ءىس-شارادا ءسوز العان اقپارات جانە قوعامدىق دامۋ ءمينيسترى, قازاقستان-موڭعوليا ۇكىمەتارالىق كوميسسياسىنىڭ تەڭ توراعاسى دارحان قىدىرالى موڭعوليا تاراپىنىڭ قوناقجايلىلىعىنا العىس ءبىلدىرىپ, ەكى ەل اراسىنداعى ساۋدا-ەكونوميكالىق, اۋىل شارۋاشىلىعى, كولىكتىك-لوگيستيكالىق, ينۆەستيتسيالىق سالالارداعى بايلانىستاردىڭ قازىرگى جاعدايىنا توقتالدى.
2020 جىلى پاندەمياعا بايلانىستى توقتاپ قالعان «ۇلانباتىر – الماتى – ۇلانباتىر» باعىتىنداعى اۋە قاتىناسى قايتا ىسكە قوسىلدى. دەگەنمەن ەكى ەل استانالارىنىڭ اراسىن قوساتىن اۋە رەيسىن اشۋ, سونداي-اق «ۇلانباتىر – حوۆد – وسكەمەن» باعىتىندا اۋە جانە اۆتوكولىك بايلانىسىن ىسكە قوسۋ كۇن تارتىبىندە تۇر.
«قازاقستان دوستاس ءارى باۋىرلاس موڭعوليامەن تىعىز كوپسالالى بايلانىستى دامىتۋعا مۇددەلى جانە بۇعان ەرەكشە ءمان بەرەدى. 2022 جىلى ەكى ەل اراسىنداعى ديپلوماتيالىق قاتىناستاردىڭ 30 جىلدىق مەرەيتويىن اتاپ وتتىك. بيىل قازاقستان مەن موڭعوليا اراسىنداعى دوستىق قاتىناستار مەن ىنتىماقتاستىق تۋرالى شارتقا قول قويعانىنا دا 30 جىل تولىپ وتىر», دەدى د.قىدىرالى.
قوس تاراپ قازاقستان مەن موڭعوليا اراسىنداعى ساۋدا-ەكونوميكالىق ىنتىماقتاستىقتى كەڭەيتۋگە جانە ەكى ەلدىڭ ەكونوميكاسىنىڭ دامۋىنا ەلەۋلى ۇلەس قوساتىن ءىرى جوبالاردى جۇزەگە اسىرۋعا ءمان بەردى. سونداي-اق مادەنيەت, ءبىلىم, عىلىم, تۋريزم, اقپارات, ءدىن, ازاماتتىق قوعامدى دامىتۋ جانە جاستار ساياساتى سالالارىنداعى بايلانىستى كۇشەيتۋ جايى قوزعالدى.
موڭعوليانىڭ قارجى مي-ءنيسترى, قازاقستان-موڭعوليا ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى ۇكىمەتارالىق كوميسسيانىڭ تەڭ توراعاسى بولدىن جاۆحلان ەكىجاقتى قارىم-قاتىناستىڭ الەۋەتى ۇلكەن ەكەنىن ايتىپ, موڭعوليا اۋىل شارۋاشىلىعى, ونىڭ ىشىندە مال جانە ەگىن شارۋاشىلىعى باعىتىندا قازاقستانمەن تاجىريبە الماسۋعا مۇددەلى ەكەنىن ءبىلدىردى.
وتىرىس قورىتىندىسىندا تەڭ توراعالار كوميسسيا حاتتاماسىنا قول قويۋ ءراسىمىن جاسادى. سونىمەن بىرگە قازاقستان رەسپۋبليكاسى ەكولوگيا جانە تابيعي رەسۋرستار مينيسترلىگى مەن موڭعوليانىڭ قورشاعان ورتا جانە تۋريزم مينيسترلىگى تابيعات قورعاۋ بويىنشا ءوزارا مەموراندۋمعا قول قويدى.
وسى ساپار بارىسىندا اقپارات جانە قوعامدىق دامۋ ءمينيسترى دارحان قىدىرالى موڭعوليانىڭ ءبىلىم جانە عىلىم ءمينيسترى لۋۆسانتسەرەن ەنح-امگالانمەن كەزدەستى.
«موڭعوليا قازاقستان ءۇشىن سەنىمدى سەرىكتەس سانالادى جانە ەلىمىز ءارتۇرلى سالالارداعى ءوزارا ءتيىمدى قارىم-قاتىناستاردى دامىتۋعا ۇلكەن ءمان بەرىپ كەلەدى. حالىقارالىق ۇيىمداردا دا تىعىز ارىپتەستىگىمىز بار. وسى ورايدا ەكى ەل اراسىندا ءبىلىم جانە عىلىم, اقپارات, ارحەولوگيا سالاسىندا, اسىرەسە, ورتاق مۋزەي اشۋ, كوشپەلىلەر تاريحىن بىرگە زەرتتەۋدە بىرىگىپ جۇمىس ىستەۋگە نيەتىمىز بار. كۇنى كەشە موڭعوليانىڭ UBS ارناسى مەن «حابار» تەلەارناسى ءوزارا ىنتىماقتاستىق تۋرالى مەموراندۋمعا قول قويدى. بۇل باعىتتاعى جۇمىسىمىز جالعاسادى», – دەدى مينيستر.
سونىمەن بىرگە د.قىدىرالى مينيسترلىكتىڭ جۇمىسىنان اقپارات بەرىپ, الداعى ۋاقىتتا بىرگە جۇمىس ىستەۋگە نيەتتى ەكەنىن جەتكىزدى. ءوز كەزەگىندە لۋۆسانتسەرەن ەنح-امگالان مىرزا قوس مەملەكەت اراسىندا تىعىز بايلانىس بار ەكەنىن جانە ءبىلىم, مادەنيەت, ارحەولوگيا سالاسىنداعى ورتاق جوبالار جاساۋ تۋرالى د.قىدىرالىنىڭ ۇسىنىستارىن قولدايتىنىن ايتتى. تاراپتار ۇكىمەتارالىق گرانتتار اياسىندا ستۋدەنتتەردى وقىتۋ, اكادەميالىق بايلانىس ورناتۋ, مادەني-گۋمانيتارلىق قارىم-قاتىناستاردى نىعايتۋ جايىن تالقىلادى.
سونداي-اق موڭعوليا پرەزيدەنتى ۋحنااگين حۇرەلسۇح ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى كوميسسيانىڭ 9-وتىرىسىنا كەلگەن قازاقستان دەلەگاتسياسىن قابىلدادى. ول قازاقستان مەن موڭعوليا اراسىنداعى بايلانىسقا جوعارى باعا بەرەتىنىن ايتىپ, كوميسسيا جۇمىسىنا ساتتىلىك تىلەدى.
اقپارات جانە قوعامدىق دامۋ ءمينيسترى, قازاقستان-موڭعوليا ۇكىمەتارالىق كوميسسياسىنىڭ تەڭ توراعاسى دارحان قىدىرالى پرەزيدەنتكە تىعىز جۇمىس كەستەسىنە قاراماستان, دەلەگاتسيانى قابىلداعانى ءۇشىن العىسىن جەتكىزدى.مۇنان سوڭ تاراپتار ەكى ەل اراسىنداعى مادەني-گۋمانيتارلىق, ەكونوميكالىق بايلانىس تۋرالى ءسوز قوزعادى.
