قازاقستاندىق ديپلومات باۋىرلاس ازەربايجان رەسپۋبليكاسىندا ەلىنىڭ اتىنان قىزمەت اتقارۋ ءوزى ءۇشىن ۇلكەن مارتەبە ەكەنىن اتاپ ءوتتى. ءا. بايەل قازاقستان مەن ازەربايجان مەملەكەت باسشىلارىنىڭ تاپسىرمالارى شەڭبەرىندە ەكىجاقتى ىنتىماقتاستىقتى ودان ءارى ىلگەرىلەتۋ بويىنشا جۇمىس ىستەيتىنىن ايتتى.
سۇحبات بارىسىندا ازەربايجان پرەزيدەنتى ي. اليەۆ ەكى ەل اراسىنداعى ىنتىماقتاستىق دەڭگەيىنىڭ قارقىنىنا كوڭىلىنىڭ تولىپ وتىرعانىن ايتا كەلە, ءوزىنىڭ قازاقستانعا جاساعان ساپارى مەن قازاقستان پرەزيدەنتىنىڭ ازەربايجانعا جاساعان ساپارىنىڭ ىقپالداستىقتىڭ كەڭەيۋىنە ۇلكەن سەرپىن بەرگەنىن اتاپ ءوتتى. ازەربايجان باسشىسى ءوزى مەن پرەزيدەنت قاسىم-جومارت توقاەۆ اراسىنداعى سەنىمگە نەگىزدەلگەن قارىم-قاتىناستىڭ قازاق-ازەربايجان باۋىرلاستىق بايلانىستارىن ودان ءارى نىعايتۋدىڭ كەپىلى ەكەندىگىن تىلگە تيەك ەتتى.
ازەربايجان پرەزيدەنتى كولىك-لوگيستيكا سالاسىنىڭ ەكىجاقتى ىنتىماقتاستىقتاعى نەگىزگى باعىتتاردىڭ ءبىرى ەكەنىنە نازار اۋداردى. پرەزيدەنت ي. اليەۆ بۇگىندە جۇزەگە اسىرىلىپ جاتقان بىرلەسكەن ينفراقۇرىلىمدىق جوبالار جۇك تاسىمالى كولەمىن كەڭەيتۋگە جاقسى مۇمكىندىك بەرەتىنىن اتاپ ءوتتى. ي. اليەۆ سونداي-اق قازاق مۇنايىنىڭ ازەربايجان ارقىلى جۋىردا باستالعان تاسىمالىنىڭ وتە ماڭىزدى قادام بولعانىن تىلگە تيەك ەتتى. پرەزيدەنت اليەۆ ەلشىنىڭ قىزمەتىنە تابىس تىلەدى.
ءوز كەزەگىندە ءا. بايەل ازەربايجان پرەزيدەنتىن جانە حالقىن تاۋەلسىزدىك كۇنىمەن قۇتتىقتاپ, بيىل 100 جىلدىق مەرەيتويى كەڭىنەن اتالىپ جاتقان گەيدار اليەۆتى قۇرمەتپەن ەسكە الدى.
ديپلومات ساۋدا-ەكونوميكالىق ىنتىماقتاستىقتى دامىتۋ, سونداي-اق ەلدەرىمىزبەن قاتار, بۇكىل ءوڭىر ءۇشىن ۇلكەن گەوەكونوميكالىق ماڭىزى بار جوبالاردى جۇزەگە اسىرۋدىڭ ەكىجاقتى ىنتىماقتاستىقتاعى باسىمدىق ەكەندىگىمەن كەلىستى. اتالعان جوبالاردىڭ قاتارىندا ترانسكاسپي حالىقارالىق كولىك باعىتىن دامىتۋ, كاسپي تەڭىزىنىڭ تۇبىمەن فيبەر-وپتيكالىق بايلانىس جەلىسىن تارتۋ, قازاق مۇنايىنىڭ ەكسپورتىن ءارتاراپتاندىرۋ بار.
كەزدەسۋدە سونداي-اق قازاقستان مەن ازەربايجاننىڭ حالىقارالىق ارەنادا, ونىڭ ىشىندە تۇركى مەملەكەتتەرى ۇيىمى اياسىندا جەمىستى ىنتىماقتاستىق جۇرگىزىپ وتىرعانى اتالىپ ءوتتى. بيىل قازاقستاندا وتەتىن تمۇ-نىڭ 10-شى مەرەيتويلىق سامميتىنە دايىندىق بارىسى تالقىلاندى.
