ءوڭىردىڭ نەگىزگى ەكونوميكالىق دامۋىنا اكىم جاۋاپ بەرەتىن ەدى. قازىر ءماسليحاتتاردىڭ دا ءرولى ارتىپ كەلەدى. ولاردىڭ مىعىمدىعىنا, دۇرىس, اشىق باسەكەلەسە جۇمىس ىستەۋىنە ناقتى تالاپتار قويىلدى. مۇنداي جاعدايدا ءماسليحاتتىڭ دا سالماعى ارتىپ, جاۋاپكەرشىلىگى ەسەلەنە تۇسەدى.
شىنىن ايتۋ كەرەك, ەلىمىزدە ءتورت ايماق قانا رەسپۋبليكانىڭ دونورى. قالعانى بيۋدجەت ەسەبىنەن كۇن كورىپ وتىر. مەملەكەت باسشىسى بۇگىن وتە وزەكتى ماسەلەنى كوتەردى. كۇنى-ءتۇنى ويلاناتىن كەز كەلدى. قانداي جاعدايدا ەكونوميكانى جاقسارتامىز, قايتسەك داميمىز؟ وسىنى جان-جاقتى تالقىلاۋ كەرەك. ازاماتتار دا بۇل سالماقتى سۇراقتىڭ جۇگىن بىرگە ارقالاۋى قاجەت.
ەكىنشى ماسەلە – رەفورمانىڭ نەگىزگى قارا جۇمىسىن اتقاراتىن اۋدان اكىمدەرى. ۇلكەن سالماق سولارعا تۇسەدى. پرەزيدەنت بۇگىنگى سوزىندە اۋدان اكىمدەرىنىڭ جاۋاپكەرشىلىگىن ارتتىرۋ قاجەت ەكەنىن باسا ايتتى. قازىرگى تاڭدا گەوساياسي, الەۋمەتتىك, ەكونوميكالىق تۇرعىدا كۇردەلى كەزەڭگە اياق باستىق. قوعامنىڭ تالابى وزگەردى. ەكونوميكالىق احۋال ۋشىعىپ تۇر. مۇنىڭ ءبارى مەملەكەتتىك اپپاراتتان جاڭا ساپانى قاجەت ەتەدى. بۇگىندە حالىققا ۇنايتىن اڭگىمەدەن گورى, ۇنامايتىن اڭگىمەنى – شىندىقتى شىرقىراتىپ ايتۋ كەرەك. سوعان ساي, قوعامعا اتقارىلعان جۇمىستى تۇسىندىرە ءبىلۋ قاجەت.
مەملەكەتتىك قىزمەتكە ەلىمىز ءۇشىن نە ىستەي الامىن, پايدامدى قالاي تيگىزەمىن دەيتىن كوزى اشىق, كوكىرەگى وياۋ ازاماتتار كەرەك. سوندىقتان مەملەكەتتىك اپپارات, اسىرەسە اۋدان اكىمدەرى كوپ ەڭبەك ەتكەنى ابزال. ويتكەنى حالىقتىڭ كوپشىلىگى ايماقتاردا. سولاردىڭ تالابىنا ساي بولعانى ءجون. قىسقاسى, ولار مەملەكەت جۇرگىزىپ جاتقان رەفورمانىڭ ەل ىشىندەگى ەلشىسى اتانۋعا ءتيىس. وسىلاردى ەسكەرە كەلە, مەملەكەت باسشىسى بۇكىل ايماقتىڭ باسشىلارىن جيناپ, كەڭەس وتكىزدى.
جيىن بارىسىندا كوپتەگەن قوردالانعان ماسەلە ايتىلدى. بۇعان ساي ناقتى تاپسىرمالار دا بەرىلدى. ونى بايىپپەن, دۇرىستاپ اتقارۋ – مەملەكەتتىك اپپارات, پارلامەنت, ءماسليحاتتاردىڭ تىكەلەي مىندەتى. بۇلاردى كەيىنگە قالدىرۋعا ۋاقىت جوق. ساياسي رەفورمالاردىڭ نەگىزگى كەزەڭى ءوتتى, ەندى سونى ساياسي مادەنيەتكە اينالدىرىپ, باسەكەلەستىك داستۇرىنە اكەلۋ – جاڭا كەزەڭ تالابى.
ايدوس سارىم,
ءماجىلىس دەپۋتاتى
