ددۇ باسشىسى تەدروس ادان گەبرەيەسۋس الەمدەگى COVID-19 پاندەمياسىنا بايلانىستى توتەنشە جاعداي رەجيمىنىڭ اياقتالعانىن رەسمي تۇردە مالىمدەدى.
«كەشە توتەنشە جاعدايلار كوميتەتى ءوزىنىڭ 15-ءشى كەزدەسۋىن وتكىزدى جانە ماعان حالىقارالىق الاڭداۋشىلىق تۋعىزاتىن دەنساۋلىق ساقتاۋ سالاسىنداعى توتەنشە جاعدايدىڭ اياقتالعانىن جاريالاۋدى ۇسىندى. مەن بۇل ۇسىنىسپەن كەلىستىم», دەدى دۇنيەجۇزىلىك دەنساۋلىق ساقتاۋ ۇيىمىنىڭ باسشىسى جەنەۆاداعى بريفينگ بارىسىندا.
ت.گەبرەيەسۋس پاندەميا كەزىندە ددۇ-نىڭ باعالاۋى بويىنشا كوروناۆيرۋستان 20 ميلليون ادام قايتىس بولدى دەپ حابارلادى.
قازاقستاندا پاندەميا جاريالانعان العاشقى كۇننەن باستاپ ۆەدومستۆوارالىق كوميسسيا قۇرىلدى, وندا 2 مىڭنان استام جەدەل جانە ۇتىمدى شەشىمدەر قابىلداندى. كوميسسيا حالىقتىڭ دەنساۋلىعىن COVID-19-دان ساقتاۋ مەن قورعاۋ, مەملەكەتتىك ورگانداردىڭ ءوزارا ءىس-قيمىلى, مەديتسينالىق ۇيىمداردىڭ ينفراقۇرىلىمىن نىعايتۋ, دارىلىك زاتتاردى, يممۋنوبيولوگيالىق پرەپاراتتاردى, مەديتسينالىق ماقساتتاعى بۇيىمدار مەن جابدىقتاردى, جەكە قورعانۋ قۇرالدارىن ساتىپ الۋ, ەلدەگى جانە الەمدەگى ەپيدەميولوگيالىق جاعدايدى ەسكەرە وتىرىپ, شەكتەۋ شارالارىن كۇشەيتۋ جانە السىرەتۋ ماسەلەلەرى بويىنشا شەشىمدەر قابىلدادى.
پاندەميا باستالعاننان بەرى دەنساۋلىق ساقتاۋ مينيسترلىگى مەن وبلىستاردىڭ, الماتى, استانا, شىمكەنت قالالارى اكىمدىكتەرىنىڭ جانىنان رەسپۋبليكالىق جانە جەدەل شتابتار قۇرىلدى, ولار كۇن سايىن كوروناۆيرۋس ينفەكتسياسىنا قارسى ءىس-قيمىل جونىندەگى مەديتسينالىق ۇيىمداردىڭ جۇمىسىن ۇيلەستىردى.
پاندەميا كەزەڭىندە قر باس مەملەكەتتىك سانيتاريالىق دارىگەرىنىڭ COVID-19 ماسەلەلەرى بويىنشا سانيتاريالىق-پروفيلاكتيكالىق جانە ەپيدەمياعا قارسى شارالار بويىنشا 83 قاۋلىسى ازىرلەنىپ, قابىلداندى, ولار كوروناۆيرۋس ينفەكتسياسىنىڭ جاڭا نۇسقالارىنىڭ پايدا بولۋىن جانە ۆيرۋستىڭ قاسيەتتەرى تۋرالى ءبىلىمدى ەسكەرە وتىرىپ, ۇنەمى وزەكتى بولىپ وتىردى.
ۋاقتىلى مەديتسينالىق كومەك كورسەتۋ ءۇشىن قالالاردا 16 مودۋلدىك اۋرۋحانا سالىندى جانە 3 ينفەكتسيالىق اۋرۋحانا قايتا جاڭارتىلدى, سونداي-اق 63 امبۋلاتوريالىق-ەمحانالىق ۇيىم پايدالانۋعا بەرىلدى.
پاندەميا كەزىندە ۇيدە مەديتسينالىق كومەك كورسەتەتىن 3054 كوشپەلى موبيلدىك بريگادانىڭ جۇمىسى باستالدى.
پسيحوەموتسيونالدىق جۇكتەمەنى, قاۋىپتەردى ەسكەرە وتىرىپ, مەديتسينا كادرلارىن الەۋمەتتىك قولداۋدى قامتاماسىز ەتۋ ماقساتىندا مەديتسينا قىزمەتكەرلەرىنە ۇستەمەاقى تولەۋ بويىنشا شارالار قابىلداندى. پاندەميانىڭ بارلىق كەزەڭىندە
57 مىڭ مەديتسينا قىزمەتكەرى شامامەن 285 ملرد تەڭگە كولەمىندە ءتۇرلى كوۆيدتىك تولەمدەر الدى.
قازاقستاندىق دەنساۋلىق ساقتاۋ جۇيەسى رەسۋرستارىنىڭ, مەديتسينا قىزمەتكەرلەرىنىڭ قاجىرلى ەڭبەگىنىڭ جانە كۆي بويىنشا پروفيلاكتيكالىق جانە ەپيدەمياعا قارسى ءىس-شارالاردى ۋاقتىلى جۇرگىزۋدىڭ ارقاسىندا ولىمگە اكەلەتىن ينفەكتسيانىڭ تارالۋىن توقتاتۋعا قول جەتكىزىلدى.
بۇگىنگى تاڭدا قازاقستاندا پتر وڭ ناتيجەسى بار 1 ملن 411 مىڭ ادام جانە پتر تەرىس ناتيجەسى بار 91 مىڭ ناۋقاس كوروناۆيرۋس ينفەكتسياسىمەن اۋىردى. 2022 جىلدىڭ تامىز ايىنان باستاپ قر جانە بارلىق وڭىرلەر جاسىل ايماقتا.
سوڭعى 3 جىلدىڭ ىشىندە كوروناۆيرۋس ينفەكتسياسىنان 19 مىڭ ناۋقاس, ونىڭ 13,8 مىڭى كۆي+ جانە 5,4 مىڭى كۆي- تان قايتىس بولدى.
ناۋقاستاردىڭ 99% ساۋىعىپ كەتتى.
ددۇ COVID-19 پاندەمياسىن 2020 جىلعى 11 ناۋرىزدا جاريالادى. ناتيجەسىندە ول 3 جىل 1 اي جانە 24 كۇنگە سوزىلدى.
