ەلدەگى سايلاۋ ۋچاسكەلەرى تاڭعى 8:00-دە اشىلىپ, جەرگىلىكتى ۋاقىت بويىنشا 17:00-دە جابىلادى. انادولىدا جالپى سانى 191 885 داۋىس بەرۋ جاشىگى ورناتىلعان. تۇركيادا جانە شەتەلدە 64,1 ميلليوننان اسا سايلاۋشى داۋىس بەرمەك. بۇدان بولەك, 4,9 ميلليونعا جۋىق ادام العاش رەت ءوز تاڭداۋىن جاسايدى. ساياسي ناۋقانعا ۇلەس قوسۋ ءۇشىن ەلەكتورات جەكە باسىن كۋالاندىراتىن رەسمي كەز كەلگەن قۇجاتپەن داۋىس بەرە الادى.
جوعارىدا اتاپ وتكەنىمىزدەي, بۇل جولى پرەزيدەنت جانە پارلامەنت سايلاۋى قاتار ءوتىپ جاتىر. سوندىقتان ەكى بيۋللەتەن بەرىلەدى. بىرەۋىندە ەل باسشىسىن انىقتاسا, ەكىنشىسىندە زاڭ شىعارۋشى ورگانداعى ۇمىتكەرىن بەلگىلەيدى.
شەتەلدىك ۋچاسكەلەردە داۋىس بەرۋگە 3,4 ميلليوننان اسا ادام قاتىستى. ولارعا ارناپ 73 ەلدە جانە 156 شەتەلدىك وكىلدىكتە سايلاۋ كوميسسيالارى قۇرىلدى. تۇركيانىڭ شەتەلدىك وكىلدىكتەرىندە داۋىس بەرۋ ۇدەرىسى 9 مامىردا اياقتالدى.
قازىرگى تاڭدا پرەزيدەنت لاۋازىمىنا ءۇش ادام ۇمىتكەر. مەملەكەتتىڭ قازىرگى باسشىسى رەجەپ تايپ ەردوعان ءۇشىنشى رەت ساياسي باسەكەگە قاتىسىپ وتىر. ول العاش رەت مەملەكەت باسشىسى لاۋازىمىنا 2014 جىلدىڭ تامىزىندا كەلدى. 2018 جىلى 24 ماۋسىمدا ەلدە وتكەن سايلاۋدا 52,59 پايىز داۋىس جيناپ, وسى لاۋازىمعا قايتا سايلاندى.
بۇدان بولەك, ەلدىڭ التى وپپوزيتسيالىق پارتياسى بىرىككەن كواليتسيانىڭ كانديداتى جانە رەسپۋبليكالىق حالىق پارتياسىنىڭ توراعاسى كەمال كىلىچداروعلۋ مەن «اتاتۇرىكشىلەر اليانسى» اتىنان سينان وگان ۇمىتكەر اتاندى. ساراپشىلار دا, ساۋالدامالار ناتيجەلەرى دە ر.ەردوعاننىڭ باستى قارسىلاسى ك.كىلىچداروعلۋ بولاتىنىن العا تارتادى.
ءتورتىنشى ۇمىتكەر مۋحاررەم ينجە داۋىس بەرۋگە ءۇش كۇن قالعاندا سايلاۋدان شىعىپ قالدى. م.ينجەنىڭ ايتۋىنشا, ساياسي دودادان باس تارتۋىنا ءارتۇرلى ارانداتۋشىلىق پەن جالعان اقپارات ارقىلى قىسىم جاساۋ اسەر ەتكەن.
جالپى, انادولىدا پرەزيدەنتتى بەسجىلدىق مەرزىمگە سايلايدى. ءبىرىنشى كەزەڭدە ۇمىتكەرلەر 50 پايىزدىق مەجەدەن اسا الماعان جاعدايدا ەكىنشى راۋند وتەدى. وندا كوپ قولداۋ يەلەنگەن ەكى ۇمىتكەر قاتىسادى. ەكىنشى تۋر 28 مامىرعا جوسپارلانعان. بۇدان بولەك, پارلامەنتتىڭ 600 مۇشەسىن تاڭدايدى.
كەي ساراپشىلار تۇركياداعى بۇل سايلاۋدى تاريحي ءسات دەپ سانايدى. ويتكەنى وسىدان 100 جىل بۇرىن تۇركيا رەسپۋبليكاسىنىڭ ىرگەتاسى قالانىپ, مۇستافا كەمال اتاتۇرىك ەل تىزگىنىن قولىنا العان ەدى. بيىلعى ساياسي دودانىڭ وسىنداي سيمۆولدىق ءمانى بار دەپ ەسەپتەيتىندەر جەتەرلىك.
ايتا كەتەرلىگى, باستى ۇمىتكەرلەردىڭ ەكەۋى دە سايلاۋ ناۋقانىن قىزۋ جۇرگىزدى. پرەزيدەنت رەجەپ تايپ ەردوعان ىستانبۇلداعى ايا-سوفيا مەشىتىندە كەشكى نامازدا قاسيەتتى قۇران كارىمنىڭ ءبىرىنشى سۇرەسىن ماقامىنا كەلتىرىپ وقىعان ەكەن. ال كەمال كىلىچداروعلۋ رەسپۋبليكانىڭ نەگىزىن قالاۋشى مۇستافا كەمال اتاتۇرىكتىڭ كەسەنەسىنە بارىپ, جاقتاستارىنا «ەل تاعدىرىن وزگەرتىڭدەر» دەپ ۇندەۋ تاستادى.
باۋىرلاس ەلدەگى ساياسي دودانى حالىقارالىق ۇيىمدار باقىلايدى. ءبىزدىڭ ەلدەن دە بىرنەشە دەلەگاتسيا اتتاندى. اتاپ ايتقاندا, تۇركپا ۇيىمى اتىنان سامات مۇساباەۆ, بەكبولات ورىنبەكوۆ, ەقىۇ ۇيىمىنان ەرلان سايروۆ جانە سۇلتان دۇيسەنبينوۆ سەكىلدى بەلگىلى دەپۋتاتتار سايلاۋدا بايقاۋشى بولادى.
انادولىداعى سايلاۋدى ەۋروپا ەلدەرى دە ءجىتى قاداعالايتىنى تۇسىنىكتى. ويتكەنى كەيىنگى جىلدارى ر.ەردوعان مەن ەۋروپالىق وداق اراسىنداعى قارىم-قاتىناس شيەلەنىسە ءتۇستى. بۇعان قوسا, قارت قۇرلىقتىڭ باستى ۇيىمى قۇرامىنا تۇركيانى قوسۋعا اسىعار ەمەس.
دەگەنمەن تۇركيا ناتو-نىڭ بەلدى مۇشەسى. شىعىس ەۋروپاداعى گەوساياسي احۋالدىڭ شيەلەنىسىن ەسكەرسەك, تۇركيانىڭ ونى شەشۋگە قوماقتى ۇلەس قوساتىنىن بريۋسسەلدەگى شەنەۋنىكتەر جاقسى تۇسىنەدى. ءبىر جاعىنان ىستانبۇل بيلىگى ۋكراينا تاراپىنا قارۋ-جاراق ساتسا, ەكىنشى جاعىنان رەسەيگە سالىنعان سانكتسيالاردى قولداعان جوق.
سوندىقتان انادولىنى كىم باسقاراتىنى تۇرىك اعايىندار ءۇشىن عانا ەمەس, ەۋروپا ءۇشىن دە ماڭىزدى. بىزگە دە باۋىرلاس حالىقتىڭ بىرلىگى مەن بەكەمدىگى كەرەك. ەندەشە, ەل تىزگىنىن كىم ۇستاسا دا, ەكىجاقتى قارىم-قاتىناستى ودان ءارى نىعايتاتىن باسشى كەلەتىنىنە سەنىم بىلدىرەمىز.
