مۇنداي جاعدايدا ەلدىك مۇددە كەيىنگە ىسىرىلىپ, الگى «جەڭىمپاز» توپتىڭ نەمەسە «جاقسى كورىنۋدە» وزا شاپقان جەكەلەگەن تۇلعالاردىڭ مۇددەسى الدىڭعى ورىنعا شىعادى. وسىدان كەلىپ, ەلدىڭ تۇراقتى جانە ورنىقتى دامۋىنا كەدەرگى كەلتىرەتىن جاعىمسىز ءىس-ارەكەتتەر جاپپاي بوي كورسەتىپ, ىلگەرى باستاۋعا ءتيىس جولعا كەسە-كولدەنەڭ جاتىپ الادى. مىنە, وسىلايشا حالىقتىڭ اتقارۋشى بيلىككە دەگەن سەنىمى قۇلدىرايدى. ويتكەنى ۇلتقا شىنايى قىزمەت ەتۋ مىندەتى شەتتەتىلىپ, حالىقتى الداۋسىراتىپ ۇستاۋدىڭ, جايلى تۇرمىس پەن يگىلىكتەردى بولاشاقتان كۇتتىرۋدىڭ نەشە ءتۇرلى امال-ايلاسى «ىسكە قوسىلىپ», بيلىك قۋلىعىنا قۇرىق بويلاتپاۋعا بار كۇشىن سالادى. بۇل دەگەن نەگىزگى ماقساتتان اۋىتقۋدىڭ شىنايى كورىنىسى.
حالىقتى الدارقاتىپ ۇستاۋ امالىن ىسكە اسىرۋ كەزىندە اقپاراتتىق كەڭىستىك «جالعان جەتىستىكتەر» مەن «جالعان كورسەتكىشتەرگە» تولتىرىلادى, حالىقتىڭ يگىلىگىنە باعىتتالعان ماردىمسىز قولداۋ ءىس-شارالارى ماقتانا جارنامالانادى, قوعامعا ىقپالدى دەگەن ادامدار «ساتىلىپ الىنادى», سىبايلاس جەمقورلىققا شاتىلعان ادامدار كىناسى كەشىرىلەدى نەمەسە جۇمساق جازالانادى, جۇرتتىڭ ساياسي مادەنيەتى مەن ساۋاتىن كوتەرۋ ءىسى ۇمىت بولادى.
الەم ەلدەرىنىڭ كەز كەلگەنىنىڭ تاريحىنا كوز جۇگىرتسەڭىز, ءبارى دە ءبىز جوعارىدا ءسوز ەتكەن جاعداي-ۇدەرىستەردى باستان وتكەرگەنىن اڭعاراسىز. اسىرەسە بۇگىندە باتىستىق دەموكراتيا ۇلگىسىمەن دامىپ, وركەندەپ وتىرعان ەلدەر وسى ديكتاتورلىق, اۆتوريتارلىق جۇيەنىڭ اۋىر زارداپتارىن باسقالارعا قاراعاندا كوپ تارتقان. بۇگىندە ولار ۇزاق ارپالىستىڭ, تولاسسىز كۇرەستىڭ ناتيجەسىندە الگى قيقار جۇيەدەن قۇتىلىپ, وزدەرى تاڭداعان داڭعىل جولعا تۇسكەندەي. وسى تۇرعىدان كەلگەندە ءبىزدىڭ رەسەي بوداندىعىنا تۇسكەنگە دەيىنگى جاعدايىمىز باسقاشا بولدى. قىسقاشا ايتقاندا, ساق, عۇن داۋلەتتەرى داۋىرىنەن قازاق حاندىعى جويىلعانعا دەيىنگى ارالىقتا جەكەلەگەن جاعىمپازدار مەن جاندايشاپ جادىگويلەردىڭ ەمەس, حالىق بيلىگىنىڭ قامقورلىعى مەن قولداۋىنا سۇيەنگەن اتقارۋشى بيلىك ەل تىزگىنىن ۇستادى. قاعاندار مەن حاندار شەكسىز بيلىك يەسى رەتىندە كورىنگەنىمەن ولار باتىر-قولباسشىلاردىڭ, رۋ باسىلارىنىڭ – دالالىق پارلامەنتتىڭ ىقپالىندا بولدى. بۇل ىقپال قاعاندار مەن حانداردىڭ شەكسىز بيلىك-ديكتاتورلىق جۇگەنسىز ءىس-ارەكەتكە بارۋىنا مۇمكىندىك تە بەرمەيتىن ەدى. قولباسشىلار مەن رۋ باسىلارى اسكەردىڭ, قاراپايىم حالىقتىڭ وكىلدەرى – ەل ىشىنەن قايراتكەرلىگىمەن, ءىس-قيمىل, ابجىلدىگىمەن جارىپ شىققان, جۇرتتىڭ قامىن قاراقان باسىنىڭ قامىنان جوعارى قويا بىلەتىن, تابيعي تۇرعىدا ىرىكتەلىپ كوزگە كورىنگەن تۇلعالار بولعاندىقتان ولار قاعان مەن حانعا ەمەس, حالقىنىڭ قاس-قاباعىنا قاراپ, جۇرتىنا مەيلىنشە كوبىرەك «جاعىمپازدانىپ, جادىگويلەنەتىن» ەدى. قاعاندار مەن حانداردىڭ ماڭىندا ىلعي قارىم-قابىلەتىمەن دارالانىپ, ەل ىشىنەن شىققان ناعىز تۇلعالار جۇرگەندە تاق يەلەرى تىيىم-ءتارتىپتىڭ شەكاراسىنان اتتاپ وتە المايتىن, وزدەرىنىڭ باستارىندا حالىقتىڭ جۇگەنى تۇرعانىن ۇمىتپاي, ارتىق قادامعا بارا المايتىن. مىنە, بۇل ءتاڭىردىڭ ءوزى قالىپتاعان بىرەگەي جۇيە ەدى. وسى جۇيە نەگىزىندە اتا-بابالارىمىز دۇنيەنى تىتىرەتكەن الەمدىك دەرجاۆالار قۇرا الدى. بۇعان مىسالدار كەلتىرىپ جاتۋدىڭ ءوزى ارتىق...
اتالعان جۇيە حاندىعىمىز حانتالاپاي بولعان ساتتەن باستاپ ءىري باستادى. دالىرەگى, ونى ىرىتكەن وتارشىلار ەنگىزگەن باسقارۋ جۇيەسى ەدى. ۇلتىمىزدىڭ ءوزىن-ءوزى اقتاعان باسقارۋ جۇيەسىن تاس-تالقان ەتپەي وتارشىلدار كوزدەگەنىنە جەتە الماسىن ءبىلدى. ولار ۇلى دالا توپىراعىندا قالىپتاسقان تابيعي جۇيەنى تەز ارادا ىسىرىپ تاستاپ, ەلدىڭ ىشكى بىرلىگىن ىدىراتۋعا نەگىزدەلگەن جۇيەنى ەنگىزدى. ونىڭ وسىلايشا قاساقانا جاماندىققا نەگىزدەلۋى ەلىمىزدەگى باسقارۋ تەتىگىنىڭ ادىلەتتى تۇردە قالىپتاسۋىنا مۇمكىندىك بەرمەسى باسى اشىق جايت. وسى جاداعايلىقتىڭ قوعامىمىزعا ەنگەلى بەرگى زاردابى از بولعان جوق. ونىڭ كەسىر-كەساپاتىن بۇگىنگە دەيىن تارتىپ كەلەمىز ءارى ودان جاقىن ارادا ارىلۋىمىز دا نەعايبىل. نەعايبىلى بىلاي تۇرسىن, ودان قۇتىلۋ جولىن ويلاپ تا جۇرگەن جوقپىز.
ادىلەتتى اتقارۋشى بيلىكتى قالىپتاستىرۋ ءۇشىن وتارشىلار ەنگىزگەن, ياعني باتىستىق ۇلگىنىڭ ەڭ ءبىر كەسىرلى تۇستارىن الىپ, وزدەرىنە ىڭعايلى ەتىپ قۇرعان جۇيەدەن مۇلدە ارىلعان ءجون. سوندىقتان ادىلەتتى بيلىك قالىپتاستىرۋدا باتىستىق وزىق ۇلگىلەرگە دەن قويا وتىرىپ, بۇرىنعى ۇلتتىق باسقارۋ جۇيەسىنىڭ زامان تالابىنا ساي كەلەتىن تۇستارى وزەك ەتىلگەن جۇيە قۇرۋعا تالپىنعانىمىز دۇرىس دەپ ويلايمىز. ايتپەسە, شەكسپير ايتقانداي, «قورلىق-اق قوي بۇركىت توردا ءبۇرىسىپ, قارا قۇستار قالباڭداسا اسپاندانىڭ» ناعىز ءوزى قوعامىمىزدا «بىلگەنىن» ىستەي بەرەدى. مۇنى ۋاقىت كەشىرمەيدى.
