سۋدانداعى جاعداي ءالى دە شيەلەنىسىپ تۇر. 15 ساۋىردە سۋداننىڭ ۇلتتىق قورعانىس كۇشتەرى مەن جەدەل ارەكەت ەتۋ كۇشتەرى اراسىندا قارۋلى قاقتىعىس باستالدى. قازىر حارتۋم قالاسىندا جانە ەلدىڭ باسقا ايماقتارىندا سوعىس قيمىلدارى جالعاسىپ جاتىر. قاقتىعىس تاراپتارى جاريالاعان ءۇش كۇندىك گۋمانيتارلىق ءبىتىم قايتا-قايتا بۇزىلۋدا.
سۋدانداعى سوعىس قيمىلدارى باستالعان ساتتەن باستاپ قازاقستان رەسپۋبليكاسىنىڭ ەفيوپياداعى ەلشىلىگى قازاقستاندىق ازاماتتاردى قاقتىعىس ايماعىنان ەۆاكۋاتسيالاۋ ماسەلەسىن بارىنشا پىسىقتاۋعا كىرىستى.
ەفيوپيادا تىركەلگەن بىرقاتار ەلشىلىك پەن حالىقارالىق ۇيىمداردىڭ وكىلدەرىمەن كەزدەسۋلەر وتكىزىلىپ, ولارعا قازاقستان رەسپۋبليكاسىنىڭ ازاماتتارىن سۋداننان ەۆاكۋاتسيالاۋعا كومەكتەسۋ ءۇشىن رەسمي وتىنىشتەر جىبەرىلدى.
«بۇگىنگى تاڭدا قازاقستاننىڭ بىرقاتار ازاماتى قاقتىعىس ايماعىنان ەۆاكۋاتسيالاندى. قازاقستان ازاماتتارىن ەفيوپيا مەن ساۋد ارابياسى كورولدىگىنىڭ اۋماعى ارقىلى ەۆاكۋاتسيالاۋ جۇمىستارى جالعاسىپ جاتىر. ەفيوپياداعى قازاقستان ەلشىلىگى ازاماتتارىمىزدى سۋداننان كەلىسىلگەن جانە قاۋىپسىز شىعارۋ ءۇشىن مىسىرداعى جانە ساۋد ارابياداعى قر ديپلوماتيالىق وكىلدىكتەرىمەن تىعىز بايلانىستا», دەلىنگەن سىرتقى ىستەر مينيسترلىگىنىڭ حابارلاماسىندا.
قازاقستان ازاماتتارىنىڭ ناقتى سانىن انىقتاۋ جانە ولارعا سۋداننان ەۆاكۋاتسيالاۋعا جاردەم كورسەتۋ ءۇشىن ەلشىلىك جانىنان جەدەل جەلى اشىلدى: +251 945 051 624 (WhatsApp), kazembethiopia@gmail.com, kazembethiopia@mfa.kz.
ەلشىلىك ەفيوپيا سىرتقى ىستەر مينيسترلىگىنە, بۇۇ-نىڭ سۋدان مەن ەفيوپياداعى بولىمشەلەرىنە, سونداي-اق تۇركيا, رەسەي جانە جاپونيا ەلشىلىكتەرىنە قازاقستان ازاماتتارىن ەۆاكۋاتسيالاۋعا بەلسەندى كومەك كورسەتكەنى ءۇشىن العىس ءبىلدىردى.
