– قايرات, جەڭىس قۇتتى بولسىن! بەت الپەتىڭ مەن كوڭىل كۇيىڭە قاراعاندا, بۇل جەكپە-جەكتە جەڭىسكە جەتۋ ساعان ايتارلىقتاي قيىندىق تۋعىزباعان سەكىلدى عوي.
– نەگىزى ريس ماكلارەن دە وسال سپورتشى ەمەس. ول ONE FC رەيتينگىندە ءتورتىنشى ورىندا تۇر. وسىدان ءتورت جىل بۇرىن ەكەۋمىز توكيودا «توبەلەسكەن» ەدىك. ول كەزدە مەن ۇپاي سانىمەن جەڭدىم. بۇل جولى دا ءدال سولاي بولدى. باسەكە اياقتالعاننان كەيىن ريس: «وسى جارىسقا مەن تىڭعىلىقتى دايارلانعان ەدىم. ءتىپتى تاڭنىڭ اتىسىنان كۇننىڭ باتىسىنا دەيىن جاتتىقتىم دەسە دە بولادى. وسى ايقاستا قالاي دا سەنى جەڭۋدى ماقسات تۇتتىم. بىراق قانشا كۇش سالسام دا, كوزدەگەن ماقساتىما قول جەتكىزە المادىم. مويىندايمىن, سەن مەنەن الدەقايدا مىقتى ەكەنسىڭ», دەپ اعىنان جارىلدى. قارسىلاسىمنىڭ وسى ءبىر اۋىز ءسوزى كوڭىلىمدى كادىمگىدەي مارقايتىپ تاستادى.
– بۇل جەڭىس ساعان نە بەردى؟ ەندى تيتۋلدىق ايقاسقا شىعاسىڭ با؟
– ءيا, ەندىگى ماقساتىم – دەمەتريۋس دجونسوندى جەڭىپ, اتالعان پروموۋشەننىڭ چەمپيوندىق بەلبەۋىن يەلەنۋ. ارينە, بۇل جوسپاردى جۇزەگە اسىرۋ وڭاي بولمايدى. «كۇشتى تىشقان» دەگەن جاناما ەسىممەن وكتاگونعا شىعىپ جۇرگەن امەريكالىق فايتەر كەزىندە UFC چەمپيونى بولىپ قانا قويماي, كوپتەگەن رەكوردتىق كورسەتكىشكە قول جەتكىزدى. اسا جەڭىل سالماقتاعى دجونسون ءوز اتاعىن 11 مارتە ءساتتى قورعاپ, سول ۇيىمنىڭ ەڭ بەلدى سپورتشىسىنا اينالدى. ءتىپتى ونى ء«تىرى اڭىز» دەسەك تە ەشكىم داۋلاسا قويمايدى. دەمەتريۋس سىندى مىقتىنى جەڭۋ بىلاي تۇرسىن, ونىمەن تەڭ دارەجەدە ايقاسۋدىڭ ءوزى كوپتەگەن فايتەر ءۇشىن اسقاق ارمان. بىراق مەن بۇل جەكپە-جەككە ءازىرمىن. «تىشقاندى» تىزە بۇكتىرۋ ءۇشىن ايقاس الاڭىندا ەش ايانىپ قالمايمىن.
– كوپشىلىك ءۇشىن دەمەتريۋس دجونسوننىڭ سينگاپۋرلىق ۇيىمعا كەلۋىنىڭ ءوزى تۇسىنىكسىز جايت. قانشا دەگەنمەن ول الەمنىڭ ەڭ بەلدى پروموۋشەنى – UFC-ءدىڭ شوقجۇلدىزى ەدى عوي.
– وعان ەش تاڭدانۋعا بولمايدى. بۇگىنگى تاڭدا ONE FC كەرەمەت قارقىنمەن دامىپ كەلەدى. قازىر بۇل ۇيىم الەمدە ەكىنشى ورىندا. ءاربىر جارىسى ۇلكەن شوۋعا اينالىپ, سپورت كەشەندەرىندە ينە شانشار ورىن بولمايدى. ونى بۇكىل ازيا, كۇللى الەم قىزىعا تاماشالايدى. قاراجاتى دا UFC-دەن ەش كەم ەمەس. ەرەجەسى مۇلدەم بولەك. ءتىپتى قاتال دەسەك تە بولادى. ويتكەنى بۇل جەردە جاتقان ادامدى اياقپەن جانە تورتتاعانداعان سپورتشىنى تىزەمەن تەبۋگە رۇقسات بەرىلگەن. قاتىسۋشىلار مىندەتتى تۇردە گيدروتەستەن وتەدى. ياعني شامادان تىس ارتىق سالماقتان ارىلۋعا تىيىم سالىنعان. اركىم ءوزىنىڭ تابيعي سالماعىندا ونەر كورسەتۋگە ءتيىس. ويتكەنى سپورتتان كەيىن دە ءومىر بار. ادامنىڭ اعزاسى تەمىر ەمەس, تىم كوپ سالماق قۋاتىندار ەرتەڭگى كۇنى سونىڭ زاردابىن شەگەدى. دەنساۋلىعىن قۇرتادى. وسىنىڭ بارلىعى ONE FC-دە ويلاستىرىلعان. ەشبىر ۇيىمدا ونداي گيدروتەست جوق.
ال دجونسونعا كەلەر بولساق, ول UFC-ءدىڭ بارلىق مىقتىلارىن وڭدىرماي سابادى. اتالعان ۇيىم باسشىلىعى «كۇشتى تىشقانعا» لايىقتى قارسىلاس تابا الماي ابدەن ابىگەرگە ءتۇستى. ءيا, كەزىندە ونىڭ برەد پيكەت (2010 جىلى), دومينيك كرۋس (2011) جانە گەنري سەحۋدو (2018) سىندى سپورتشىلارعا ەسە جىبەرگەنى راس. بىراق ول تورەشىلەردىڭ شەشىمىمەن عانا جەڭىلدى. ال ONE FC-گە اۋىسقاندا دەمەتريۋس ءوزىنىڭ سپورتتىق مانسابىندا العاش رەت نوكاۋتقا ءتۇستى. 2021 جىلدىڭ كوكتەمىندە برازيليالىق ادريانو موراەس اقش-تىڭ اتى اڭىزعا اينالعان فايتەرىن تىزەمەن تەۋىپ, ەسىنەن تاندىردى. مىنە, وسىدان-اق ىرگەتاسى سينگاپۋردە قالانعان پروموۋشەننىڭ دەڭگەيى قانداي ەكەنىن بىلۋگە بولادى.
– ONE FC-گە بارا سالا سەن بىردەن چەمپيوندىق بەلبەۋ ءۇشىن ايقاستىڭ. ادەتتە ورتاڭقول پروموۋشەندەردىڭ وزىندە چەمپيوندىق اتاققا تالاسۋ ءۇشىن بىرنەشە باسەكە وتكىزۋگە ءتيىستىسىڭ. وسى ورايدا ساعان وسىنداي ايرىقشا قۇرمەت نە ءۇشىن كورسەتىلدى؟
– مەنىڭ ۇزاق جىلدار بويى دانيار قاسقاراۋوۆ جەتەكشىلىك ەتەتىن «الاش پرايد» كلۋبىنىڭ ساپىندا ونەر كورسەتكەنىمدى جاقسى بىلەسىزدەر. قالىڭ جۇرتقا سول ۇيىمدا تانىلدىم. سينگاپۋرلىق پروموۋشەننىڭ تاراپىنان ۇسىنىس تۇسكەندە مەن بىردەن العاشقى جەكپە-جەگىمدە چەمپيوندىق ءتاج ءۇشىن تالاسامىن دەگەن تالاپ قويدىم. ولاي بولماعان جاعدايدا باس تارتۋعا بەكىندىم. ويتكەنى ول كەزگە دەيىن مەن بىردە-ءبىر رەت جەڭىلگەن ەمەس ەدىم. ءبىراز ۋاقىت ويلانا-تولعانا كەلە ولار كەلىسىم بەردى. ءسويتىپ, مەن 2015 جىلدىڭ 21 قاراشاسىندا بەيجىڭدە وتكەن جارىستىڭ باستى جەكپە-جەگىندە ونەر كورسەتۋ قۇقىعىنا يە بولدىم.
– بەيجىڭدەگى جارىستا سەن برازيليالىق ادريانو موراەستى جەڭىپ, التىن بەلبەۋدى يەلەندىڭ. سول كەزدە قانداي سەزىمدە بولدىڭ؟
– ءسوز ورايى كەلگەندە, قىتايدا وقيتىن قازاق ستۋدەنتتەرىنە زور العىسىمدى بىلدىرگىم كەلەدى. ولار سپورت كەشەنىن لىق تولتىرىپ, بارىنشا قولداۋ كورسەتتى. بۇل جاعداي مەنى ەرەكشە رۋحتاندىردى. بەس راۋندقا سوزىلعان سايىستا موراەستى ۇپاي سانىمەن ۇتىپ, چەمپيوندىق تاجگە قول جەتكىزدىم. سول كەزدە قۋانىشتان توبەم كوككە ەكى ەلى عانا جەتپەدى.
– الەمدەگى ەڭ بەلدى ۇيىمداردىڭ ءبىرىنىڭ چەمپيوندىق بەلبەۋىن تاققاننان كەيىن ماتەريالدىق تۇرعىدان دا جاعدايىڭ جاقسارعان شىعار. قۇپيا بولماسا, قانشا قاراجات الدىڭ؟
– سول كۇنگە دەيىن مەن تيىن-تەبەنگە جۇدىرىقتاسىپ جۇرگەنمىن. سوندىقتان سول ۋاقىتتا ONE FC-ءدىڭ ماعان بەرگەن سىياقىسى كوپ اقشا بولىپ كورىندى. قازىر ويلاپ وتىرسام, ولاي ەمەس ەكەن. تىم از گونورار العان ەكەنمىن. بارلىعى دا ءوزىمىزدىڭ بىلىمسىزدىگىمىزدىڭ كەسىرى. ول كەزدە نە مەنەدجەرىم, نە پروموۋتەرىم جوق. ONE FC-دەن كەلسىمشارت كەلگەن بەتتە قۇجاتتى اعىلشىنشا بىلەتىن ءبىر دوسىما وقىتتىم. ول ءبىر شولىپ ءوتتى دە, ءبارى دۇرىس دەدى. مەن قول قويدىم. ءسويتىپ, بولار-بولماس سىياقى الدىم.
– اراعا ەكى جىل سالىپ, ماكاودا وتكەن جارىستا ءدال سول ادريانو موراەستەن جەڭىلىپ, چەمپيوندىق اتاقتان ايىرىلدىڭ. سول جەكپە-جەكتە نە جەتپەدى دەپ ويلايسىڭ؟
– وتباسىلىق جاعدايىما بايلانىستى ءبىر جارىم جىلداي ۇلكەن سپورتتان قول ءۇزىپ قالدىم. سىرقاتتانعان ۇلىمدى ەمدەتۋ ءۇشىن بىرنەشە اي بويى وتباسىممەن بىرگە تايلاندتا تۇرۋىما تۋرا كەلدى. سول جاقتا ەم-دوم قابىلدادىق. كەزەكتى جارىستىڭ وتۋىنە ءتورت-بەس اي قالعاندا عانا جاتتىعۋ زالىنا باس سۇقتىم. دۇرىس دايارلىقتىڭ بولماۋى سالدارىنان جەڭىلىس تاپتىم.
– سول كۇنگە دەيىن 23 رەت جەكپە-جەككە شىعىپ, بارلىعىندا جەڭىسكە جەتكەن ەدىڭ. العاش رەت جەڭىلىستىڭ كەرمەك ءدامىن تاتقاندا قانداي كۇيدە بولدىڭ؟
– العاشىندا قاتتى كۇيىندىم. بىراق حالىقتىڭ قولداۋىنىڭ ارقاسىندا ەڭسە تىكتەپ, قايتا قاتارعا قوسىلدىم.
– شەردوگىڭە قاراساق, كۇنى بۇگىنگە دەيىن 32 كەزدەسۋ وتكىزىپ, 30-دا جەڭىسكە جەتكەن ەكەنسىڭ. 18 باسەكەنى مەرزىمىنەن بۇرىن اياقتادىڭ. بۇل – وتە تاماشا كورسەتكىش! وسى تسيفرلارعا قاراپ, كوڭىلىڭ مارقاياتىن شىعار؟
– مەن رەكوردىما ەمەس, وسى كۇنگە دەيىن وسىنداي بيىك دارەجەدە جۇرگەنىمە, ءوزىمدى الەمگە تانىتا ءبىلىپ, كىل مىقتىلارمەن كۇش سىناسىپ, ەلىمنىڭ تۋىن بيىكتە جەلبىرەتكەنىمە قۋانامىن. بۇل جاعداي مەنىڭ بويىما قۋات, جۇرەگىمە جىلۋ بەرەدى.
– ءار جەڭىسىڭنەن كەيىن «قارا جورعا» بيلەۋدى جاقسى ءبىر داستۇرگە اينالدىرىپ, قالىڭ كورەرمەننىڭ كوڭىلىن تاپتىڭ. بۇل ءوزىڭنىڭ باستاماڭ با, الدە باسقا بىرەۋلەر وسىنداي وي تاستادى ما؟
– بۇل يدەيا «الاش پرايدتا» جۇرگەن كەزىمدە ويعا كەلدى. بالا كەزىمنەن بىرگە وسكەن دوسىم قۋات «نايمان» حاميتوۆ تيتو ورتيس ەسىمدى سپورتشىعا قاتتى ەلىكتەدى. سودان ول ءار جەكپە-جەككە كۇرەكپەن شىعىپ, جەڭگەن كەزدە قارسىلاسىن «كومىپ تاستاۋدى» ادەتكە اينالدىردى. ماعان دا ءبىر «فيشكا» تابۋ كەرەك بولدى. سودان مەن قازاقي كيىممەن شىعىپ, «قارا جورعا» بيلەۋدى ءجون كوردىم. بۇل ارەكەتىمدى جانكۇيەرلەر جىلى قابىلدادى. سول كەزدەن بەرى مەنىڭ «فيشكام» – «قارا جورعا».
– اڭگىمەڭە كوپ راحمەت, قايرات. «كۇشتى تىشقاندى» جەڭىپ, ONE FC-ءدىڭ چەمپيوندىق بەلبەۋىن يەلەنۋىڭە تىلەكتەسپىن.
– سىزگە دە كوپ راحمەت. «Egemen Qazaqstan»-نىڭ وقىرماندارى ءاردايىم كوپ بولسىن!
اڭگىمەلەسكەن
عالىم سۇلەيمەن,
«Egemen Qazaqstan»
