بۇل – شەتەلدىكتىڭ قازاقستاندا تۇراقتى تۇرۋعا قۇقىعىن راستايتىن قۇجات. ونى رەسىمدەۋ ءۇشىن ەل اۋماعىندا تۇراقتى تۇرۋعا رۇقسات الۋ قاجەت.
«eGov Mobile قوسىمشاسى جەتىستىكتەرىنىڭ ءبىرى – «تسيفرلىق قۇجاتتار» ءبولىمى. ءبىز ەل تۇرعىندارى مەن قازاقستاندا تۇرۋعا قۇقىعى بار شەتەلدىكتەرگە ىڭعايلى بولۋ ءۇشىن ومىرلىك قاجەتتى قۇجاتتاردىڭ بارلىعىن تسيفرلىق فورماتقا كوشىرىپ جاتىرمىز. ەندى «شەتەلدىكتىڭ تۇرۋىنا ىقتيارحاتى» تسيفرلىق قۇجاتى ءموبيلدى قوسىمشادا قولجەتىمدى. شەتەلدىكتەر بۇل ەلەكتروندىق قۇجاتتى تالاپ ەتۋ ورنى بويىنشا بارلىق جەردە قاعاز قۇجاتپەن قاتار پايدالانا الادى», دەدى «ۇلتتىق اقپاراتتىق تەحنولوگيالار» اق باسقارما توراعاسى روستيسلاۆ كونياشكين.
جاڭا تسيفرلىق قۇجاتتى تابۋ ءۇشىن eGov Mobile قوسىمشاسىندا اۆتوريزاتسيادان ءوتىپ, باستى بەتتەگى «تسيفرلىق قۇجاتتار» بولىمىندەگى قۇجاتتار تىزىمىنەن «شەتەلدىكتىڭ تۇرۋىنا ىقتيارحاتىن» باسۋ قاجەت.
تسيفرلىق قۇجاتتا قاتە مالىمەتتەر انىقتالعان جاعدايدا «قاتە تۋرالى حابارلاۋ» باتىرماسىن باسۋ ارقىلى ءتيىستى مەملەكەتتىك ورگانعا e-Otinish ارقىلى ءوتىنىش بەرۋگە بولادى.
تسيفرلىق قۇجات – تۇپنۇسقا قۇجاتتىڭ انالوگى. قازىرگى ۋاقىتتا eGov mobile ءموبيلدى قوسىمشاسىنىڭ «تسيفرلىق قۇجاتتار» سەرۆيسىندە 11,7 ملن-نان استام ازامات بەلسەندى پايدالاناتىن 24 قۇجات (جەكە كۋالىك, پاسپورت, جۇرگىزۋشى كۋالىگى, ۆاكتسينالاۋ پاسپورتى, پتر تەستى جانە تۋ تۋرالى كۋالىك جانە تاعى باسقاسى) بار. بارلىق تسيفرلىق قۇجاتتى تالاپ ەتۋ ورنى بويىنشا ۇسىنۋعا بولادى. ەلەكتروندى قۇجاتتىڭ, ياعني تسيفرلىق قۇجاتتاردىڭ, ولاردىڭ انالوگتەرىنىڭ بالامالىلىعى زاڭمەن بەكىتىلگەن.
