ءوز سوزىندە پالاتا توراعاسى مارگارەتا سەدەرفەلتكە سەناتتىڭ شاقىرۋىن قابىل الىپ, قازاقستانعا كەلگەنى جانە استانا حالىقارالىق فورۋمىنا قاتىسقانى ءۇشىن العىس ءبىلدىردى. سونداي-اق پارلامەنتتىك اسسامبلەيانىڭ جاھاندىق دەڭگەيدە قاۋىپسىزدىك پەن ىنتىماقتاستىقتىڭ نەگىزگى ماسەلەلەرىن شەشۋدەگى ماڭىزدى رولىنە توقتالدى. ماۋلەن اشىمباەۆ سەنات شۆەتسيا ريكسداگىمەن تىعىز بايلانىستى دامىتۋعا مۇددەلى ەكەنىن دە ءبىلدىردى.
«قازاقستان پارلامەنتىنىڭ ەكى پالاتاسىندا دا شۆەتسيامەن دوستىق توپتارى جۇمىس ىستەيدى. شۆەتسيا پارلامەنتىندە ورتالىق ازيا پارلامەنتتەرىمەن دوستىق قاۋىمداستىعىنىڭ قۇرىلۋىن قۇپتايمىز. ءبىز وسى توپتاردىڭ الەۋەتىن جانداندىرىپ, ەقىۇ پارلامەنتتىك اسسامبلەياسى مەن پارلامەنتارالىق وداق شەڭبەرىندەگى كوپجاقتى ىنتىماقتاستىقتى نىعايتۋىمىز كەرەك دەپ ەسەپتەيمىز», دەدى سەنات توراعاسى.
سونىمەن قاتار پالاتا سپيكەرى شۆەتسيا قازاقستاننىڭ سولتۇستىك ەۋروپاداعى ماڭىزدى ەكونوميكالىق سەرىكتەسى ەكەنىن اتاپ ءوتتى. سوعان بايلانىستى ول عىلىم, ءبىلىم بەرۋ, ءوندىرۋشى ونەركاسىپ, دەنساۋلىق ساقتاۋ, اقپاراتتىق-كوممۋنيكاتسيالىق تەحنولوگيالار, تۇراقتى دامۋ جانە ەنەرگەتيكا سالالارى بويىنشا ىنتىماقتاستىقتى كەڭەيتۋ جونىندەگى ۇسىنىستارىمەن ءبولىستى.
ماۋلەن اشىمباەۆ ەقىۇ پا ميسسياسىنىڭ قازاقستاندا وتكەن پارلامەنتتىك سايلاۋلاردى باقىلاۋعا قاتىسقانى ءۇشىن مارگارەتە سەدەرفەلتكە ريزاشىلىعىن ءبىلدىردى. سونداي-اق مەملەكەت باسشىسىنىڭ باستاماسىمەن ىسكە اسىرىلىپ جاتقان رەفورمالاردى زاڭنامالىق تۇرعىدان قامتاماسىز ەتۋ باعىتىندا پارلامەنت جۇرگىزىپ وتىرعان جۇمىستارعا نازار اۋداردى.
ءوز كەزەگىندە ەقىۇ پا توراعاسى قازاقستان پرەزيدەنتى قاسىم-جومارت توقاەۆتىڭ باسشىلىعىمەن ەلىمىزدە جۇزەگە اسىرىلىپ جاتقان ساياسي وزگەرىستەردىڭ قارقىنىن وڭ باعالاپ, ءوزارا ىنتىماقتاستىقتى ودان ءارى نىعايتۋعا دايىن ەكەنىن ءبىلدىردى.
ودان بولەك, سۇحباتتاسۋشىلار استانا حالىقارالىق فورۋمىنىڭ كۇن تارتىبىندەگى نەگىزگى تاقىرىپتاردى, ونىڭ ىشىندە كليماتتىڭ وزگەرۋى, ازىق-ت ۇلىك داعدارىسى مەن ەنەرگەتيكالىق قاۋىپسىزدىك ماسەلەلەرىن تالقىلادى.
