ۇلتتىق جانە الەمدىك تانىمال كلاسسيكالىق جاۋھار شىعارمالاردى, قازاقتىڭ ءان-كۇي ونەرىن الەم حالىقتارىنا ناسيحاتتاپ جۇرگەن عاسىرعا جۋىق تاريحى بار وركەستر يتاليا جەرىنە جوسپارلاعان «كوشپەلىلەر اۋەنى» اتتى گاسترولدىك ساپارىن اياقتادى. گاسترولدىك كونتسەرت ەۋروپانىڭ مادەني-تاريحي ورتالىعىنىڭ ريم, نەاپول قالالارىندا انشلاگپەن ءوتتى. ريم قالاسىنداعى ايگىلى سانتا-چيچيليا مەملەكەتتىك مۋزىكالىق كونسەرۆاتورياسىندا جانە نەاپول قالاسىنداعى «Teatro Diana» عيماراتىنا جيىلعان قالىڭ جۇرتشىلىق, يتاليالىق تالعامپاز كورەرمەن, ونەرسۇيەر قاۋىم قازاق مۋزىكاسى مەن ۇلتتىق اسپاپتاردىڭ سازدى ۇنىنە تامسانىپ, تاڭدانىستارىن جەتكىزدى.
كونتسەرتتەن بولەك قۇرمانعازى وركەسترى الەمنىڭ جاڭا جەتى كەرەمەتىنىڭ قاتارىنا كىرەتىن, يتالياداعى ەڭ ءىرى كوليزەي مۇناراسىنىڭ الدىندا جەرگىلىكتى تۇرعىندارعا قازاقتىڭ كۇيلەرىنەن جيناقتالعان شاعىن كونتسەرتتىك باعدارلاماسىن ۇسىندى. يتاليا كوگىن انمەن اۋەلەتىپ, كۇيمەن تەربەگەن ۇلتتىق وركەستر مادەنيەت جانە سپورت مينيسترلىگىنە, قازاقستاننىڭ يتالياداعى ەلشىلىگىنە, نەاپول قالاسىنداعى قازاقستان كونسۋلدىعىنا, سانتا-چەچيليا مەملەكەتتىك مۋزىكالىق كونسەرۆاتورياسىنىڭ ۇجىمىنا العىسىن ءبىلدىردى.
قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ قازاق مادەنيەتىن, ءتول مۋزىكاسىن الەمگە تانىتۋداعى ەرەن ەڭبەگىن ەلىمىز ماقتان ەتەدى.
