زارداپ شەككەن ادامداردىڭ بارلىعى ءۇيىندى استىنان شىعارىلدى. بۇل جونىندە ءوڭىر باسشىسى نۇرلان نوعاەۆ مالىمدەدى.
«17 ءساۋىر كۇنى ساعات 5:04-تە جاڭاوزەن قالاسىندا ەكى كىرەبەرىستى 12 پاتەرلى 2 قاباتتى تۇرعىن ءۇيدىڭ 2-ءشى كىرەبەرىستەگى پاتەرىندە جارىلىس بولدى. بولجام بويىنشا گاز قوسپاسى جارىلىپ, 150 شارشى مەتر اۋماقتا كىرەبەرىس قۇلاعان, سالدارىنان 4 ادام كوز جۇمدى», دەدى ماڭعىستاۋ وبلىسىنىڭ اكىمى.
10:45-تەگى جاعداي بويىنشا مەديتسينالىق كومەككە 13 ادام جۇگىنگەن, ونىڭ ىشىندە 8 - بالا. 6 ادام اۋرۋحاناعا جاتقىزىلدى, تاعى 7 ادام ۇيىنە جىبەرىلدى. جارىلىستان ءۇش پاتەرگە زاقىم كەلگەن. ءۇي گازدان اجىراتىلدى. قوقىستار تازارتىلىپ جاتىر.
بۇل رەتتە, وبلىس اكىمى نۇرلان نوعاەۆ اۋرۋحاناعا تۇسكەن تۇرعىنداردىڭ جاعدايلارىن ءبىلدى.
قازىر وقيعا ورنىندا ۆەدومستۆوارالىق كوميسسيا جۇمىس ىستەپ جاتىر, جارىلىس فاكتىسى بويىنشا قىلمىستىق ءىس قوزعالدى.
اۋرۋحاناعا جەتكىزىلگەن ناۋقاستار تراۆماتولوگيا بولىمىندە جاتىر, ال اۋىر حالدە جاتقاندار جانساقتاۋ بولىمىندە جانە قارقىندى تەراپيا بولىمىندە ەم قابىلداپ جاتىر, ءبىر ناۋقاس ساناۆياتسيا قىزمەتى ارقىلى وبلىستىق اۋرۋحاناعا جەتكىزىلدى.
«مارقۇمداردىڭ وتباسىلارىنا قايعىرىپ كوڭىل ايتامىن. زارداپ شەككەندەرگە جانە ولاردىڭ وتباسىلارىنا جاڭا باسپانامەن قوسا ماتەريالدىق كومەك كورسەتىلەدى. توتەنشە جاعدايلار قىزمەتىنە كومەك كورسەتكەن ەرىكتىلەر مەن قالانىڭ قامقور تۇرعىندارىنا العىس ايتامىن. قازىرگى ۋاقىتتا ءۇيىندى استىنان بارلىق ادامدار شىعارىلدى», دەدى نۇرلان نوعاەۆ.
