قازاقتىڭ 30 ءانىنىڭ ءماتىنى قىتاي تىلىنە اۋدارىلىپ, ارنايى جيناققا ەنگىزىلدى. ونىڭ تۇساۋكەسەرى بەيجىڭ قالاسىندا ءوتتى. جيناققا وزگە دە سازگەرلەر شىعارمالارىمەن قاتار اباي قۇنانباي ۇلى, ءشامشى قالداياقوۆ, نۇرعيسا تىلەنديەۆ, التىنبەك قورازباەۆ اندەرى ەنگەن. شىعارمالار جيناعىنىڭ قۇراستىرۋشىسى – بەلگىلى قىتاي جازۋشىسى اكبار ءماجيت. ءبىرشاما جىل بۇرىن اكبار مىرزا اباي ولەڭدەرى مەن پوەمالارىن, قاراسوزدەرىن قىتاي تىلىنە اۋدارعان. قالامگەردىڭ ايتۋىنشا اۋدارما جۇمىسى وڭايعا تۇسپەگەن. ءاننىڭ ماعىناسىمەن قاتار اۋەزدى ىرعاعىن جەتكىزۋدە ءا.ءماجيت ايانباي تەر توككەن. كەيبىر شىعارمالاردى ول 40 جىل بۇرىن اۋدارا باستاعانىن ايتادى. تۇساۋكەسەر راسىمىندە «جەلسىز تۇندە جارىق اي», «ايتتىم سالەم قالامقاس» سىندى اندەر ورىندالعان.
ايتا كەتەيىك, قازاق اندەرى قىتاي تىلىندە ءبىرشاما ۋاقىتتان بەرى شىرقالىپ كەلەدى. ماسەلەن, «قارلىعاش» ءانىنىڭ ءسوزى قىتاي تىلىنە تۇڭعىش رەت 1930 جىلى اۋدارىلعان.
– مەن بۇل ەڭبەگىمدى بىلتىر اتالىپ وتىلگەن قازاقستان مەن قىتاي اراسىنداعى ديپلوماتيالىق قارىم-قاتىناستىڭ 30 جىل تولۋىنا ارناپ وتىرمىن. پاندەميا سالدارىنان جيناق ءدال ۋاقىتىندا شىعىپ ۇلگەرمەدى. اۋدارما جۇمىسى وڭايعا سوققان جوق. مۇنداي مەرەكە ەكى حالىقتىڭ رۋحانياتىن جاقىنداستىرا تۇسەدى. قوس كورشى مەملەكەتتىڭ دوستىعى, بەرەكە-بىرلىگى ماڭگىلىك بولسىن دەپ تىلەيمىن, – دەيدى اكبار ءماجيت.
