدىق ىستەر جاساعانىن جازعان. «سۇم بالا» دەگەن ھىكاسىن وقىڭىز. ءتىپتى, ء«ويتىپ تۇمشالانعانشا, اشىق جۇرگەنى جاقسى ەمەس پە؟!» دەگەن ءتۇيىن دە جاساعان. قىز بالالاردىڭ ورانىپ الىپ جۇرگەنىن قابىلداي المايمىن. ءبىز دىننەن الىسىراق وستىك. دەسە دە, بەكەت اتانىڭ ۇرپاعى بولعاندىقتان, مەن يسلام دىنىنە مىندەتتى تۇردە قۇرمەتپەن قارايمىن, ونىڭ قاعيدالارىن ۇيدە دە, تۇزدە دە ۇستاۋعا تىرىسامىن. دەي تۇرعانمەن, دىنگە باسسىز, كوزسىز كەتكەن جاستاردىڭ «اكە-شەشەم ناماز وقىمايدى» دەپ اتا-اناسىنا قارسى شىعۋى نەمەسە «مەنى تالاق ەتتى» دەپ ايەلدەردىڭ ءبىر كۇيەۋدەن ەكىنشى, ءۇشىنشى كۇيەۋگە كەتە بەرەتىنىن تۇسىنبەيمىن. ول – ءبىزدىڭ قازاقتىڭ ادەپ احلاعىندا جوق نارسە. مەن قوجا احمەت ءياساۋيدىڭ ۇستانعان باعىتىن قولداپ, قۋاتتايمىن. ول – يسلام ءدىنىن قازاقتىڭ مەنتاليتەتىنە ىڭعايلاعان ادام.
قازىرگى كەيبىر جاستار قازاققا ارابتاردىڭ جاڭاعى ء«داستۇرىن» قايتىپ اكەلگىسى كەلەتىن سىندى. تۇمشالانىپ ورانعان قىزىنىڭ اتا-اناسى بەت ءجۇزىن كورمەي جۇرسە, ونى قالاي تۇسىنەمىز؟ قازاقتىڭ قىزى اكە-شەشەسىنە ەركەلەپ, جايراڭداپ, اكەسىنىڭ موينىندا ءوسۋى كەرەك ەمەس پە؟!
