قازىرگى ۋاقىتتا تاڭبالاۋ جانە قاداعالاۋ اقپاراتتىق جۇيەسىندە اياقكيىم ساۋداسىمەن اينالىساتىن 2 مىڭنان استام كاسىپكەر تىركەلگەن. 2023 جىلدىڭ ناۋرىز ايىندا 6 145 348 اياقكيىم تاڭبالاۋ كودىنا تاپسىرىس بەرىلدى. ال 2023 جىلعى ءساۋىردىڭ 1-21-ءى ارالىعىندا تاپسىرىس بەرىلگەن اياقكيىم كودىنىڭ سانى 15 853 844 جەتتى. ءبىر ايعا جەتەر-جەتپەس ۋاقىت ىشىندە اتالعان كورسەتكىش 257 پايىزعا وسكەن. بۇل اينالىمنىڭ اشىقتىعىن ارتتىرۋعا باعىتتالعان جۇيەگە بيزنەستىڭ بەلسەنە اتسالىسىپ وتىرعانىن كورسەتەدى.
جۇيەدە جۇمىس ىستەيتىن جانە تاۋاردى تاڭبالاۋ بويىنشا تىكەلەي تاجىريبەسى بار كاسىپكەرلەردىڭ ايتۋىنشا, تسيفرلىق تاڭبالاۋدى ەنگىزۋ تۇتىنۋشى ءۇشىن اياقكيىمنىڭ تۇپكىلىكتى قۇنىنا اسەر ەتپەگەن.
«مىندەتتى تاڭبالاۋ ەنگىزىلگەننەن بەرى اياقكيىم تاڭبالاۋمەن اينالىسىپ, ولاردى بولشەك ساۋدا دۇكەندەرىمىزدە ساتامىز. ءبىز تەك تاۋارلاردى تاڭبالاۋ جانە قاداعالاۋ اقپاراتتىق جۇيەسى مەن 1س جۇيەلەرىن ينتەگراتسيالاۋ ءمودۋلىن ەنگىزۋ كەزىندە عانا شىعىندالدىق. تيىسىنشە, ساتىلىمداعى اياقكيىمنىڭ باعاسىن 1 تەڭگەگە دە كوتەرمەدىك. وسىلايشا, تاڭبالاۋدىڭ ەنگىزىلۋى تۇپكىلىكتى باعاعا اسەر ەتكەن جوق. بىرىڭعاي وپەراتور بىزبەن ۇنەمى بايلانىستا جانە ءبىز ولاردان تاڭبالاۋ جۇيەسىنىڭ جۇمىسى بويىنشا ەگجەي-تەگجەيلى جاۋاپتار الامىز, ءوز ەسكەرتۋلەرىمىز بەن ۇسىنىستارىمىزدى ايتامىز», دەيدى «Sman» جانە «Bayman» تاۋار بەلگىلەرى بار «Bayman Group Qazaqstan» كومپانيالار توبىنىڭ قويما جانە لوگيستيكا جونىندەگى ديرەكتورى ولجاس سۇگىروۆ.
بۇعان دەيىن قازاقستانعا «يۋنيچەل» ساۋدا بەلگىسىمەن اياقكيىم اكەلەتىن «كاسپي-وبۋۆ» جشس وكىلدەرى دە جۇيەدەگى جۇمىستاردىڭ قولجەتىمدىلىگى تۋرالى پىكىر بىلدىرگەن بولاتىن:
ء«بىز اياقكيىم ونىمدەرىن تاڭبالاۋ ەنگىزىلگەننەن باستاپ, ياعني 2021 جىلعى قاراشادان بەرى تاۋارلاردى تاڭبالاۋ جانە قاداعالاۋ اقپاراتتىق جۇيەسىندە جۇمىس ىستەيمىز. تاڭبالاۋ ۇدەرىسىنىڭ بارلىق كەزەڭىن قاراستىردىق جانە پروتسەدۋرالارعا سايكەس بىرقالىپتى جۇمىستى جۇيەلەپ الدىق. جۇمىسىمىز رەسەي فەدەراتسياسىمەن ءوزارا تانىلعان كودتاردىڭ فۋنكتسياسى ارقىلى دا جەتىلدىرىلدى: ۋاقىت ايتارلىقتاي قىسقاردى جانە اياقكيىمدى اكەلۋ ۇدەرىستەرى جەڭىلدەتىلدى. ءونىمدى تاڭبالاۋ جۇيەسىن وڭ باعالايمىز جانە اياق كيىم نارىعىنداعى باسەكەلەستىك الدەقايدا ءادىل بولادى دەپ ۇمىتتەنەمىز. ءبىزدىڭ كومپانيا تاڭبالاۋ ءۇشىن ارتىق شىعىنعا تاپ بولعان جوق», دەگەن ەدى «كاسپي-وبۋۆ» جشس باسشىسى لاريسا سيتاروۆا.
تاۋارلاردى تسيفرلىق تاڭبالاۋ جانە قاداعالاۋ جۇيەسىنىڭ باستى ماقساتى قازاقستانداعى ساۋدانى اشىق ەتۋ ەكەنىن ەسكە سالا كەتەيىك.
«قازىر تاۋارلاردى تاڭبالاۋ جانە قاداعالاۋ جۇيەسىندە اياقكيىم ساۋداسىمەن جانە وندىرىسىمەن اينالىساتىن كاسىپكەرلەردىڭ جوعارى بەلسەندىلىگى بايقالادى. بۇل ادال بيزنەستىڭ زاڭدا بەلگىلەنگەن ەرەجەلەرگە سايكەس جۇمىس ىستەيتىنىن كورسەتەدى. تاڭبالاۋ جانە قاداعالاۋ جۇيەسىنىڭ مىندەتى – قازاقستانداعى تاۋار اينالىمىن اشىق ەتۋ جانە اياقكيىم ونەركاسىبىندە 50 پايىزعا جۋىقتايتىن كولەڭكەلى ەكونوميكا ستاتيستيكاسىن ازايتۋ. نارىقتىڭ اعارۋى سانالى كاسىپكەرلەردىڭ دامۋىنا جانە حالىقتىڭ ءال-اۋقاتىنا تىكەلەي اسەر ەتەدى. بۇعان بيزنەس تە جاۋاپتى», دەيدى يندۋستريا جانە ينفراقۇرىلىمدىق دامۋ مينيسترلىگى يندۋستريالىق دامۋ كوميتەتى جەڭىل ونەركاسىپ باسقارماسىنىڭ باسشىسى ايجان ءادىلوۆا.
اياقكيىم ونىمدەرىن تسيفرلىق تاڭبالاۋ جانە قاداعالاۋ 2021 جىلدىڭ 1 قاراشاسىنان باستاپ ەنگىزىلدى. وسى كەزەڭنەن باستاپ كاسىپكەرلەر بەيىمدەلۋ كەزەڭىنە قاتىستى كوپتەگەن جەڭىلدىك الدى. ال 2023 جىلعى 1 ساۋىردەن باستاپ اياقكيىمدى تاڭبالاۋ جانە قاداعالاۋ ەرەجەلەرى تولىق كۇشىنە ەندى. زاڭنامادا اياقكيىمدى تاڭبالاۋ ەرەجەلەرىن بۇزعانى ءۇشىن ايىپپۇل قاراستىرىلماعان.
