بريتاندىق اتلەتتەر فريستايل, تاۋ شاڭعىسى, كەرلينگ (ەرلەر جانە ايەلدەر), مانەرلەپ سىرعاناۋ, شايبالى حوككەي (ەرلەر جانە ايەلدەر), شورت-ترەك, موگۋل, شاڭعى جارىستارى, سلوۋپستايل جانە سنوۋبورد سەكىلدى سپورتتىڭ ون تۇرىنەن قاتىسادى. الدىڭعى ۋنيۆەرسيادادا كەرلينگتەن تاماشا ونەر كورسەتكەن ەرلەر جانە ايەلدەر قۇراماسى بۇل جولى دا ناتيجەلى ويىن كورسەتەدى دەپ ۇمىتتەنەدى دەلەگاتسيا وكىلدەرى.
ۇلىبريتانيا دەلەگاتسياسى باسشىسىنىڭ ورىنباسارى ۆيككي كەمپبەلدىڭ سوزىنە قاراعاندا, بريتاندىق سپورتشىلار قىزۋ جاتتىعۋ جۇرگىزۋدە. ماسەلەن, شايبالى حوككەيدەن ەرلەر كومانداسى ءبىر جىل بۇرىن عانا العاش رەت سىناقتان وتكەنىمەن, 2017 جىلعى ۋنيۆەرسياداعا دايىندىق بارىسىندا تىڭعىلىقتى جاتتىعۋ جاسادى.
«سپورتشىلارىمىز كەرلينگتەن مەدالعا يە بولادى دەپ ۇمىتتەنەمىز. ويتكەنى, سوڭعى ۋنيۆەرسيادالاردا وسى سپورت تۇرىنەن جاقسى ناتيجەلەر كورسەتىپ ءجۇرمىز. اتاپ ايتقاندا, ايەلدەر قۇراماسى 2011 جىلى ەرزۋرۋمدە التىن, ال ەرلەر 2013 جىلى ترەنتينودا كۇمىس جانە 2015 جىلى گرانادادا قولا مەدالدى يەلەنگەن بولاتىن. قالاي بولعان دا, ءاربىر ەلدىڭ ءوزىنىڭ مىقتى جاعى بولادى, سوندىقتان, كەرلينگتەن ءادىل ءارى قىزۋ باسەكەنى كۇتەمىز», – دەپ مالىمدەدى ۆيككي كەمپبەل.
ءسوز ورايىندا ايتىپ كەتەلىك, ۇلىبريتانيا دەلەگاتسياسىنىڭ مۇشەلەرى 2016 جىلدىڭ قىركۇيەگىندە قازاقستانعا ارنايى ساپارمەن كەلگەن ەدى. «بىزگە الماتى قالاسى اسا ۇنادى, ەل حالقى اشىق ءارى اجارلى ەكەن. ءبىز جاڭا دوستاردى تابۋعا جاعداي جاسايتىن جاقسى ۇيىمداستىرىلعان قىزىقتى ويىندار كۇتەمىز, – دەدى كەمپبەل حانىم. – ۇلىبريتانيا ۋنيۆەرسيادانىڭ بارلىق قاتىسۋشىلارىنا ۇمىتىلماس ەستەلىك پەن ءساتتى ءارى ناتيجەلى ويىندار تىلەيدى».
ميرا بايبەك,
«ەگەمەن قازاقستان»
