اباي وبلىسىنىڭ باقىلاۋ باسقارماسى باسشىسىنىڭ مىندەتىن اتقارۋشى ازامات بايقازاقوۆتىڭ ءباسپاسوز ماسليحاتىنداعى مالىمدەمەسى بويىنشا, قۇرىلىس-مونتاجداۋ جۇمىستارىنىڭ ءتيىستى ساپاسى ءۇشىن 5 مەردىگەر ۇيىم اكىمشىلىك جاۋاپكەرشىلىككە تارتىلعان. اسىرەسە سەمەي قالاسىنىڭ كوپقاباتتى تۇرعىن ۇيلەرىنىڭ قۇرىلىس نىساندارىندا ءتيىستى تالاپتاردىڭ ەسكەرىلمەگەنى, بۇزۋشىلىقتارعا جول بەرىلگەنى انىقتالىپ وتىر. جاڭادان بوي كوتەرگەن 19 نىسانعا جوسپاردان تىس تەكسەرۋلەر جۇرگىزىلگەندە, ونىڭ 15-ءى جوبالاۋ-سمەتالىق قۇجاتتامادان اۋىتقۋمەن سالىنعانى انىقتالعان. ءتىپتى كەيبىر مەردىگەر كومپانيانىڭ تۇرعىن ۇيلەردى بۇرىن پايدالانىلعان قۇرىلىس ماتەريالدارىنان سالعانى دا ءوز مىندەتىنە سالعىرت قاراعانىن ايعاقتايدى.
«تەكسەرۋ ناتيجەسىندە بەلگىلى بولعانىنداي, قۇرىلىس كومپانيالارى كوپ جاعدايدا قۇرىلىس سالاسىنداعى زاڭنامانى بىلمەيدى. ودان قالسا, جوبالىق قۇجاتتامانىڭ ساپاسىز ازىرلەنۋى سالدارىنان قۇرىلىس-مونتاجداۋ جۇمىستارى دا دۇرىس جۇرگىزىلمەيدى. تەحنيكالىق جانە اۆتورلىق قاداعالاۋدىڭ السىزدىگى دە قۇرىلىس جۇمىستارىنداعى ولقىلىققا جول بەرىپ وتىر. سونىڭ سالدارىنان قۇرىلىستاعى زاڭناما مەن مەملەكەتتىك نورماتيۆتەردىڭ بۇزىلۋى ورىن الادى», دەيدى ا.بايقازاقوۆ.
اباي وبلىسىنىڭ باقىلاۋ باسقارماسى جىل باسىنان بەرى ازاماتتاردىڭ 397 ءوتىنىشىن قابىلداپ, ساۋلەت-قۇرىلىس باقىلاۋ جانە قاداعالاۋ سالاسىندا 46 جوسپاردان تىس تەكسەرۋ جۇرگىزگەن. تەكسەرۋ ناتيجەسىندە 32 سۋبەكت اكىمشىلىك جاۋاپكەرشىلىككە تارتىلعان. باسقارما جۇمىسىنىڭ قورىتىندىسى بويىنشا جالپى سوماسى 23,6 ملن تەڭگەنى قۇرايتىن 68 اكىمشىلىك ءىس قوزعالعان. ونىڭ 32-ءسى اكىمشىلىك سوتقا شەشىم قابىلداۋ ءۇشىن جىبەرىلگەن جايى بار.
تاعى ءبىر ايتار جايت, كوپ قاباتتى ءۇي قۇرىلىسىن جۇرگىزۋ كەزىندە قاۋىپسىزدىك تالاپتارى دا ساقتالا بەرمەيدى. جىل باسىنان بەرى 4 ايدا 39 وقىس وقيعا تىركەلگەن. «جازاتايىم وقيعالاردىڭ ورىن الۋىنا كوبىنە كاسىپورىنداردا ەڭبەك قاۋىپسىزدىگىن قامتاماسىز ەتۋگە جاۋاپتى تۇلعالاردىڭ جۇمىستى سالعىرت ۇيىمداستىرۋى سەبەپ بولىپ وتىر», دەيدى ا. بايقازاقوۆ.
اباي وبلىسى
