كورنەكتى عالىم «عاسىرلار مۇراسى», «ەجەلگى ادەبيەت», «شىعىستىق قيسسا-داستاندار» اتتى ەڭبەكتەرىمەن عىلىم جولىندا ءوز قولتاڭباسىن قالدىردى. وسى جيناقتارىندا بالانىڭ بويىنا ەڭ الدىمەن ادامگەرشىلىك پەن كىسىلىك قاسيەتتى قالىپتاستىرۋدى ماقسات ەتكەن ۇلاعاتتى ۇستاز ماعجان جۇماباەۆتىڭ «پەداگوگيكاسى» مەن جۇسىپبەك ايماۋىت ۇلىنىڭ «جان جۇيەسىن» ۇلتتىق تاربيەنىڭ نۇسقاۋلىعى رەتىندە قاراستىردى. الما اپاي – حالقىمىزدىڭ ۇلى مۇراتىن ومىرلىك ماقساتىنا اينالدىرا بىلگەن جان. عىلىم جولىندا ءجۇرىپ, ۇلتتىق مەكتەپتىڭ نەگىزىن قالادى.
العاشقى بولىپ ءسوز العان فيلولوگيا عىلىمدارىنىڭ كانديداتى سامال دارىباەۆ ايتۋلى عالىمنىڭ ءومىرى مەن قايراتكەرلىك جولىنا قىسقاشا توقتالدى.
«الما قىراۋباەۆا عىلىم مەن پەداگوگيكا سالاسىنا زور ۇلەس قوسىپ, ارتىنا مول مۇرا قالدىردى. عالىمنىڭ ونەگەلى ءومىر جولى بارشامىزعا ۇلگى بولارى حاق. پروفەسسوردىڭ عىلىمي وراسان ەڭبەگىن كەڭىنەن ناسيحاتتاۋ ماقساتىندا بۇل ءىس-شارا العاش رەت وتكىزىلىپ وتىر, كەلەشەكتە ونى داستۇرگە اينالدىرۋ جوسپاردا بار», دەدى ول. عالىمنىڭ بالاسى بۇلان ءتايتى اناسى تۋرالى جىلى ەستەلىگىمەن ءبولىستى.
العاش ءوتىپ وتىرعان عالىم وقۋلارىنا ەلىمىزدىڭ ءار وڭىرىندەگى جوعارى وقۋ ورىندارىنان 9 عىلىمي جوبا مەن 28 ەسسە قابىلداندى. بايقاۋعا قازاق ۇلتتىق ۋنيۆەرسيتەتى فيلولوگيا فاكۋلتەتىنىڭ وقىتۋشىلارى قازىلىق ەتتى. عالىمنىڭ ەجەلگى جانە ورتا عاسىرلارداعى ادەبي جادىگەرلەر, شىعىستىق قيسسا-داستاندار تۋرالى زەرتتەۋلەرىنىڭ ماڭىزى مەن ۇلتتىق مەكتەپ تۇجىرىمداماسى اتالىمىندا ءبىرىنشى ورىندى م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ 3-كۋرس ستۋدەنتتەرى دينارا ابجالوۆا مەن اياجان جايىمباەۆا جەڭىپ الدى. ال عالىمنىڭ ۇستازدىق بولمىسى, عىلىمي-پەداگوگيكالىق ەڭبەكتەرى, رۋحاني قۇندىلىقتار تۋرالى تۇجىرىمدارىن سارالاۋدا ۇزدىك ەسسەسىمەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ستۋدەنتى احات ءدىلناز توپ جاردى.
ءىس-شارا سوڭىندا بايقاۋ جەڭىمپازدارىنا Space English وقۋ ورتالىعىنىڭ سەرتيفيكاتى مەن «جادىگەر» ورتالىعىنىڭ الما قىراۋباەۆا اتىنداعى ستيپەندياسى تابىس ەتىلدى.
ءلايلا نوعايبەكقىزى,
ءال-فارابي اتىنداعى قازاق ۇلتتىق ۋنيۆەرسيتەتىنىڭ ماگيسترانتى
