الماتى قالالىق دەنساۋلىق ساقتاۋ باسقارماسى جاقىندا قالاداعى بارلىق بۇقارالىق اقپارات قۇرالدارىنىڭ قىزمەتكەرلەرىن مەديتسينالىق تەكسەرۋدەن وتكىزۋگە جاعداي جاساپ, اشىق ەسىك كۇنىن وتكىزدى.
كۇندەلىكتى قاربالاس جۇمىسپەن قاۋىرت جۇرەتىن جۋرناليستەر قاۋىمىنىڭ ءوز دەنساۋلىعىنا قاراپ, كوڭىل بولۋىنە ۋاقىتتارى بولا بەرمەيتىنى راس. بارلىق بىلىكتى كاسىبي ماماندى ءبىر ەمحاناعا جيناپ, وسىنداي جاناشىرلىق, قامقورلىق كورسەتىپ جاتقان كەزدە ءمۇمكىندىكتى پايدالانعىسى كەلگەن جۋرناليستەردىڭ بۇل ۇسىنىستى قۇپ الىپ, كەلۋشىلەردىڭ قاراسى كوبەيۋى بۇل دا ءبىر بىتكەن ءىس بولعانىن كورسەتكەندەي.
باق وكىلدەرىن المالى اۋدانىنا قاراستى №5 قالالىق ەمحانا الدىندا الماتى قالاسى دەنساۋلىق ساقتاۋ باسقارماسى اكىمشىلىك ءبولىمىنىڭ باسشىسى, ءباسپاسوز حاتشىسى, جۋرناليستەردىڭ دوسى ءلايلا كەڭەسباەۆا مەن ەمحانانىڭ باس ءدارىگەرى گۇلشاھيرا قامباروۆا كۇتىپ الىپ, قولدارىنا تەكسەرۋدەن وتەتىن مامانداردىڭ ءتىزىمى مەن ءبىر-ءبىر مەدبيكەنى قوسىپ بەرىپ, قوشەمەتتىڭ استىندا قالدىردى. ايتا كەتەيىن, وسى جولداردىڭ اۆتورى دا تەكسەرۋدەن ءوتتى.
– قالاداعى جۋرناليستەر قاۋىمىنا وسىنداي قىزمەت كورسەتۋ يدەياسىن مەديكتەردىڭ كاسىبي مەرەكەسىنە وراي الماتى قالاسى اكىمىنىڭ ورىنباسارى زاۋرەش امانجولوۆا ايتقان ەدى. باسقارما بۇعان دەيىن دە اشىق ەسىك كۇندەرىن وتكىزۋدى داستۇرگە اينالدىرعان. بىراق بۇل جولى زاۋرەش جۇمانالىقىزىنىڭ باستاماسىن قولداپ, تەك جۋرناليستەرگە ارناپ, بۇكىل قالا بويىنشا جەتەكشى كافەدرالدى مامانداردى شاقىرىپ, اكتسيا وتكىزۋدى ءجون دەپ ۇيعاردىق. ەكى كۇندە الماتىداعى جۇزگە جۋىق باق وكىلدەرى سالالىق مامانداردان, دياگنوستيكالىق تەكسەرۋدەن ءوتتى. راس, جۋرناليستەردىڭ ءوز دەنساۋلىعىنا كوڭىل بولۋگە ۋاقىتى دا, مۇمكىندىكتەرى دە بولا بەرمەيتىنىن جاقسى بىلەمىز. سوندىقتان دەنساۋلىققا جاۋاپكەرشىلىكپەن قاراۋ ماقساتىندا وسىنداي مەديتسينالىق كەڭەس, كومەك كورسەتەتىن امال تاپتىق, – دەدى بىزگە قالالىق دەنساۋلىق ساقتاۋ باسقارماسىنىڭ باسشىسى, مەديتسينا عىلىمدارىنىڭ كانديداتى جانات قاسىمجانوۆا.
شىنىندا دا, №7 كلينيكالىق اۋرۋحانانىڭ ەندوكرينولوگيا ءبولىمىنىڭ مەڭگەرۋشىسى اينۇر اسانوۆا, قالالىق كارديولوگيا ورتالىعىنىڭ كارديولوگ-دارىگەرى مەرۋەرت وپابەكوۆا, №5 ەمحانانىڭ بىلىكتى ماماندارى – ۋدز-ءدىڭ ءدارىگەرى ب.ءمامبەتوۆا, پسيحولوگ س.ءشاكىرجانوۆا, رەۆماتولوگ ا.اتحانوۆا, گاستروەنتەرولوگ ب.جۇبانىشبەكوۆا, ت.ب. مامانداردىڭ الدىنان ءوتىپ, بىرقاتار لابوراتوريالىق زەرتتەۋ جاسالدى.
اتالمىش ەمحانانىڭ ايەلدەر كەڭەسىنىڭ مەڭگەرۋشىسى گۇلميرا ءانۋاربەكقىزى اۆكۋباەۆاعا جولىعىپ, ەكى كۇن بويى وتكىزىلگەن اكتسيانىڭ قورىتىندىسىن سۇراعانىمىزدا, العاشقى كۇنى – 10, ەكىنشى كۇنى 30 ادام قابىلداعانىن, ولاردىڭ اراسىنان ءبىر پاتسيەنتتى اۋرۋىنىڭ اسقىنۋىنا بايلانىستى جەدەل جاردەممەن اۋرۋحاناعا جىبەرگەنىن, 2 ايەلدەن جاتىر ميوماسى انىقتالعانىن, سۋىق تيگەن بىرنەشە پاتسيەنتكە ەم-دومىن جازىپ بەرگەنىن, ەڭ باستىسى, بارلىق قابىلداۋعا كەلۋشىلەردەن ونكومازوك الىنىپ, ونىڭ قورىتىندىسى ون كۇننەن كەيىن بەلگىلى بولاتىنىن جەتكىزدى. ال جۇرەكتى ەكگ-گە ءتۇسىرىپ, بىردەن كارديوگرامماسىن وقىپ, كەڭەس بەرگەن الماتى قالالىق كارديولوگيا ورتالىعىنىڭ دارىگەرى مەرۋەرت وپابەكوۆا ءبىرىنشى كۇنى 21, كەلەسى كۇنى ساعات ۇشكە دەيىن 49 ادام قابىلداعان. 2 ادامدا قان قىسىمى جوعارى, 2 ادامدا يشەميالىق جۇرەك اۋرۋى, ءبىر جاس جىگىتتىڭ كارديوگرامماسىندا ۇلكەن وزگەرىس بارىن, وعان جۇرەگىنە ۋدز-دەن ءوتۋدى ۇسىنعانىن ايتتى.
«بيىل رەسپۋبليكا الاڭىندا قارتتار جىلىنا وراي ءدال وسىنداي اكتسيا ۇيىمداستىرىلعان ەدى, – دەدى بىزگە №7 قالالىق كلينيكالىق اۋرۋحانادان كەلگەن نەفرولوگيا ءبولىمىنىڭ مەڭگەرۋشىسى, بىلىكتى مامان, جوعارى ساناتتاعى دارىگەر شىنار سارسەنوۆا. – مىناۋ بيىلعى جىلعا ەكىنشى ءىس-شارا. مەنىڭشە, بۇگىنگى اكتسيا ەرەكشە وتۋدە. تاڭدالعان عيمارات تا كەرەمەت, دارىگەرلەرگە, جۋرناليستەرگە دە بارلىق جاعداي قاراستىرىلعان. رەسپۋبليكا الاڭى الدىندا دارىگەرلەر دە, كەلۋشىلەر دە توڭىپ, مازامىز كەتىپ, ابىگەرگە تۇسكەن ەدىك. ال بۇگىنگى اكتسيانىڭ قورىتىندىسىنا كەلسەك, قابىلداۋدا بولعان نازىك جاندىلاردىڭ 70 پايىزىندا ماستوپاتيا, ياعني ومىراۋىندا كىنارات بار. ولاردىڭ دەنى وزدەرىندە مۇنداي پاتولوگيانىڭ بارىن بىلمەگەن. 2 ادامدا قان قىسىمىنىڭ جوعارى ەكەنى انىقتالدى. ولار ونى بىلمەگەن. قازىرگىدەي اپتاپ ىستىقتا ءبىر جەردە قۇلاپ قالسا قايتەدى. مۇنداي اكتسيانىڭ جاقسىلىعى – ادامعا اۋرۋ بەلگىسىن تاپقاننىڭ ءوزى كومەك ەمەس پە. ماعان ۇناعانى, توپىرلاعان كەزەك جوق, ءبارى مادەنيەتتى تۇردە وتۋدە. ونىڭ ۇستىنە, ءبىر-بىرلەرىڭىزدى بىلەسىزدەر, قانداي تاماشا».
ءيا, شىنىندا كەرەمەت سىي بولدى. باس اۋىرىپ, بالتىر سىزداسا دا ۋاقىتىندا قارالماي, كەيىنگە قالدىرىپ جۇرەتىن ادەتىمىزدىڭ بارىن جوققا شىعارمايمىز. ونىڭ ۇستىنە وزىمىزگە ءوزىمىز دياگنوز قويىپ الىپ, كۇدىكتەنىپ جۇرەتىنىمىز تاعى بار. قالاي دەگەندە, اينالدىرعان 4-5 ساعاتتىڭ ىشىندە 16 ماماننىڭ الدىنان مەديتسينالىق الدىن الا تەكسەرۋدەن ءوتىپ, بار ماسەلەمىز شەشىلگەندەي جەڭىلدەپ قالعانىمىز راس.
– ومىراۋىم اندا-ساندا شانشىپ قوياتىن. ءوزىمىزدىڭ ۋچاسكەلىك تەراپەۆت ماممولوگ-دارىگەرگە بارۋعا كەڭەس بەرگەن-ءدى. سودان ءانى-مىنە دەپ جۇرگەنمىن. ونىڭ ۇستىنە ەمحانادا ۋدز-گە تەگىن تۇسۋگە الدىن الا كەزەككە جازىلىپ, ونى كۇتۋىڭ كەرەك. بۇل جولى ۋدز-گە دە, ماممولوگ دارىگەرگە دە قارالىپ, كوڭىلىم ورنىنا ءتۇستى. ءارى قان قىسىمىن, قانداعى قانتتىڭ, حولەستەريننىڭ مولشەرىن ءبىلدىم. باسقا دا بىرقاتار مامانداردان ءوتىپ, قاجەتتى كەڭەس الدىم. وسىنداي شارانى ۇيىمداستىرعان قالالىق دەنساۋلىق ساقتاۋ باسقارماسىنا راحمەتتەن باسقا ايتارىمىز جوق, – دەيدى «ەگەمەننىڭ» شىنارى.
مۇنداي جاعىمدى پىكىرلەردى مەديتسينالىق تەكسەرۋدەن وتۋگە باسقا باسىلىم, تەلەارنالاردان كەلگەن ءارىپتەستەرىمىزدەن دە ەستىدىك. تاعى ءبىر كەرەمەتى, ەمحانادا كوپتەن كورمەگەن قالامداستارىمىزدى كورىپ, مارە-سارە بولىپ قالدىق.
اكتسيا سوڭىندا جۋرناليستەرگە وسىنداي جاعداي جاساعان №5 قالالىق ەمحانانىڭ باس دارىگەرى, دەنساۋلىق ساقتاۋ ءىسىنىڭ ۇزدىگى, جوعارى ساناتتاعى دارىگەر گۇلشاھيرا قامباروۆاعا راحمەتىمىزدى ايتىپ, زور ريزاشىلىعىمىزدى بىلدىردىك.
گۇلزەينەپ سادىرقىزى,
«ەگەمەن قازاقستان».
الماتى.
