قر عىلىم جانە جوعارى ءبىلىم مينيسترلىگى ۇسىنعان مالىمەتكە سايكەس, تەستىلەۋگە تىركەلۋ ۇلتتىق تەستىلەۋ ورتالىعىنىڭ app.testcenter.kz سايتىندا 2023 جىلعى 15 شىلدەگە دەيىن وتەدى.
تەست تاپسىرۋشىلارعا وتىنىشتەردى قابىلداۋ مەرزىمى اياقتالعانعا دەيىن, ياعني 15 شىلدەگە دەيىن ءبىلىم بەرۋ باعدارلامالارىنىڭ توبىنا, تەست تاپسىرۋ ءتىلى مەن ورنىنا (قالاسىنا) وزگەرىس ەنگىزۋگە مۇمكىندىك بەرىلەدى.
تەستىلەۋ ورنى مەن ۋاقىتى تۋرالى اقپارات 18 شىلدەدە ءوتىنىش بەرۋشىنىڭ جەكە كابينەتىندە كورسەتىلەدى. كەشەندى تەستىلەۋدىڭ ءوزى 20 شىلدەدە باستالىپ, 10 تامىزعا دەيىن جالعاسادى.
«كەشەندى تەستىلەۋ ەلەكتروندىق فورماتتا وتكىزىلىپ, ءۇش بلوكتان تۇرادى: شەت ءتىلى بويىنشا تەست, وقۋعا دايىندىعىن انىقتاۋعا ارنالعان تەست جانە ءبىلىم بەرۋ باعدارلامالارى توبىنىڭ بەيىنى بويىنشا تەست. بۇعان, جالپى العاندا, 3 ساعات 55 مينۋت بەرىلەدى. شەت ءتىلىن مەڭگەرگەنىن راستايتىن حالىقارالىق سەرتيفيكاتتاردىڭ يەلەرى شەت ءتىلى بويىنشا تەست تاپسىرۋدان بوساتىلادى», دەپ ءتۇسىندىردى ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
ايتا كەتەيىك, بيىل عىلىمي-پەداگوگيكالىق ماگيستراتۋراعا ءتۇسۋ ءۇشىن شەكتى بالل – 75 بالل, ال بەيىندى ماگيستراتۋراعا - 50 بالل. كەشەندى تەستىلەۋ ناتيجەلەرىمەن كەلىسپەگەن وقۋعا تۇسۋشىلەر تەستىلەۋ اياقتالعاننان كەيىن بىردەن اپەللياتسياعا ءوتىنىش بەرە الادى.
