ءباسپاسوزدىڭ بۇگىنگى ءولىارا شاعىندا ومىرگە كەلگەن بۇل باسىلىم نەگىزىنەن 105 جىلدىق تاريحى بار «Jetisy» گازەتىنىڭ شەكپەنىنەن شىقتى. وتكەن جىلدىڭ قىركۇيەك ايىنان باستاپ اتالعان باسىلىمنىڭ قوسىمشاسى رەتىندە تانىلا باستاعان «الاتاۋ ارايى» جاڭا جىلدان بەرى ءوز الدىنا دەربەس باسىلىم بولىپ, ءوڭىردىڭ كوزىقاراقتى وقىرمانىنىڭ رۋحاني ازىعىنا اينالىپ كەلەدى.
«بۇقارالىق اقپارات قۇرالدارى باسەكەگە قابىلەتتى جانە ەركىن بولۋى كەرەك. بۇل قاعيدات قازىر كەز كەلگەن وركەنيەتتى ەل ءۇشىن ايرىقشا ماڭىزدى. وتاندىق اقپارات قۇرالدارىنىڭ قازاقستاندا, وڭىردە جانە الەمدە بولىپ جاتقان ۇدەرىستەر تۋرالى ءوز كوزقاراسى بولۋعا ءتيىس», دەگەن مەملەكەت باسشىسىنىڭ تاپسىرماسىن باسشىلىققا العان باسىلىم الەۋمەتى مەن الەۋەتى ارتىپ كەلە جاتقان الماتى وبلىسىنىڭ ءسات سايىنعى ىلگەرىلەۋ جولىنداعى جاڭالىقتارىنىڭ جارشىسىنا اينالدى. جىل باسىنان بەرى 71-ءنومىرى جارىققا شىققان گازەتتىڭ باعىت-باعدارى ايقىن.
– «الاتاۋ ارايى» دەربەس باسىلىم رەتىندە وقىرمان قولىنا تيە باستاعانىنا التى اي بولدى. ادام ومىرىمەن سالىستىرساق ءالى ىڭگالاعان نارەستە شاقتا. دەسەك تە «ىڭگالاعان» قالپىمىزبەن ايماقتىق, ودان بولەك رەسپۋبليكالىق دەڭگەيدە باسىلىمدار كوش-كەرۋەنىنە كۇمىستەلگەن بولماسا دا كۇيمە جالداپ, ىلەسكەن جاي بار. رەسپۋبليكالىق دەۋىمنىڭ سەبەبى, اقورداعا ءۇنىمىز جەتە باستادى. تۇركىستان وبلىسىنان تارتىپ, ەكىباستۇزعا دەيىن تام-تۇمداپ وقىرماندارىمىز بار. تارالىم 7 مىڭدىق دەڭگەيگە جەتىپ جىعىلدى. ۇجىمنىڭ شىعارماشىلىق, تەحنيكالىق قۇرامى تولىق قالىپتاسىپ, جۇدىرىقتاي جۇمىلىپ ىسكە كىرىسىپ جاتىر. جۋرناليستەرىمىزدىڭ تۇرمىستىق جاعدايى مەن رەداكتسيانىڭ ماتەريالدىق-تەحنيكالىق بازاسى ماقتانارلىق دارەجەدە ەمەس. ءۇمىتى ۇزىلمەگەن جۇرتپىز عوي. جاڭا, جاس وبلىس ورتالىعىنىڭ ەرتەڭىنە سەنگەندىكتەن ۇيىمشىل ۇجىمىمىزدىڭ ەڭسەسى كوتەرىڭكى, – دەيدى «الاتاۋ ارايى» گازەتىنىڭ باس رەداكتورى كادىربەك قۇنىپيا ۇلى.
اقپارات سالاسىنداعى جاۋاپكەرشىلىگى مول جۇكتى ارقالاپ, الاتاۋدىڭ جىلت ەتپە جاڭالىعىن شارتاراپقا تاراتۋدا تىنىم تاپپايتىن قالامى قارىمدى قۋات قايرانباەۆ, قۋانىش تۇنعاتار, سەرىك ساتىبالديەۆ, الما ەسەنباي, بولات ءماجيت, قۇرالبەك ءسابيتوۆ سىندى «Jetisy» گازەتىنەن تانىمال ساقا جۋرناليستەر قاتارى بۇگىندە تاجىريبەلى ايجارىق كوپتىلەۋوۆ, بەيبىت مەكەەۆ, جاس ءتىلشى بايان مۇراتبەكقىزى جانە اۋداندارداعى مەنشىكتى تىلشىلەرمەن تولىعىپ, باسىلىم مازمۇنىنىڭ ارتا تۇسۋىنە ۇلەستەرىن قوسىپ كەلەدى. باسىلىمنىڭ مازمۇنىن ايشىقتاۋدا ءفوتوتىلشى اسلان قاجەكەنىڭ ىزدەنىسى ءوز الدىنا ءبىر توبە.
مەرزىمدى باسىلىمنىڭ ۋاقتىلى ءارى ساپالى شىعۋىندا قالامدى قارۋ ەتكەن جۋرناليستەرمەن قاتار, ەسەپشى جاۋحار امانكەلديەۆا, جاۋاپتى حاتشى شولپان نۇرجاۋوۆا, تەرىمشى جانات توقانوۆا باستاعان تاجىريبەلى ماماندارمەن قاتار, بىلىكتى بەتتەۋشىلەر, ساۋاتتى كوررەكتورلار ەسەلى ەڭبەك ءسىڭىرىپ ءجۇر. سونداي-اق گازەتتىڭ ەلەكتروندى سايتى جاندانىپ كەلەدى.
ينتەرنەت قارىشتاپ دامىعان زاماندا ماعىنالى, مازمۇندى ماقالالار ارقىلى ۇلتىمىزدىڭ رۋحىن اسقاقتاتىپ, بۇقاراعا وركەنيەت پەن ەلدىك مۇراتتاردى دارىپتەپ, بىرلىك پەن بەرەكەنى ناسيحاتتايتىن جاڭا باسىلىم – «الاتاۋ ارايى» گازەتىنە ساتتىلىك تىلەيمىز.
الماتى وبلىسى
